“Avrîl dolç durmî” al dîs un proverbi. Un proverbi talian, naturalmentri, che in furlan nol à traduzion: nissun vêr furlan, di fat, al pues pensâ che durmî al sedi une robe biele. Par jessi sigure, o ai controlât ancje sul dizionari di furlan e ce che par talian si disarès “dolç fâ nuie”, par furlan al è dome “stâ cence fâ nuie”: il dolç lu vin gjavât, che al fâs mâl. E stant che un altri proverbi talian al dîs che “cui che al duar no cjape pes”, e che Avrîl al è ancje il mês dai “Pes di Avrîl”, cul no durmî tu puedis ancje sparagnâti cualchi mateç. In sumis, ancje in Avrîl dimostre di jessi furlan: sta dismot.
I sants dal mês
Par dute la prime part di Avrîl, si festeze San Zion, cjastiadôr di chei che a van ator invezit di #stâacjase in cuarantene. Par dut il mês, o preìn ancje San Itât, che nus vedi in gracie.
Personaçs nassûts in Avrîl
Jacopo Stellini, nassût ai 27 di Avrîl dal 1699, protetôr des versions di grêc e di latin. Toni Culasêt, chel che à dât il non ae omonime ricete di salam, ancje se di fat nol è stât lui a inventâle. Pôcs a san che, sul imprin, nissun taiave il salam a fetis: si lu mangjave intîr. Al è stât Toni Culasêt a vê la intuizion: miôr taiâlu! Cuant che sui prins libris di cusine furlane e je vignude fûr la “ricete dal salam Culasêt”, cualchidun al à fat confusion, fasint nassi la ricete atuâl.
Il sport dal mês
Stâ a cjase e lavorâ tal ort. Propit come che al faseve l’om di Buri, che al varà ancje copât sô agne, ma almancul no i à tacât il virus.
Apontaments
Il prin di Avrîl, un pes di Avrîl! Cualchi idee?
Invidâ i amîs a une purcitade vegane.
Contâ che, dopo dal Tocai, i Ongjarês a àn rivendicât ancje il non dal frico.
Lâ a Triest e dîur che il guvier al à decidût di fâ une setemane cun siet dîs di vore.
Lâ in Friûl e dîur che il guvier à decidût di fâ une setemane cun siet dîs di fieste.
Ai 3 di Avrîl, fieste de Patrie dal Friûl. No, no il gjornâl, propit la Patrie. E stant che e je une fieste furlane, par festezâ si va a vore.
Ai 12 di Avrîl e je la domenie di Pasche, e la dì dopo… induvinait! Just! Il lunis di Pasche (ce intuit!). Chest an, par cui che al va pai cjamps a fâ ghiringhel, une sorprese: tu crodis di lâ a cjace di ûfs dûrs, invezit tu cjatis il coronavirus! Duncje, #staitacjase.
Chest an o vês ancje la scuse pronte par ducj chei che us domandaran “alore, ce fâstu lunis di Pasche?” ❚