Cu la nomine di Paolo Patui a diretôr e je pronte a partî la gnove realtât che e varà di valorizâ la nestre dramaturgjie
Moments critics chei che o sin daûr a vivi. E cuant che o rivarìn a puartâle fûr, bisugnarà fâ i conts cu la lavine economiche, e viodi ce che si rivarà a tirâ sù dal foran profont indulà che a saran coladis dutis lis ativitâts. Fasint riferiment ae opare di Márquez, plui che fevelâ di “amôr”, al sarès il câs di preocupâsi pal “lavôr ai timps dal coronavirus”, viodût che lis misuris cjapadis dal guvier a rivaran a malistent a concedi une bocjade di aiar. Jenfri lis categoriis plui segnadis, a jentrin i lavoradôrs dal mont dal spetacul, che a son stâts i prins a jessi blocâts in cheste epopee di decrets e di ordenancis. Par musiciscj e atôrs al sarà dificil di rivâ a recuperâ dutis lis datis ladis su pai stecs, e cualchidun al varà di tirâ la coree almancul fin ae prossime Sierade.
◆ Intal senari locâl, dut câs, e je une gnove che e varès di fâ un pôc di lusôr intal avignî dai spetacui in lenghe furlane, stant che decisions impuartantis a son stadis cjapadis dentri dal Teatri Stabil Furlan, chel progjet di Nico Pepe (e puartât indenant di Bepi Agostinis) che, biadelore, dopo 40 agns di aparizions fantasimis al somee jessi rivât adore a cjatâ une sô sacume definitive.
◆ Come che us vevin za contât (La Patrie dal Friûl, Avost dal 2019) la associazion “Teatri Stabil Furlan” e jere nassude l’Istât passât, su sburt de Zonte dal Comun di Udin, adun cu la fondazion “Teatro Nuovo Giovanni da Udine”, ARLeF – Agjenzie Regjonâl pe Lenghe Furlane, Societât Filologjiche Furlane, Istitût Ladin Furlan “Pre Checo Placerean”, CSS Teatri stabil di inovazion dal Friûl-Vignesie Julie e cu la Academie Civiche di recitazion dramatiche “Nico Pepe”. Clare che la sielte dai sogjets e à fat saltâ sù la tarme a plui di cualchi realtât lassade fûr (e basti la letare scrite di MateâriuM – Servi di Scena), ma il president de clape, Lorenzo Zanon (za president de ARLeF e al moment president dal Istitût Ladin Furlan “Pre Checo Placeran”) al à subite rispuindût che la associazion no intint di jessi un organisim sierât, anzit, un dai obietîfs al è propit chel di cirî il confront, massime cun chês altris minorancis linguistichis. Plui preocupante, invezit, la reazion de Regjon, che se di une bande e à slungjade la man imprometint i fonts midiant dal Assessorât aes autonomiis locâls, di chê altre e à soflât cuintri, berlant che no son i bêçs (che però no son mancjâts par sglonfânus cun Leonardo). Lassant in bande lis polemichis (ancje se il detai nol è di pôc), ae fin dal an passât (ai 6 e ai 7 di Dicembar) il Teatri Stabil Furlan al à cjapade la ocasion par presentâsi al public intun Licôf, dôs zornadis di dibatiments e di spetacui al Teatri San Zorç, cul coordenament di Massimo Somaglino, in compagnie di esponents de culture furlane tant che Gianni Cianchi, William Cisilino, Francesca Gregoricchio e Paolo Patui. Sîs i filons cjapâts in considerazion: dramaturgjie contemporanie (omaç al Teatri Incerto), propuestis gnovis (MateâriuM), teatri di tradizion (“La casa” di Siro Angeli voltât par furlan), teatri par fruts (cui pipins di Michele Polo e di Patrick Platolino), adataments teatrâi (un progjet de Associazion Teatrâl Furlane su Gianni Gregoricchio) e traduzions (“L’ùali di Diu” di Miklos Hubay voltât inte variante de Val Pesarine di Carlo Tolazzi).
◆ Cumò, daspò di une valutazion atente dai 14 candidâts che a vevin rispuindût al avîs di Zenâr pe figure di diretôr artistic, il Teatri Stabil Furlan al à un gnûf tamonîr: Paolo Patui, un non che al à za dât tant ae culture di cjase nestre e che – in gracie de esperience madressude – al cirarà dal sigûr di direzi la nâf al miôr par chest an, fasint montâ sù ducj i sogjets che a lavorin za tal setôr, e lassant svoletâ lis velis bande il larc de inovazion, cence dismenteâsi de tradizion. ❚
