Un gnûf citadin milanês al è David Puente, che di mistîr si ocupe di smascarâ “bufulis”, o ben lis sflocjis e falsetâts che a zirin in rêt. «Al è di un an che mi soi trasferît achì dal Friûl cu la famee la famee», mi dîs.
«Te mê zone no je tante int ator, duncje si pues dî che lis indicazions cuintri de difusion dal Covid-19 a son seguidis» ancje se «o viôt meti sù lis mascarutis mâl, tocjâsi la muse… insome, un tic masse di sdavassarie».
Lu sint par domandâi di sflocjis in rêt sul Coronevirus, che si vedi di stâ in vuaite.
«Fra dutis, trê in particolâr a son pericolosis», al marche.
1) La vendite di vitaminis, integradôrs, prodots che a pretindin di proteziti dal Covid-19. «A son dutis trufis, a son za stâts ancje secuestris. Fin cumò no son saltadis fûr evidencis sientifichis di prodots che ti protezin.» Se un sît che ti propon alc dal gjenar al cite une ricercje fate sul lôr prodot, e je false.
2) La vendite in rêt di tescj sierologjics, ancje midiant di sîts forescj. «No son sigûrs, e duncje a puedin fâ une vore di dams. Metìn che a un i risulti che nol è stât infetât: al podarès lâ ator trancuîl e infetâ tancj di lôr. O magari un al risulte positîf e invezit no je vere: cemût vivial la situazion? A son stâts ancje suicidis di int che e crodeve di vê il virus».
3) La opinion dai esperts variis. Ogni opinion e à di jessi tignude sù di un studi fat cun metodi sientific, realizât di plui di un di lôr, ripetibil, e publicât suntune riviste serie. «Se chel che o leiês nol è compagnât de citazion de ricercje, no stait a crodii».
Insome, al dîs David «Nol esist un complot mondiâl par sparniçâ il virus, sù mo sù! Purtrop a la int i plâs crodi aes storiis, e je la nature umane. Une sflocje in internet si sta pôc a inventâle, dopo però e je fature a stâi daûr par smascarâle».
Al à propit reson, David. Cirìn di slizerî chest lavôr stant atents a ce che o condividìn sui social, cumò plui di simpri. ❚
