I presidents democristians no jerin autonomiscj,
ma a rivarin instes a doprâ la specialitât.
E cumò i sorestants ce pensino di fâ?
E je nassude tarde, intal 1964; e veve mancul bêçs di chês altris, e jere guviernade di democristians clientelârs e temerôs di Stalin, ancje se za muart, ma la Regjon F-VJ e à fat il so biel lavôr di tirâ sù agriculture, industrie e artesanât fruçadis dai doi events belics dal secul. Il “miracul economic” al jere rivât ancje in Friûl e al jere daûr a sestâsi, cuant che il taramot dal ’76 al pareve che al fos rivât a scancelâ dut.
◆ Nol è stât cussì, anzit il model Friûl de ricostruzion al à permetût di amortizâ lis crisis dai agns ’80 e si è trasferît, cuntune cierte energjie, intai agns ’90 dai distrets produtîfs teritoriâi e de prime globalizazion. La economie e à tignût dûr fin sul tacâ dal gnûf secul, ma aromai e scomençave a basâsi soredut su la rendite e sul marcjât imobiliâr. Dal 2008 incà, il patatrac.
◆ I nestris “30 gloriôs” a son stâts gjestîts, di un pont di viste politic, di trê Presidents de Regjon che ancjemò no si clamavin governadôrs e che ogni dì a vevin di vuardâsi des vuatis internis dal propri partît e des imboscadis preparadis dai socialiscj.
O crôt che clamâ autonomiscj Berzanti, Comelli e Biasutti e sedi une peraule gruesse, ma a dopravin i struments de specialitât pai lôr fins politics che, almancul par ce che al tocje l’economic e il sociâl, a coincidevin cun chei dal mitic popul furlan, “salt, onest e lavoradôr”. La identitât e jere soredut folclôr, magari ancje sentinele bande il mont “todesc e slâf” ma, se tra i agns ’60 e ’70 cualchi esaltât al invente la furlanetât tant che fat politic e istituzionâl, in fin dai fats ancje cheste e je une buine ocasion par provâ a fâ casse a Rome.
◆ Triest al fâs part de Regjon. Citât sacre ae Italie, e vai e e incasse industriis publichis e Fondo Trieste. Dopo, intal ’78, il riviel cuintri dal Tratât di Osimo e il refudâsi di deventâ un paradîs fiscâl e produtîf. A coventin altris ideis e sovenzions, la Regjon e à di meti tant di so, e nas la Aree di Ricercje, il Sincroton e chê che e je vuê la “citât de sience”. Lis industriis a sparissin e il puart al pâr inneâsi, fruçât di Cjaudistrie, fin che D’Agostino nol rive a tornâlu a inventâ puartantlu fûr des sgrifis dai laris di marmelade. Al nas e si costituzionalize il sium de citât metropolitane, magari ancje par rispuindi a cui che al à scuviert che il TLT nol è mai muart.
◆ O sin cussì ae vilie dal Coronavirus. Une Regjon formalmentri ancjemò speciâl che no à plui lis competencis de sô storie gloriose, e che no à plui in Friûl un minim di classe politiche che e sepi interpretâ lis sôs esigjencis. Si fruçone cussì la stesse idee gjeografiche di Friûl. Triest si insumie di deventâ Singapôr, mandant intant a Rome puartevôs e ministris. Cualchi barlum di gnûf autonomisim si fâs strade in piçulis vilis fortificadis di ca e di là de aghe, ma su dutis al domine il gnûf verp sovran populist di cui che al vûl difindi i confins de “patrie” de invasion afghane e pakistane.
Une sunade di trombe di Wuhan e di Lodi, e dut al cambie!
O forsit no!
◆ I events disastrôs di cualsisedi nature, cuant che a colpissin une realtât a àn in se une potenzialitât creative pal procès di “rinassite” daspò dal drame. Dificil “ricostruî” ce che al è stât distrut ma si pues “rigjenerâlu” daûr di dôs diretoriis pussibilis. Par tornâ a partî, si fâs jeve sui elements di dinamiche sociâl e economiche che a son presints, e si metin in at lis precauzions par protezisi de fuarce che e je stade la cause dal event.
◆ Il taramot dal ’76 al à permetude une rigjenerazion grande dal Friûl in gracie de esistence za in at di un percors di “disvilup”. Midiant di un concors istituzionâl virtuôs tra Comuns, Regjon e Stât si à tirât sù lis maniis e al è nassût cussì il “model Friûl”.
◆ L’event SARS-CoV-2, ancje se intes sôs mutazions, nol è un event locâl e al à di confrontâsi suntune situazion globâl par scuvierzi lis viis dai percors di rigjenerazion. Ma chestis viis a son ertis. Lis dinamichis des economiis politichis prevalentis no slusichin di prospetivis intai paîs disvilupâts, e rimedeâ pal futûr aes pandemiis nol è alc che si pues praticâ cence une regjie autorevule che e sepi imponisi ai interès “nazionâi” dai stâts singui.
◆ In chest cuadri, il Friûl al paie un presit plui alt, parcè che al è ancjemò sturnît de recession dal deceni passât, leade aes carateristichis dal so sisteme produtîf ma soredut ae distruzion des capacitâts di spese dai sogjets publics teritoriâi, che il Stât ur fâs paiâ il cost assurt di 10 miliarts di euros, tentant – in maniere falimentâr – di ridusi i siei debits.
La dimension economiche dal Friûl si è ridusude dal 10%, sedi tant che PIL reâl sedi tant che redit disponibil pes fameis, e si riscje che cheste e sedi une cjame mortâl intal cirî un altri ecuilibri tal dopo Coronavirus. Di fat, une situazion “pluripatologjiche” e à puartât il Friûl ae dibisugne di “terapie intensive”.
◆ Lis capacitâts di reazion des istituzions no rivin a jessi proporzionadis al moment. O vin metût dal nestri mandant a Triest e a Rome masse servitût. Ma la stesse societât civîl no rive a ricognossisi intal propri capitâl teritoriâl e semantic, intun moment che no dome lis rêts economichis ma ancje lis risorsis ambientâls e naturâls – cussì come la stesse identitât culturâl – a vegnin glotudis dai algoritmis des machinis de competizion dai capitâi finanziaris.
◆ Viodût l’aniversari, isal daûr a rivâ un gnûf 1420?
Ise cualchi altre strade che une societât, sveantsi, e puedi cjapâ? Ciert, a coventin visions strategjichis, bêçs e istituzions, vecjis o gnovis, in stât di produsi sieltis oportunis. Tornâ ae normalitât dopo la pandemie e je dome une ilusion. Chest al è un moment straordenari là che e covente cjatade fûr no dome la braùre di jessi furlans ma, se a son, si à di meti in cjamp e di savê ricognossi lis inteligjencis che a vedin une cjalade oblicue a pet dal presint dominant.
◆ Nol baste un statût di autonomie intun stât ae derive par salvâ une barcje intun mâr in burlaç: a coventin professionalitâts, intuizion e cjatâ la rote juste.
◆ Forsit il hashtag “fasìn di bessôi”/ “par fuarce”, rilançât de Patrie dal Friûl al pues coventâ a tornâ a meti in discussion propit lis tantis dipendencis che vuê a pesin sul Friûl, no par isolâsi e par contâ dome su lis propriis fuarcis, ma par rivendicâ un comant politic su dutis lis relazions che a incidin sul futûr dai nestris teritoris. ❚
