“Pasche di ulîf si jes fûr dal nît”, si dîs sot Primevere, e si spere propit di podê gjoldile cheste Vierte che e je rivade. Di podê gustâle, lant ator pal Friûl a profitâ di dutis lis sôs maraveis. E se “un flôr nol fâs Primevere” come che e dîs la detule, la musiche no mancje di cjants dedicâts a cheste biele stagjon. Tornant duncje tal mont des vilotis, a ‘nd è tantis e bielis su chest sogjet. Tacant de famose “Plovisine” di Pietro Zorutti, musicade dal compositôr tumiecin Giovanni Battista Cossetti, dulà che «la nature va in amôr», come che al recite l’ultin viers. Ancjemò Zorutti, musicât in chest câs sedi di Arturo Zardini, sedi di Mario Montico, al conte di cheste biele stagjon in “Gnot d’Avrîl”, là che a un ciert pont al dîs: «Jé Primevere inamorade. Svole lizere spandine rosate cu’ la zumiele par la taviele».
Dut di Zardini, musiche e peraulis come che al jere usât, al è chest andantin: «Primevere benedete, l’è tant timp ch’i ti spietìn. Fâs florî la nestre tiare di un biel manto verdulin. Cussì quant la mê morôse va tal miez dal so zardin, ancje jé sarà ‘ne rose, mi dirà “Ven cà, ninin”».
◆ Une des plui cognossudis sul teme e je chê vilote – di autôr e no popolâr – che Gjso Fior al è rivât a discuvierzi cui che le à scrite, deventade famose prin di dut midiant de regjistrazion fate dal Côr di Comelians, direzût di Luigi Garzoni, pe cjase discografiche Odeon Fonotipa di Milan, che al coreve l’an 1930. Une cjantose scrite tal 1926 di un ciert “Pieri di Sandenêl” e che e tache cussì: «Jé tornade Primevere, cui soi mil e mil odôrs, dut il mont al mude siere, duc’ a tornin i colôrs».
◆ Di Luigi Nimis e Alcide Bujatti e je “Cisilute d’Avrîl”, e inte tierce strofe si sint: «Ti spietavin duc’, morute, par sintî la nuvitât. Che je cà la Primevere, che l’Inviâr al è passât».
Tante poesie in dutis chestis cjantadis, sore di melodiis ispiradis, in forme di vilote, par un cjant che al pues jessi eseguît – come che si sa – sedi di soliscj che in forme corâl. Diviers côrs furlans a àn in repertori une altre cjantose cognossude sul argoment, o ben “La viarte” di Gian Battista Gallerio e Luigi Garzoni: «Dopo in cà che ti sospiri, che ti clami da lontan! Benvignude sisilute, benvignude ancje chest an». Cussì e tache e, come ta chês altris cjançons, al è dut un florî, l’aiarut lizêr intes campagnis, gnûfs colôrs, serenitât, ucieluts, rosignûi, sisilis, paveutis e la biele furlane, dispès viodude tant che une moretine, tal prât a cjapâ sù garofui e altris rosis. Come che e recite une des vilotis citadis: «Cuant che il cuc di tra lis fras’cis la sô nenie al mole fûr, co la gnòtule pe vile ven a dî che si fâs scûr. Ciante, ciante, rusignûl, lis belezzis dal Friûl». ❚
