La gjornaliste e sinolighe di Glemone: “Indevant te sience, indaûr tai dirits”.
Intal so libri vincj agns di esperience intun Paîs decisîf sul senari globâl

Dal 2002, l’an che Giada Messetti e rive pe prime volte a Pechin come studentesse, al 2020, l’an de Surîs screât cul coronavirus, la Cine e je cambiade une vore. «O vevi 21 agns e mi visi ancjemò dal dormitori li che o soi stade par 5 mês: grisons tal jet, bagn in comun par 40 personis e tant frêt par vie dai sieraments sclendars – si impense la gjornaliste e sinolighe glemonate -. Mi soi rindude cont subit che al jere un Paîs cetant diferent di chel che un al podeve imagjinâsi. Al è ancjemò cussì, ancje se Pechin e la Cine no son plui chei dal 2002». E Giada, che te Republiche popolâr cinese e à vivût 6 agns dopo de lauree in Lenghis orientâls te Universitât di Vignesie, lu sa ben. Messetti – che e à colaborât cui uficis di corispondence di Rai, Corriere della Sera e Repubblica – e à podût indagâ di dongje lis contradizions dal Imperi Celest e la sô cressite sfolmenade viers obietîfs di modernitât simpri plui ambiziôs. E cumò ju à contâts tal saç divulgatîf “Nella testa del Dragone – Identità e ambizioni della Nuova Cina”, publicât de Mondadori, che al fotografe il presint e il futûr di un Paîs simpri plui decisîf sul senari globâl, un mont che al è dibant cirî di capî cun voi ocidentâi.

◆ «La Cine è a dîs, cent, mil musis: tu puedis cjatâti te vile ferme ae epoche preindustriâl, ma ancje vioditi rivâ un dron che ti ordene di metiti il casc intant che tu sês fer cul motorin tune crosere in citât. I miei agns in Cine mi àn formade a vê viertidure mentâl, a contestualizâ e a relativizâ. Al è un esercizi dificil par nô ocidentâi, ma impuartant». E necessari, parcè che ancje se o sin lontans di un pont di viste fisic e culturâl, no lu sin chel economic. «In chestis setemanis si è fevelât un grum cence pensâ de Cine e dai costums dai cinês tant che se a fossin bogns dome di mangjâ surîs vivis e gnotui a gulizion, gustâ e cene! E pûr, la Cine par une vore di aspiets e je tant plui indevant de Italie: sul ûs de robotiche, de inteligjence artificiâl, dal ricognossiment faciâl, de racuelte dai big data. E je une vore plui digjitalizade. O savìn pôc e nuie di ce che al sucêt là, ma dal sigûr nus tocje ducj. Il coronavirus lu à dimostrât. La Cine e je un Paîs ambiziôs e e sta puartant indevant une sfide cui Stâts Unîts par rivâ ae leadership mondiâl. Chel che e fâs, di fat al interesse ancje il nestri avignî». Ve alore, che tal progjet de gnove Vie de sede, che al varès di cjapâ dentri ancje il puart di Triest, «al sarà impuartant capî ben cuâi che a son i vantaçs e i svantaçs di cheste operazion enorme, par no colâ te vuate di jessi controlâts dal colòs cinês».

◆ Une locomotive economiche globâl impressionante, ma che in merit al rispiet dai dirits umans, des minorancis etnichis, religjosis, politichis, di garanziis democratichis di base e di cuistion di gjenar, e à ancjemò tante strade di fâ. «La sience e la tecnologjie a son in man ai oms, e la politiche compagn, tant che in Italie da rest. Tai prins doi cjamps, la Cine si è impegnade a rivâ aes cuotis rose dal 35 par cent tal deceni 2010-2020, e po a son tantis imprenditoris di sucès. Fin a 15 agns indaûr, une femine di 25 agns cence om e fîs, pe plui part de int no jere realizade, cumò nol è cussì, ma lis contradizions a son tantis, tra emancipazion e condurâ dai blocs di une societât tradizionâl e patriarcjâl». A pesâ maniere negative su la imagjin de Cine e je ancje la cuistion dai popui scjafoiâts dal guvier centrâl, ossessionât di garantî la stabilitât e la indivisibilitât dal Paîs, cu la lungje ocupazion e distruzion dal Tibet e de sô culture e la repression violente dai uigurs, indegnis di un Paîs civîl. «Te regjon dal Xinjiang a son centenârs di cjamps di rieducazion là che a son sieradis desenis di miârs di uigurs par motîfs etnics e religjôs. A son formis di control e persecuzion che no si puedin acetâ».

◆ Cumò che e vîf a Rome – dopo cualchi an a Milan -, Giada Messetti e continue a studiâ la Cine, fasint di mediatore par events e cunvignis e di opinioniste in radio e television su temis che a tocjin il Paîs che le à inmagade. Pal avignî, i plasarès rivâ a inventâsi un lavôr che al meti dongje la sô esperience di comunicadore cu la passion e cognossince pe Cine, fasint di puint tra lis dôs culturis intun moment li che «al è fondamentâl imparâ a cognossisi par rispietâsi tes propriis diferencis». Par intant e fâs la autore par “#Cartabianca”, il program in onde su Rai3 di e cun Bianca Berlinguer, une des tantis figuris che a àn segnât il so percors uman e professionâl. La sinolighe Renata Pisu e je stade un pont di riferiment; Massimo Cirri, dal program di Radio2 “Caterpillar”, che le à clamade de Cine a fâ la corispondente, i à fat vignî gole di tornâ in Italie; Daria Bignardi le à inviade, insegnantjal, al mistîr di autore televisive. E prime di ducj, Bruno De Marchi, il professôr de Universitât Cattolica di Milan che al veve puartât a Glemone il Laboratori internazionâl de comunicazion, e che a Giada, fantacine di 11 agns, i veve comissionât un articul. «Al è stât il prin – e conte – a vê dade fiducie ae mê capacitât comunicative». Chê fantacine a ‘nd à fate di strade di cuant che si rimpinave sui arbui e che e coreve libare pai prâts sot dal Cjampon. Ma no à mai dismenteât il so Friûl e il paîs li che e je cressude. «Ogni volte che o torni, o voi a fâ il Troi dai Cinccent. Cuant che o rivi insom, o viôt Glemone, Osôf e il Tiliment e dut al va a puest. Il Friûl al è la mê cove, il puest che mi fâs stâ ben». ❚

Giada Messetti. Il profîl

Giada Messetti (te foto in bande), nassude a Udin tal 1981, dopo la lauree in cinês ae Universitât di Vignesie, tal 2005 si trasferìs a Pechin dulà che e lavore pes testadis talianis principâls (Rai, Corriere della Sera, Repubblica, Radio Popolare, Diario). Tornade in Italie intal 2011, e colabore cun diviersis trasmissions radiofonichis e televisivis, tant che “Crozza”, “Zeta”, “Caterpillar”, “Ovunque6”, par po rivâ ae scriture televisive colaborant, fra chei altris, cun Daria Bignardi a “Le invasioni barbariche” e cun Beppe Severgnini a “L’erba dei vicini”. Cumò e je autore dal program di e cun Bianca Berlinguer “#Cartabianca” in onde su Rai3. Cun Simone Pieranni, e à ideât il podcast su la Cine “Risciò”, disponibil su lis plateformis principâls di streaming. Par Strade Blu Mondadori e à publicât “Nella testa del Dragone – Identità e ambizioni della Nuova Cina”.

Tal Shhaanxi su lis olmis dal von Basilio Brollo

Partide di Glemone cuntune borse di studi de Republiche popolâr cinese, Giada Messetti e je lade su lis olmis dal von, Basilio Brollo, il missionari francescan glemonat jentrât te storie par jessi stât l’autôr dal prin vocabolari cinês-latin.

◆ «Fin di piçule, o ai sintût a fevelâ di lui – e ricuarde Giada -. La mê proagne e gno nono bis, de bande de mame, a vignivin clamâts simpri tes cerimoniis par memoreâlu. Cussì, cuant che o ai vût di sielzi l’argoment de mê tesi, o ai pensât ben di lâ insot tal studi di chest parint lontan che al è stât tra i prins a cirî di imbastî un puint tra dôs civiltâts cussì diferentis».

◆ Basilio Brollo al nas a Glemone tal 1648. Ordenât a Vignesie tal 1674, daspò vê insegnât filosofie e teologjie, al domande di unîsi a un trop di missionaris francescans destinâts al Orient estrem. Tra le “genti senza fine, terre senza confine” che al scriveve tune letare ai siei, Brollo si svicine al idiome cinês par necessitât che po e mude in interès, tant che tal 1694 al finìs la sô opare di traduzion par latin di 7 mil ideograms cu la relative pronunzie. Un lavôr di no crodi, che cualchi an dopo Brollo al integrarà e che, passe un secul daspò, i francês a stamparan, ma cence citâ l’autôr. La denunzie par plagji e comedarà lis robis, ricognossint al frari furlan il merit di vê tacât i studis sinologjics a soreli a mont.

◆ «In Cine, tal Shhanxi – la provincie di Xi’an, la antighe citât imperiâl e dal esercit di arzile – che Brollo al jere stât vicjari, o soi lade a cirî la sô tombe – e conte la sinolighe -, ma no le ai cjatade: e jere lade pierdude dilunc de Rivoluzion culturâl cuant che monuments e lûcs di cult a forin sdrumâts e fiscâts». ❚