La archeolighe di Budoie, in mission pe Universitât di Udin in Kurdistan, nus conte i segrets di un mistîr plen di dificoltâts e sodisfazions
Dîs imponents rilêfs rupestris che a figurin il sovran e lis divinitâts de Assirie dilunc di un grant canâl di irigazion che al puartave aghe a Ninive e al bagnave la planure, fat fâ dal re Sennacherib: al è l’ultin straordenari risultât de mission archeologjiche a Faida, intal Kurdistan irakian, de Universitât di Udin e de Direzion des antichitâts di Dohuk intune tiere, la Mesopotomie dal nord, fondamentâl pe storie, ma restade inesplorade a dilunc par vie de sô situazion politiche ingredeade. Te scuadre di archeolics vuidade di Daniele Morandi Bonacossi, dal ateneu furlan, e je Katia Gavagnin, ceramolighe di Budoie, cuntune lungje esperience di sgjâfs daûr, sedi in Italie, a tacâ dal 2006, che tal forest: prime in Sirie, a Tell Ahmar e Tell Beydar, e dal 2011, cuant che il cuadri al jere deventât masse pericolôs, in Gjeorgjie e, intal Kurdistan irakian, a Faida e a Tell Gomel, che i ricercjadôrs furlans a identifichin tal cjamp di bataie di Gaugamela li che, tal 331 prime di Crist, lis trupis vuidadis di Alessandro Magno a sconfizerin l’esercit persian di Dario III.
«La mê passion pe archeologjie no je nassude di frute – e conte Katia -. E je stade plui une seconde sielte, parcè che cuant che no mi àn ametude al Istitût superiôr di educazion fisiche di Bologne, mi soi iscrite a Conservazion a Vignesie. Cuant che o ai scomençât a frecuentâ i cors o ai capît daurman che chê e sarès stade la mê strade e fin dal principi mi è stât clâr che o varès sielt il Vicin Orient antîc. Po mi soi specializade intal studi des ceramichis».
Di in chê volte lis sodisfazions no son mancjadis. Tra lis plui grandis – pal so valôr sientific grandonon – e je la scuvierte dai rilêfs assîrs: «Lavorâ sul cret che al va in fruçons, gjavant vie la tiere cun imprestuts di len e viodi vignî fûr lis sacumis sot, al è stât emozionant». Al pâr dal cjatâ un cuarp di un om cul so furniment preziôs jentrant intune tombe a cjamaris di modons cuets, dal tierç mileni prime di Crist, te necropoli curde di Tell Gomel, cence savê ce spietâsi, parcè che la archeologie, e dîs Katia, e je cussì: «No tu sâs mai ce che tu cjatis, a voltis nie». Tant che i à sucedût daspò vê sgjavât a dilunc un “kurgan”, tipiche tombe monumentâl in piere di 20 metris di diametri, in Gjeorgjie: vueide!
La vite di archeolighe orientâl no je facile. «Mi puarte a stâ lontane di cjase e dai afiets par tant timp – sù par jù cuatri mês ad an – e a vivi dispès in cundizions precariis, par esempli cul bagn in zardin tant che in Gjeorgjie, cence aghe corinte in cjase, cu la eletricitât che e va e e ven e cualchi volte che e mancje ancje par zornadis interiis, tra ragns e sgarpions tant che in Sirie, li che o soi stade a stâ intune cjase di pantan, su la tiere batude, parcè che nol jere paviment, e si lavavisi cu la aghe dal Eufrate. E po si vîf in 15/20 personis intal stes edifici. Cheste vicinance sfuarçade e je, però, une esperience uniche che e fâs nassi ancje amiciziis profondis. Il spirt di grup e la armonie a son fondamentâi in chest lavôr, che al è di scuadre».
In Kurdistan, vie pal Istât stât, la svee e sunave adore par Katia, aes 4, «par podê lavorâ cul fresc almancul lis primis oris de matine, e parcè che tal dopomisdì o vin di documentâ ducj i reperts, sistemâ i diaris di sgjâf, studiâ pe zornade che e ven – e spieghe -. O partivin tor 4 e mieze e o rivavin sul sgjâf tor 6. A misdì e mieç sù par jù o tornavin a cjase e dopo vê polsât, si tacave a lavorâ sui materiâi cjatâts». A diference di cui che al lavore in Italie che, dopo dal sgjâf, che par solit al dure un pâr di mês, al à dut il rest dal an par studiâ i reperts che a vegnin conservâts intai museus o in cualchi magazen, «nô no vin cheste oportunitât, duncje intai mês che o sin vie o vin di cirî di documentâ il plui pussibil, parcè che dopo i ogjets rinvignûts plui significatîfs a van tai museus locâi e par tornâ a viodi i materiâi a son dispès problemis, trafilis burocratichis lungjis e bêçs di paiâ…». Chei altris reperts a restin te abitazion dai ricercjadôrs par jessi studiâts dilunc des missions invernâls. Katia – intant che al è in distribuzion chest numar da “La Patrie dal Friûl” – e je in vore a Dohuk, a 20 chilometris dal sît archeologjic di Faida, sui creps rinvignûts.
In sumis, lavôr e vite in situazions al limit, dispès politichementri in ferment, tra tensions e aiar di vuere, e cun di plui cence vuadagn, o pardabon pôc. Sì, parcè che lis paiis fissis, par cui che al fâs il mistîr di archeolic in Italie, a son une chimere. «Ti va ben cuant che tu âs un assegn di ricercje, che al dure pôcs mês – e conte Katia -. A mi lis Universitâts di Udin e di Vignesie mi fasin cualchi contratut, ma no ai un stipendi fis e no ven paiade cuant che o voi in mission. O soi spesade par mangjâ e durmî e pai svoi, ma no ai vuadagns, scuasi nissun ju à. Se tu vierzis bec su chest cantin, ti disin che chel che tu fasis ti permet di scrivi il to non su publicazions che ti coventin par lâ indevant a nivel academic. Ma cul tornâ sientific no si mangje e cussì tancj a bandonin chest mistîr o a tachin a lavorâ pes cooperativis archeologjichis li che, però, a fasin dome i manoâi par cont di altris. Jo o soi fortunade. O soi fie uniche e la mê famee mi à simpri judade par che o podès puartâ indevant la mê passion. Il lavôr di archeolic – cun dutis lis dificoltâts che tu âs di frontâ – tu lu fasis dome se tu lu amis».
E Katia lu ame al pont che il so avignî lu viôt simpri tal cjamp de archeologjie, a sporcjâsi lis mans di tiere e di storie, magari – jal augurìn – cun cualchi sigurece di plui. ❚
