Lussia di Uanis e il so gnûf audiolibri
Scritore, artiste, poetesse, ilustradore, cjantautore e regjiste. Lucia Pinat, in art Lussia di Uanis, che tancj e cognossìn par vê fat nassi i Trastolons e il moviment Usmis, nus conte la sô storie e e presente il gnûf librut che e à componût: La gnot dai muarts.
◆ Une vite dedicade ae bielece, ae musiche, ae espression, al sintiment e a la empatie. Lussia e je une creadore: «La piture e je simpri stade il mieç par esprimi ce che o ai dentri. O lavori il len, o fâs i mobii, o cusini e o lavori la tiere e l’ort. La mê salvece e je tes mans, che a crein e che a son il cûr de mê esistence»
◆ E preste la sô anime, la vôs e il cuarp par organizâ events di teatri, poesiis, leturis e musiche, insiemi a grups musicâi furlans e no, come K’Ramar, Ulisse e I Ciclopi e i Radiatori. E à publicât ancje un cd par Musiche Furlane Fuarte cun Eletrike Skeletriche Poetiche e e à condusût Tutto è Santo in onde su Radio Onde Furlane.
◆ Tai agns doi mil, daspò ve lavorât tes scuelis pe infanzie e tes primariis cun progjets creatîfs, Lussia e tache a curâ spetacui par frutins e par zovins. Come Flabis a mirinde, il program di storiis e di contis tradizionâls furlanis lât in onde cun Radio Onde Furlane.
Come che nus conte: «O ai scuviert che i fruts mi fasin provâ alc di maraveôs, mi si vierç cun lôr la puartelute dal cûr. O ai vût cheste fortune imprin graciis a Radio Onde Furlane, che i ai ancjemò tant agrât, e daspò parcè che o ai dât dute me stesse. Si viôt che cheste e jere propit la mê strade, ancje se dificile. La mê detule e je simpri stade “O voi drete pe mê strade stuarte”».
◆ Dopo libruts come Intal sac da fantasia, Il gjalut postin, Benrivâts tal Marimont!, L’arbul feliç, Gno von Bepopalon, e tancj altris, Lussia e à realizât l’audiolibri plui paurôs di simpri: La gnot dai muarts.
Une conte musicade, plene di sgrisui, par fruts cence pôre. Scrite par furlan, ilustrade di Giulia Spanghero e regjistrade intun cd cu lis cjançons e lis musichis di Ulisse Viezzoli, cu la colaborazion di Magdalena Schmied e Dominik Heizmann.
◆ La gnot dai muarts, publicât di Futura Edizioni, cul finanziament de ARLeF, si cjate tes librariis dal Friûl o su www.editoria.futuracoopsociale.it
Lussia e à simpri cualchi idee pal cjâf e pes mans, duncje par viodi ce che e cumbine di gnûf stait daûr su lis plateformis social, su Youtube e su www.soundcloud.com/lussiadiuanis ❚