Daûr lis olmis di fra Zef Riçulàt di Clausêt,
vescul tal Votcent inte citât cinese là che
e je nassude la pandemie che e fâs pôre al mont
La plêf di Âs, par vecjo, e jere cetant innomenade tant che tiere di predis e di fraris, di bonsignôrs e di vicjaris. Ben cognossudis lis fameis di divignince: a Clausêt i Concina, Politi, Zannier, Baschiera, Fabrici/o; a Vît, i Blarasin, Gerometta, Ortis, Pasqualis, Tosoni. Tancj di lôr a jerin ancje laureâts in letaris e in filosofie, in utroque (ven a dî in dirit eclesiastic e laic) o in teologjie dogmatiche e morâl. Tal secul XIX, la plui part dal clericât de diocesi di Concuardie e rivave de Val Cose e de Val dal Arzin, e tal seminari di Puart i asins a vevin une leadership ricognossude.
Ippolito Nievo, tal so romanç Il pescatore d’anime, dulà che al conte un pôc la lôr storie, ju clame “piccoli papi di Clausedo”.
◆ Ta chest humus, al veve metût lis lidrîs ancje Giovanni Domenico Rizzolati, nassût ai 30 di Otubar dal 1799 intune famee contadine a Clausêt, frazion Prades da Bas, borgade Corgnâl, puare di bêçs ma siore di cjâfs.
◆ Il pari Pieri, par cjapâ un franc, al puartà a vore cun se il fantaçut a Triest, ma Zuanut, plui che de pale e de picje, al jere inmagât dai libris. I plaseve cetant lei e scrivi. In jutori al rivà un barbe de bande di sô mari Menie di Celant, pre Svualt Tositti, di une fameone di predis, che al invià il nevodut a Rome tal coleç dai Francescans Minôrs dulà che si inscuelà e dulà che, tal 1820, al cjapà la vieste maron e il non di fra Giuseppe da Clauzetto. Ma pai Corgnalins al restà simpri Zuanut, e pai paisans fra ‘Sef.
◆ Perfezionât che si fo ta lis tantis robis di Glesie, la Congregazion de Propaganda Fide e decidè di inviâlu in tiere di mission. Fra ‘Sef al partì di Bordeaux suntun brigantin francês a vele, al circumnavigà la Afriche (il cjanâl di Suez al sarès stât viert dome tal 1869) e al rivà prime a Manila, tes Filipinis, e po in Cine tal 1827. Al scomençà la sô mission te regjon dal Shaanxi e po al passà tal Huguang, teritori formât des regjons clamadis Hubei e Hunan. Sede dal so apostolât e fo la capitâl Wuchang, su la confluence dal flum Han cul Changjiang (par talian, chel chei i disin il flum Azzurro), deventade tal 1927 Wuhan, 10 milions di abitants, ben cognossude vuê, magari cussì no, tant che scune dal Coronavirus.
Fra ‘Sef si metè dut seneôs a predicjâ la peraule dal Signôr e al rivà a batiâ un biel trop di cinês e a creâ une piçule comunitât cristiane. Ma i governants no jerin gran dacuardi, stant che a viodevin i europeans – no dome par motîfs religjôs ma ancje comerciâi – tant che il fum tai voi.
◆ Al fo perseguitât, arestât e metût in preson. Tibiât in mil mûts. Al scugnì dispès scjampâ par salvâ la ghirbe. Al rivà simpri a tirâse fûr cun fortune di situazions une vore pelosis. Ma, a fuarce di dai, al rivà a fâsi preseâ dai studiâts di venti là. Al imbastì une scuele par fruts di inviâ al sacerdozi e un centri sociâl e assistenziâl a pro dai frutins, massime des frutinis bandonadis de fameis che no vevin il coragjo di copâlis. Gran brute robe, in chê volte, nassi femine in Cine!
Ai 19 di Avost dal 1838, pape Grivôr XVI lu nomenà vicjari apostolic dal Huguang cul titul di vescul di Aradia, par memoreâ la antighe sede vescovîl di Arados, vuê Ruad, une isole in partibus infidelium, impuartantone al timp des Crosadis.
◆ Cun tante buine voie, e pôcs bêçs, si metè a tirâ sù a Hankou, suburbi di Caohumen, une glesie dedicade a Sant Antoni di Padue, cun dongje un ‘seminari e un coleç. Di bon furlan cjapât dal mâl dal clap, al veve… infetât ancje i cinês: di fat, al faseve di architet, di impresari, di muredôr e di manoâl, cul risultât che ancjemò vuê la glesie e je in pîts.
Ma la Curie romane, tal 1855, lu riclamà in Italie (si dîs par zelosiis e cavîi des congregazions dai Jesuitis e dai Domenicans cuintri dai Francescans) par vie dal puest di vescul che fra Giuseppe al ocupave. In struc, ce che vuê si clamarès “alternance”.
Ai 15 di Avrîl dal 1856, cun doi seminariscj cinês, al lassà Hong Kong suntune nâf inglese a vapôr. Par strade si fermà a Goa, dulà che te catedrâl al le a preâ su la tombe dal grant missionari spagnûl Francesco Saverio. E po, vie su pal mâr Ros fin a Suez e di li sul camêl fin a Alessandrie, dulà che si imbarcjà suntune nâf austriache che e rivà a Triest ai 10 di Jugn. Partît cuntune nâf a vele, al tornave cuntune nâf a vapôr. I timps a jerin cambiâts tun marilamp: dome 20 agns prime, Charles Darwin al veve fat il zîr dal mont cul Beagle dulà che al jere imbarcjât ancje un sartôr par cusî velis.
◆ Al jere vignût al puart a spietâlu pre Tite Gallerio, predi di Vendoi, che cussì nus conte: «…mi trattenni con lui per ben tre ore in dolcissima conversazione. Vestiva alla cinese… parla ancora bene l’italiano ed è versatissimo nella lingua cinese. I due giovani chierici che lo accompagnano si esprimono sufficientemente in latino».
◆ Al rivà a Rome e po al le a Ferrara, dulà che la Sante Sede lu veve nomenât vescul. Tal Setembar dal 1857 al podè tornâ a Clausêt, dulà che al ve il bon acet de sô int e di dut il predessam. E fo fieste grande cun musichis e luminariis. A contin che sul puiûl de sô cjase di Corgnâl, dulà che al veve mot i prins pas, e aromai vueide dai cjârs gjenitôrs, Zuanut si metè a vaî lagrimis cjaldis e po al saludà la sô int tal furlan asin che al veve tignût simpri tal cûr. Al disè messe grande te glesie di Sant Jacum e, a ricuart de sô visite, al lassà in regâl une vieste liturgjiche maraveose, dute fate e ricamade in sede, cun rosis, frascjis e nemâi, a ûs de Cine. Une robe maraveose che pre Italico al ten ben sot clâf, e che dome ogni tant al tire fûr.
Tornât a Rome si plaçà tal convent di Sant Pieri in Montorio sul Gianicolo, dedicantsi a finî e a miorâ un vocabolari cinês-latin (ma nol rivà insom), za stampât a Hong Kong tal 1853. Fra ‘Sef, cun chest so lavôr si pandeve, ancje se a distance di agnorums, bon arlêf di Matteo Ricci (nassût a Macerata tal 1552) e dal preseât Basili Brollo (nassût a Glemone tal 1648), ancje lui francescan, clamât dai cinês Man-ti-jia, om massim e Ye Zongxiao, mestri onorevul. Ancje fra Giuseppe al fevelave e al scriveve benon il cinês mandarin, cun cetante maravee dai studiâts di là, tant di meretâsi il non di Li Wenxiu, dulà che l’ideogram Li al sta par lis dôs primis letaris di Rizzolati e Wenxiu par “scuelât” o “ecelent, straordenari”.
◆ Al murì a Rome ai 16 di Avrîl dal 1862 e al fo soterât te glesie dal convent. La lastre tombâl nus informe:
Hic
Josephi Rizzolati
domo Clauzetto
in ForoJuliensi regione
Ordinis Minorum S. Francisci
Episcopi titularis Aradiensis
Vicarii Apostolici Hu-Quang
qui XXX annos
Sinensibus verbum Dei strenue annuntiavit
ossa in Christi pace composta
iacent
N. anno MDCCXCIX – O. anno MDCCCLXII
(Achì, di Giuseppe Rizzolatti, natîf di Clausêt in Friûl, dal Ordin dai Fraris Minôrs Francescans, Vescul titulâr di Aradie, Vicjari Apostolic dal Huguang, che par 30 agns al pandè seneôs la peraule di Diu ai Cinês, i vues poiâts ta la pâs di Crist a polsin. Nassût tal 1799 – Muart tal 1862).
◆ Ma vuê, su la sô tombe si puedial lâ a impiâ un lumin o a dî une recuie?
◆ No, parcè che e je sparide tal davoi dai grancj lavôrs edilizis dai prins dal ‘900. Cuasi che fra ‘Sef, daûr de humilitas di Sant Francesc, al ves volût tornâ polvar tal polvar dai rudinaçs. In linie cu la humana fragilitas, no mancul lizere e crepadice, dai viers che i pechinês a scrivin cu la aghe tal parc Jingshan, e che po il soreli al suie e il vint al cjarece. ❚
