Copant il Stât patriarcjâl la Serenissime nus à gjavât par simpri dutrine e simbui che a vignivin di lontan e che a fondavin lis nestris lidrîs
Ma daûr di ce che nus conte la Storie, ce mai varessino duncje pierdût cu la muart dal Stât patriarcjâl? La liste e je lungje e il corot grivi devant di un cuarp smorseât che al stente a murî, stant che la storie de Patrie e je antighe: e scomence une vore di secui prin di chel 3 di Avrîl dal 1077, cuant che Siart al fo infeudât di Indrì IV tant che Pastôr e Princip.
La fonde e je ben plui lontane: e à i colôrs dai mosaics di Acuilee, la dotrine gnostiche di une comunitât che si cjate a jessi dutune cun chê di Alessandrie di Egjit, coltivant un rituâl che al intarsie insiemi lis sugjestions dai mîts dal Mediterani orientâl cu lis maraveis vignudis jù des fumatis dal Baltic, par no fevelâ di chê misteriose risonance arcaiche, iliriche, siitiche, celtiche, rimpinade su pes culinis dai tumui, des tumbaris e dai cjastelîrs de protostorie, inmagade dal cjant dal diu panceltic Belen, protetôr di Acuilee, sculpide jenfri i crets di une tiere mari là che i Ebreus levantins le àn fate cristiane, i Gôts e i Langobarts gjermaniche, i Carantans slave.
Une tiere che à savût resisti a Carli il Grant, cuant che al pretindeve di fâle gregoriane e romane, scombatint cu la potence e insiemi cu la delicatece dal so cjant patriarcjin, une armonie che il grant Jeroni il Sant al sintive sunâ “uti chorus Beatorum”, ven a stâi tant che un cjant di Paradîs: une liturgjie scjampade ae riforme che e meteve dacuardi il Pape e l’Imperadôr di Acuisgrane, rimpinantsi su pai crets de Cjargne, inte bielece severe e sacrâl des sôs plêfs di piere e di lûs, propit là che e à continuât a vivi fintremai in dì di vuê graciis ae buine volontât dai predis di Glesie Furlane, in primis pre Josef Cjargnel, di pôc tornât a cjantâle insiemi cui agnui, un tic plui in alt de tor di Guart. Une tiere che, a bon pro di une pergamene imperiâl bolade di Oton II, e je jentrade intune dimension europeane ancjemò prime che la Europe e esistès, contribuint anzit a poiâ la fonde de sô civiltât e culture.
E juste par insisti sul aspiet de dutrine, o vin pierdût il nestri Credo aquileiês, ven a stâi un Synbolum tant biel, profont e comovent che la Glesie di Rome e à fat di dut par scancelâlu. Mi riferìs in particolâr ae “apokatastasis”, une peraule dificile par esprimi une veretât maraveose: la convinzion che la gjonde e la bielece di une fieste e sarès distudade se ancje un sôl al fos escludût, parât fûr, tignût lontan. E ce insegnament profont, urgjent ancje pai nestris timps, peâts ae celebrazion de indiference pai tibiâts, pai no volûts, pai escludûts, pai triscj che noaltris, bogns e juscj, o vin miôr tignî lontans de nestre taulade di amîs, passûts e braurôs di ogni nestri privileç che no volìn condividi cun nissun altri di là di nô stes! Stant a cheste convinzion profonde, la lungje gnot che e ven daûr dal sacrifici dal Crist, copât su la crôs il vinars sant, une gnot infinide, sconsolade, plene di marum e di pôre, dilatade intun timp che al dure trê dîs, e ven passade dal fi di Diu intal lûc plui lontan, orent, crudêl e disperât che si puedi imagjinâ: l’Infier. Li l’Amôr plui grant al perdone, si comôf, al sint fuarte la pene. E la fuarce di un sintiment cussì universâl, cosmic, rigjenerant e rive a puartâ la lûs ancje dulà che mai si pensarès di podêle viodi. Ancje l’Agnul dal Riviel, il grant Nemì, il Diaul cu la sô schirie di antagoniscj al ven perdonât. Tant che gotis di aghe di risultive, lis animis i van daûr al Crist jenfri lis venis de tiere imbombant ogni fîl di jerbe, tal cidinôr di une oscuritât che e spiete la lûs par jessi monde. E cussì, inte maravee de albade de Domenie di Pasche, propit chê lûs e fâs evaporâ la rosade di chei spirts che no saran mai plui maledets, ma benedets dal Perdon e dal Amôr. L’Infier, dal dut disvuedât, al restarà dome che un ricuart di un timp sbaliât. Ancje cheste profonditât e ven gafade, scancelade di chel annus horribilis, cuant che la bandiere di Vignesie si è sglonfade cul buerin che al tire des nestris bandis. E je vere, la diocesi dal Patriarcje e va indenant a esisti. Almancul fin ai 6 di Lui dal 1751, cuant che il Pape Benedet XIV, stiçât propit di Vignesie, al firme la bole Iniuncta nobis, là che si pant la certificazion uficiâl de sô muart. E no stait a dîlu ae Assessore ae culture de Regjon, se no e à bielzà pronte la idee pal “bant culture” dal prossim an: la celebrazion dai 270 agns di chest event straordenari! ❚
