Il Coronavirus, tant che il taramot dal 1976, al puarte corot e patiment ma, in mût diviers di in chê volte, al colpìs un tiessût economic e imprenditoriâl interessât di une decressite infelice che e cjape dentri dut il Friûl. Une aree che e rapresente plui o mancul l’85% de popolazion residente tal F-VJ e, in reson di chel, di dutis lis macrovariabilis plui impuartantis. La decressite infelice, di fat, si pant tal ridimensionament significatîf dai valôrs dal redit prodot de economie, des esportazions, de ocupazion e des presincis turistichis furlanis. Ducj fondamentâi macroeconomics che a van in mût net in piês se o considerìn dome la ex provincie di Udin. L’Orcolat, invezit, al jere stât frontât e batût parcè che il sisteme economic furlan al jere in cressite fuarte. Parcè? La sô imprenditorie e jere vivarose, cussì come lis fuarcis politichis di chel periodi, i sindics e i sindacâts. Il segret di chel sucès? Un elisîr portentôs: la unitât dai intindiments, l’obietîf (condividût di ducj) di rilanç, la vuide furlane dal procès intîr, il racuardi cul nivel talian e lis risorsis che il Stât al meteve a disposizion. I compuartaments di in chê volte? La Regjon Autonome e continuave a davuelzi la sô azion di indreçament dal disvilup economic e sociâl midiant di un decentrament savi, lassant la gjestion dai intervents ai Ents Locâi. I imprenditôrs a àn continuât a fâ il lôr mistîr cence vaîsi intor e cence gjavâ risorsis a fameis e lavoradôrs. I sindicâts a àn contribuît a realizâ il sproc “prin lis fabrichis, e po lis cjasis e lis glesiis”. Dal pont di viste legjislatîf e operatîf si son dadis la volte cun ordin e determinazion lis fasis de emergjence e chê dal disvilup.
◆ Vuê, intal Avrîl 2020 a son dôs robis di domandâsi: 1) isal un barlum di cussience de grivie “decressite infelice” furlane?
2) Ise ancje une minime idee di meti man cun urgjence a un plan pal rilanç dal Friûl? La rispueste, magari cussì no, e je dôs voltis negative. Non si viôt nancje un fregul di barlum. I “tamonîrs” des Zontis dal gnûf mileni a àn orientât il belanç de Regjon viers infrastruturis e intervents inutii e/o fantasiôs ma simpri ultracostôs che a àn inmiserît cussì la nestre cjare autonomie. Esemplis? La regjonalizazion de sanitât cuntune spese di plui di 1,1 miliart dal belanç regjonâl; il Coridôr european numar 5 (par fortune no realizât, ma trop timp e tropis energjiis no sono lâts pierdûts!); la tierce corsie de autostrade A4, doprade di dute Europe ma fate sù cun 2,1 miliarts di euros dai citadins di cheste Regjon; il compart unic dai dipendents publics F-VJ, costât passe 600 milions; la riforme dal turisim sot dal segn dal “dut public, dut gratis” costade plui di 250 milions; la trasformazion de finanziarie di svilup publiche Friulia spa intune holding speculative (… ma in pierdite!); la publicizazion di Mediocredito Fvg con pierditis e ricapitalizazions pluri-centi-milionaris e simpri cjamadis su lis sachetis dai furlans; l’abatiment dal debit public regjonâl in timp di crisi, no domandât dal Stât, che però nus à gjavât plui di un miliart che al podeve judâ il nestri sisteme produtîf; il disgraciât pat Tremonti-Tondo dal 2010 che nus è costât, fin cumò, 2,7 miliarts di euros. In sumis, in totâl diviers miliarts di euros (no miârs, no milions, MILIARTS) butâts a slas invezit di finalizâju ae cressite economiche, al lavôr, ae formazion e al Welfare.
◆ Ce us parial, se confrontâts cui 30 milions stanziâts par frontâ la emergjence provocade dal Coronavirus? Bêçs, par altri, gjavâts pe plui part di altris cjapitui di belanç. Dut câs, purtrop, al è ben di plui (o miôr, si varès di dî, al è ancjemò di mancul). Ven a stâi, il “nanisim politic” de aree furlane che al impedìs la rivendicazion di un “Plan pal Rilanç dal Friûl” par jessî fûr dal taramot economic e sociâl provocât de decressite infelice che e à colpît tal cûr cheste aree.
◆ Cemût si fasial a superâ la emergjence di cumò, ma cuntune vision ancje pal medi periodi? Il colp dal Coronavirus al varès bisugne soredut di un intervent a nivel talian, che il Stât al sta metint in vore par tutelâ e sostignî i lavoradôrs. Ma il rilanç de aree furlane al varà bisugne di un sfuarç suntun arc almancul di 3-5 agns: e a pensâlu e coventarès une Conference patrocinade de Universitât dal Friûl e vierte a dutis lis rapresentancis associativis, istituzionâls e politichis. Il so obietîf al varès di jessi prin di dut chel di condividi une analisi realistiche e oneste de situazion, par rivâ a meti lis fondis par un Plan di pueste, e determinâ lis risorsis necessaris a alimentâlu, individuâ lis strategjiis justis par vê un confront colaboratîf cul Stât par definî i imprescj juridics e la entitât di risorsis finanziariis di sô competence. Il secont teme al è dut câs chel di cjatâ une soluzion istituzionâl al “sot vueit furlan” lassât de margjinalitât dai Ents intermedis che a àn cjapât il puest des ex provinciis: cumò, di fat, a contin dome il “Palaç” regjonâl (che nol pense masse al Friûl) e Triest citât metropolitane. Cjatâ la soluzion al vûl dî sclarî ancje cuâl che al è il sogjet just par puartâ indevant la propueste di chest Plan tant necessari. Che al è dut fûr che un progjet antitriestin, parcè che Triest al à za realizât il so asset istituzionâl e al è za lât indevant cul so progjet par rilançâsi. La uniche soluzion pussibile e je une Regjon Autonome (che e je za) cun dôs provinciis autonomis (che a son di fâ) sul model Trentin-Sudtirôl (che al è garanzie di sucès). Une provincie dal Friûl (Gurize, Pordenon e Udin insiemi) e la provincie di Triest no son une sielte di cjampanilisim, ni di inimicizie, ma la uniche maniere par che il Friûl al torni a jessi finalmentri responsabil e protagonist dal so destin. ❚
