La societât furlane di passe dîs agns e sta tornant indaûr. Il nestri viaç par tornâ a cressi al è dificil ma inte nestre storie o sin simpri stâts usâts a frontâlu. Rivarìno ancje chest colp?
Vie par dut chest an o vin cirût di vignî a bon su la salût de economie furlane. Nus somee pardabon che la analisi che o vin fate, cjalant ai numars e peantju ae nestre storie, e feveli di une retrocession de societât furlane che, invezit di continuâ inte progression scomençade daspò de seconde vuere mondiâl, di passe dîs agns e sta tornant indaûr. E une vore. Al è come se un altri taramot al ves fat sierâ impresis, buteghis, fabrichis. E i nestris zovins a tornin a jessi “libars di scugnî lâ”, tant che i lôr vons: ancje se il Friûl di indulà che a partissin al à dut, nol è bon di sigurâur nuie pal avignî.
A son tancj i indicadôrs che a fasin pensâ: dal benstâ economic al redit, dai presits ae ocupazion. Dutis robis che intai agns ‘80 e ‘90 dal Nûfcent a fasevin clamâ il Friûl “locomotive di Italie”, ancje plui dal Venit, soredut cjalant ae acelerazion economiche vignude daûr de ricostruzion daspò dal taramot dal 1976. Cumò chei stes indicadôrs si son sbassâts e il Friûl al è al otâf puest des economiis des regjons talianis: ma a judizi di analiscj come Fulvio Mattioni e Roberto Muradore intai contescj regjonâi nissun al à une diferenziazion cussì grandonone tant che il Friûl-Vignesie Julie. Di fat chenti e je une part che e rive a cressi, Triest, e chê altre – il Friûl – che e scombat par sorevivi: intai ultins dîs agns, di fat, il cjâf lûc de Regjon al è l’unic lûc intai prins puescj in Italie par benstâ e cualitât de vite. Dal 2008 al 2018 al è cressût de posizion numar 27 ae numar 11, intant che Pordenon al è rivât al trentesim puest e Udin al sta dôs posizions plui sot. In depression, e cence tantis prospetivis.
Purpûr se si lei il Document di Economie e Finance de Regjon la situazion e somee sot control. Si conte che in Friûl intal 2018 e sedi stade une incressite dal un par cent e la dinamiche intai 4 agns che a vignaran e varès di puartâ a di un miorament dal redit a disposizion des fameis, e duncje – si spere – dai invistiments. La ANCE (Associazion Costrutôrs Edîi) e dîs che i bants di gare pes voris publichis in Friûl a son cressûts dal 17,6 par cent intal 2018, ancje se l’an prime al jere pardabon dut fer intai cantîrs blocâts dal pat di stabilitât. Bisugne spietâ a ridi, duncje: ancje parcè che la edilizie si è tornade a inviâ, ma i volums di faturât e di ocupazion a son ancjemò avonde fers, dopo che intai ultins 2 agns il setôr al è pardabon colât a tocs. A van ben il turisim e il puart (di Triest), ma sul cumierç e su la manifature al è necessari sclarî che la selezion des impresis e je stade une vore penze.
E chei che a sorevivin a son plui fuarts, ma no àn cjapade sù la lavoranzie lassade a cjase de crisi. E il dinamisim de economie, simpri stant aes analisis di Mattioni e Muradore, al ten bot sot dal Cjars (+2,3 par cent) e invezit al va a Patràs in Friûl (-16 par cent in Provincie di Udin).
Dal rest, se e je vere che la stime de Regjon e je otimiste, l’istitût Prometeia al stime che la cressite intal 2019 e sarà dal 0,1 par cent, nivel dongje di chel talian: e ancje dongje di chê situazion che i economiscj a clamin di stagnazion. In chest panorame nol è dit che un increment dai consums al puarti a di une cressite de produzion o de ocupazion. Nissun di fat al dîs che i prodots che i furlans a ciraran a vignedin par fuarce dal Friûl ni che ju compredin in buteghis furlanis. A podaressin par esempli cjoliju su Amazon, che no par nuie e à viert a Flum un so centri direzionâl. La sielte e je determinade de buine propension dai furlans a fâ compris online, ma ancje di une pussibilitât simpri plui ridote di rivâ adore a cjatâ dongje une schirie di prodots.
Prometeia e stime che si podarès rivâ al plui al 0,9 par cent di cressite dentri dal 2021, ma par merit dal export, ancje se no bisugne iludisi. Il prodot vendût intal forest, che al veve segnade intal 2018 une esplosion cuntune cressite dal 4,2 par cent, intai prossims 3 agns nol aumentarà plui dal 2,4 par cent: a son tantis di fat lis incognitis che i nestris imprenditôrs a cjataran sui marcjâts di inaltrò. Baste rindisi cont di trop che e pese la riduzion des venditis di machinis sui afârs dai nestris produtôrs di açâl.
Pecjât parcè che intal 2018 lis venditis des impresis di manifature intal forest si jerin sglonfadis di 875 milions di euro: la metalurgjie furlane e veve fat rionzi i siei faturâts dal 11,8 par cent, cun pontis dal 21 in France e intal Ream Unît, dal 13 in Gjermanie e dal 14 in Asie. E i volums gjenerâi dai trafics viers de Cine (+27 par cent) e dai Stâts Unîts (+11) a àn belançât la pierdite di esportazions viers de Americhe Latine, caladis di un cuart. Cumò la riduzion de domande di açâl e je un risi par dute la economie furlane, parcè che al è un fenomen planetari che nol somee vê une soluzion imediade.
E cussì dome intai prins trê mês dal 2019 la produzion industriâl si è sbassade dal 2,7 par cent e l’export furlan al à vude une flession di 3 miliarts. Avonde par preocupâsi, ancjemò pôc par rindisi.
Il numar des impresis ativis inte nestre regjon al rive cuasi a 102 mil. No cressin di cuantitât, ma a scomencin a no calâ plui come che a fasevin intai ultins agns. A son di mancul in setôrs tant che traspuarts, agriculture, costruzions e cumierç, ma il lôr numar al aumente inte ristorazion e intai servizis, fintremai a belançâsi (-0,3 par cent). Di dutis chestis aziendis dome une piçule part e je chê che e promet di plui, e che la politiche e varès di fâ cressi in cualsisei maniere. Si trate des 218 societâts di capitâi che si son notadis intal regjistri des Startup inovativis. A son il 5 par cent des gnovis impresis: e chest al è il secont valôr plui alt a nivel talian dopo dal Trentin-Sud Tirôl. Ven a stâi che la propension ae inovazion no je pierdude: e forsit e je chê che nus salvarà, se o savarìn meti dongje ancje la disponibilitât che soredut i zovins a àn di metisi in rêt e di zontâ capitâi e risorsis par fâ invistiments o par promovisi sui marcjâts di inaltrò. Ancje chi dut câs Triest al mostre di jessi un pas indevant. Si trate di fat de seconde provincie di Italie pal tas di impresis inovativis, il 6,3 par cent.
Al è un pont di fuarce che ancje la Comission Europeane e à fat viodi intal rapuart Regional Innovation Scoreboard dulà che nus àn dade une buine pagjele: 8,78 su 10 al è il nestri vôt, che al ven soredut de cuantitât di brevets e di publicazions sientifichis che a vegnin produsûts chenti e de cuote di risorsis che lis aziendis privadis a risiervin ae inovazion intai lôr belançs. O sin al 0,86 par cent, di plui dal 0,71 par cent de publiche aministrazion: ma la cuote totâl (1,57 par cent) e je la tierce in Italie daûr dal Piemont e de Emilie. Intai ultins trê agns, plui de metât des aziendis furlanis e à rivât a imbastî procès di inovazion, di prodot o di organizazion, tecnologjics o di marketing.
Al reste dut câs il lambic dal lavôr, cuntune disocupazion che e je avonde ridote (il tas al è dal 6,7 par cent, a son 37 mil disocupâts su une fuarce lavôr di 547 mil) ma no simpri la cualitât de ocupazion e je chê che soredut i nestris zovins a volaressin. La statistiche no lu dîs, ma a son puescj di vore precaris e sotpaiâts. E no mancjin i Neet, ven a stâi i zovins che no studiin e no lavorin: une situazion che e rivuarde 23 mil personis. Pal nestri avignî al è fondamentâl che dutis chestis energjiis a vegnin recuperadis e che il compit che la societât furlane ur cjatarà nol sedi, se pussibil, di stropebusis ma di protagoniscj.
Alore, in conclusion, dulà stino lant? Il nestri viaç, come simpri, al è dificil e no vin tantis sigurecis ni su dulà che la Storie nus menarà, ni se o varìn ducj i imprescj par frontâ lis ondis dal destin. Di une robe sole o podìn stâ sigûrs, se o cjalìn ae nestre int: che di cualsisedi bande al vignarà il burlaç, inte nestre storie o sin simpri stâts usâts a frontâlu. Sì, al è simpri cualchidun che al scjampe, e ancje cualchidun altri che si tire indaûr: ma la plui part dai furlans intes dificoltâts e strenç i dincj e no mole. Sarìno bogns di fâ cussì ancje intun avignî che in chescj agns al somee sierânus intun cjanton? ❚
Walter Tomada
