Andreoli e i lûcs comuns sul rapuart fra la inteligjence umane e chê artificiâl
Sul finî dai agns Setante tal tinel di cjase dai mei nonos al aparì un ogjet maraveôs: un Telefunken a colôrs imens, cun tant di telecomant. Li o ai scuviert che Paolo Rossi al veve une maie celeste e no grise, come sul Brionvega che o vevin in cusine; e la maie di Zoff e jere propit grise. Po al rivà un Goldrake sflandorôs ros e aur e o deciderin jo e la none che no varessin plui pierdude une pontade.
◆ Intune sene, Actarus al jere jù di suste e Venusia lu consolave disintji che ancje i robot a puedin vê sintiments. Masse par mê none: «Matteo, ma ti rindistu cont: cemût fasino i robot, che a son fats di fier, a vê sintiments?». Cidin. Mi si son vierts i voi. None Dorine mi veve smontade la idolatrie de ferace cuntune frase; a Vittorino Andreoli i è volût un libri.
◆ Andreoli, psichiatre di nomee mondiâl, si môf de osservazion che il computer al è une protesi dal cerviel, che lui al cognòs ben, e al decît di indagâ sul rapuart che al lee il cerviel di cjar a chel di silici.
◆ Inte jungle di 87 miliarts di neurons che a son te scjatule craniche, il miedi si môf tant che une simie su pai arbui: cun disinvolture al piture disvilup, caratars e potenzialitâts dal orghin che al à plui contribuît ae evoluzion dal gjenar uman. Al spieghe cemût che la cussience e definìs la identitât e che dome il sintiment nus permet di passâ de dimension individuâl a chê dal “altri”; che la imagjinazion nus lasse creâ un mont che nol è, ma che al podarès esisti propit parcè che o rivìn a pensâlu; che inte pietas e je une vaste culture, che si pant tal rispiet viers di cualsisedi nestri simil, soredut se al sta mâl.
◆ Jù pes distesis di silici, dut câs, ancje il psichiatre al çuetee. Al fâs fature parcè che, par sô amission, nol sa cemût che al funzione un cerviel artificiâl e i social network i son discognossûts. Si lambiche, inalore, jenfri lûcs comuns, banalitâts, falopis e stupideçs, come chei che a tocjin i presumûts efiets nefascj dal computer sul lengaç: a saressin in pericul il periodi ipotetic, lis frasis relativis, e i mûts e i timps verbâi diferents dal presint indicatîf. Chest davoi si siere cuntun senari distopic ben cognossûts a nô fantats dai agns Otante: l’om bionic, il cyborg di Blade Runner e Terminator e la fin de civiltât (Il Planet des Simiis). Ma come altris imprescj de mê infanzie, il zirediscs, il cubul magjic e il walkman su lis scufis di sponze, ancje chestis visions a son destinadis a finî tal nuie. ❚