Chest an la Fieste de Patrie no sarà une fieste. La muart e tuche tes nestris puartis e par chest o vin di stâ sierâts dentri. No podìn vierzi lis puartis, ma ben spalancâ i barcons e picjâ fûr lis nestris bandieris, parcè che se al è un moment là che bisugne strenzisi ducj insiemi tant che une comunitât, al è propit chest. Mai tant che cumò nus covente une condivision plene dai valôrs che il simbul de nestre bandiere al puarte cun se: fuarce, orgoi, determinazion, serietât e solidarietât. Peraulis? No, fats che a àn cjatade conferme intai numars. Prin di dut, chei di un scrutini che al mostre clâr che i furlans a son stâts, in cheste fase di emergjence, la comunitât regjonâl che e à rispietât cun plui rigôr lis normis che il guvier al à metût in vore. Salacor al è propit chest sens dal dovê di judâsi l’un cul altri che fin cumò al à fat segnâ in Friûl mancul vitimis che in altris areis de Italie. In gracie de straordenarie opare dai miedis e di ducj chei che a lavorin te organizazion sanitarie, te protezion civîl, des fuarcis dal ordin e dai volontaris che a judin chei che a son in dificoltât, o stin frontant chest nemì invisibil in maniere responsabil, sparagnant une vore di vitis.
◆ Cheste solidarietât e nas de memorie di ce che o vin scugnût vivi za in altris moments de nestre storie. O stin fasint miôr che si pues, come che o sin rivâts a fâ tal 1976, mostrant a ducj ce che al è di bon sot de nestre scusse. In chê volte o sin jessûts des maseriis cul cjâf e no cui pîts, fasint sù prin lis fabrichis, po lis cjasis: lu vin fat parcè che invezit di spietâ di jessi imboconâts dal Stât o vin cirût daurman di cjapâ in man il nestri destin. Il Stât e tancj benefatôrs di dute Italie e ator pal mont nus àn fat rivâ un grant jutori. Nô o vin podût sielzi e fâ di bessôi, e il “model Friûl” al è sot dai voi di ducj. O sin rivâts a fâlu parcè che o vin podût stâsi dongje.
◆ Cumò, tal 2020, fisichementri, no podìn stâsi dongje. Stâ di bessôi e je une necessitât, par salvâsi la vite. Fâ di bessôi lu deventarà, doman, par ricostruî un contest economic che al jessarà disfat dal bloc totâl causât dal coronavirus. La situazion e sarà compagne par ducj, ma i jutoris si concentraran su lis zonis plui colpidis e alore o varìn di fâ par fuarce di bessôi cun ce che o varìn a disposizion. Al è dibant niçulâsi te sperance che cheste volte il Stât nus judi pardabon. Anzit, nol sarà di straçâ intune clâf assistenzialiste chel pôc che al rivarà. Al sarès un fal une vore grivi. Cheste crisi di fat nus darà a ducj la misure di ce che o sin, come oms e come furlans. Par chest, a coventaran judâts prin e di plui chei che a varan plui bisugne, int e impresis: no son scusis. Puars mai nô se o larìn a reclamâ daurman jutoris a ploie, un got par om. No saressin “gotis di salût”, ma dome une ultime ocasion di dâi di bevi a un teren arsît, che za di plui di dîs agns al sofrìs di une pierdite bocone di competitivitât e cumò al à bisugne di soluzions gnovis par tornâ a fâ cressi alc. No si pues dome meti blecs, si à di pensâ a un plan che al meti al prin puest il lavôr par ducj, no i piçui interès di ognidun. La prime strade e pues regalânus un doman, la seconde e sarès il sassini des nestris sperancis tal avignì e te nestre comunitât, che nancje il virus fin cumò al è stât bon di pleâ. ❚
