G. Corongiu, Metropolitània e àteros contos tòpicos, distòpicos e utòpicos, Casteddu/Cagliari, Palabanda, 2019
Passe tresinte pagjinis di narative in lenghe sarde scritis cuntune buine ispirazion leterarie, cuntune sensibilitât specifichis inte sielte des peraulis e cuntune motivazion che si pues definîle ancje “politiche” e “militante”.
“Metropolitània e àteros contos tòpicos, distòpicos e utòpicos” (par furlan al sarès “Metropolitània e altris contis topichis, distopichis e utopichis”, un titul che al sclarìs bielzà diviersis robis e che al ingolosìs daurman) al è l’esordi su la distance lungje tant che contadôr di Giuseppe Corongiu, di tancj agns impegnât tant che gjornalist, funzionari public, sagjist e operadôr culturâl inte promozion dal sart tant che “lenghe normâl”.
In dut a son dodis contis di sostance, là che si incrosin situazions, personaçs e storiis che a son in chel istès universâls e sardis – ma pardabon, fûr di cualsisedi lûc comun – e soredut modernis e contemporaniis. L’autôr al met dongje la voie e il plasê di contâ cuntune buine dose di disingjan e di critiche sociâl, di cussience identitarie e di passion in cont sedi di ce che al scrîf che de lenghe che al dopre. ❚