Ai 9 Mai dal 1418. Une date di memoreâ.
Sot di une ploie di frecis il leon si rint ae acuile
“Ostarie dal Agnul” di Vençon, Vierte dal 1422. Corât di Gonzaghe al salte sù de bancje. Al è jentrât nuie mancul che Nicolùs di Prate, chel che fin a doi agns indaûr, cuant che Vignesie e veve concuistade la Patrie, al jere il gjenerâl dal esercit furlan dal patriarcje. “Bundì, sâr Nicolùs – lu salude il zovin Corât – ce sorprese!” Chel, pront, al met un dêt denant dai lavris par fâlu stâ cidin e si sente denant di lui. “O soi in segret – al dîs a planc – se mi bechin i venezians… mi scuartin in place.” E il Gonzaghe: “Di me o podês fidâsi. Mi vevis fat presonîr ma mi vês tratât ben, di nobil a nobil. La mê famee e à paiât il riscat, Vô mi vês liberât e si sin dade la man, di om a om. Ostîr, doi tais di chel refosc. Gno pari mi à mandât a Glemone par cjoli une cjame di fier de Gjermanie .E Vô? Us crodevi in Ongjarie.”
◆ “O soi sì in Ongjarie cul patriarcje Luduì e cul imperadôr par meti sù un esercit e par gjavâ la Patrie des grifis dai venezians. Ma nol sarà facil! – al conferme Nicolùs – e tu, ti visistu di cuant che ti ai cjapât?” “Se mi visi? Mai e mai altri mi dismentearai di chel lunis, ai 9 di Mai dal 1418. Gno pari al veve chê di metisi cui venezians, che par lui a jerin l’avignî, e mi veve ordenât di lâ a combati cun lôr. Jo, imberdeât cu lis armis, no volevi. Mi à convint disint che e sarès stade une robe semplice. Denant dal esercit fuart di Vignesie, i ‘villici forlani’ si saressin metûts in zenoglon.”
◆ “E invezit a son colâts te vuate dai furlans! – al interomp Nicolùs – il patriarcje al veve vude une spiade che il gjenerâl venezian Arcelli us veve ordenât di lâ daurman a Flumignan, là che al jere lui. Cussì si sin metûts in vuaite par spietâus.”
◆ E Corât: “O jerin in sîscent tal cjamp plantât tra lis vilis di Bant e di Morsan. Al ploveve che Diu le mandave di trê dîs ma o vin scugnût ubidî e partî par passâ il vât dal Tiliment. La cjaradorie e jere pantanose, e a drete a jerin cjamp arâts e imbombîts di aghe. Si scugnive fâ une file lungje su la strade. Jo o jeri denant cul gjenerâl e cul puartebandiere. A disevin che nissun furlan al varès vude la olse di atacâ un repart di cjavalarie pesante. Nancje dit, l’alfîr si sdrume jù cuntune frece impirade tal cuel. Une ploie di frecis nus rive intor a ondadis dal bosc di là dal cjamp arât. I cavalîrs a àn la armadure, ma i cjavai colpîts a son insurîts, a ripin, si infondin tal pantan. A ogni onde di frecis, un grum di venezians a son colpîts e a tombolin tal pacjuc. La confusion e je grande e ducj a corin par cirî protezion, ma dulà?”
◆ “Il prin furlan a partî al atac – al va dilunc Nicolùs – al è il zovin Uldarì di Voleson cun cinc fanatics come lui. A montin a cjaval e si butin su la code de formazion: i cjars cu lis provisions che a son plui lents. A massacrin i condutôrs dai cjars e dopo si butin su la retrovuardie. So pari, il cont Ulvin di Voleson, al sacrabolte. Uldarì nol veve di movisi prime dal segnâl e cumò i tocje lâ in so jutori. Ulvin al à la cernite: 100 contadins armâts dome di forcjis e di manariis, ma al scuen lâ. Al berle ‘Muart ai invasôrs!” e al va al atac de retrovuardie veneziane.”
◆ “Ce sbigule! – al continue il Gonzaghe – Subite il comandant venezian al ordene ai cavalîrs di metisi in formazion par cjariâ la puare fantarie furlane. Ma sot de ploie di frecis e cui cjavai ombrîts che sbrissin tal slichignot, nol è facil metisi in formazion.” “Intant – al va dilunc Nicolùs – il cont Jacum di Voleson, fradi di Ulvin, al ven fûr dal bosc di chê altre bande cui siei trente balestrîrs sielts e infalibii. Ducj a sintin la sô vosate potente ‘Pal Patriarcje e pe Patrie!’. I balestrîrs a vegnin indenant tal viert e a rivin sot tîr. I veretons des balestris a sflocjin inesorabii. A chê distance a foropin ancje lis coracis e a ogni colp un venezian al cole. Aromai a ‘nd è une vore par tiere, e i dusinte arcîrs di Francesc di Prodolon, simpri traint frecis, a vegnin fûr dal bosc e si butin ancje lôr te bataie. No àn coracis, ma snait e braùre di difindi la Patrie.”
◆ “Al è stât in chel che i venezians a àn voltâts i cjavai par cjariâ par prime i balestrîrs che ju copavin un par un – al zonte Corât – e cun tresinte cavalîrs cuintri trente, ju varessin sterminâts. Ma a pene che i cjavai venezians a jentrin tal arât plomp, a tachin a infondâsi, a son frenâts e la formazion si srarìs.”
◆ A Nicolùs di Prate i somee di rivivi chel moment epic: “Impantanâts e cence corse, a son une prede facile pai balestrîrs e par Francesc di Prodolon che, denant dai siei oms, al mene la spade tant che un diaul. La fantarie furlane dai Volesons si discjadene sui venezians colâts di cjaval. E jù, cu la forcje e cu la manarie.” “Il Gonzaghe al interomp: “Robis di fâse tai bregons. O stevi dongje dal comandant venezian che al mudave i ordins un daûr di chel altri. Viodût il maçalizi dai siei tal cjamp arât, al ordene a chel centenâr ancjemò valit di ritirâsi e di scjampâ a man çampe tal prât di rive sù. Al crôt di vêle mocade e di vê salvade la piel. Ancje jo o crodevi di fâje fin che no ai viodût, insom de cleve, saltâ fûr il vuestri standart turchin cu la acuile de Patrie e chel di Fidrì di Purcie.”
◆ “Di lâ sù mi soi gjoldude la bataie – al va dilunc Nicolùs – e cumò, cun Fidrì e cui nestris 300 cjavai, il miôr de cjavalarie patriarchine, o jeri pront par sierâ la partide. O partìn berlant “Pe Patrie e pal Patriarcje!” cu lis lancis in rieste cuintri dai venezians paralizâts. Chei che no vegnin impirâts, ju finìs la fantarie furlane cence pietât, stiçade di chel diaul dal Prodolon, ferît za trê voltis. Aromai ogni venezian al à intor cinc o sîs furlans. Un maçalizi, un lât di sanc. Ce vitorie! Ce lezion par Vignesie: tresinte e sessante venezians copâts, e dome cuatri furlans. Magari cussì no, ancje il zovin Uldarì di Voleson, copât par erôr di une frece furlane tal davoi de lote.”
◆ E Corât “Us ringracii ancjemò di vêmi sparagnade la vite, sâr Nicolùs.” “Frutat, ti vevi vualmât dai colôrs che tu jeris un Gonzaghe. Miôr tirâ un bon riscat che fâ fûr un cacit. Sâstu po, che rivivi chê bataie mi à scjaldât il cûr e no ai nancje cerçât il tai di refosc che tu âs ordenât?” “Ae nestre amistât – al alce la tace Corât e, sot vôs, al zonte – e ai furlans che a amin la lôr Patrie.” E Nicolùs: “Dopo di chê vitorie si sin dividûts e Vignesie nus à glotûts. Sì, o alci la tace ai furlans, che a àn di capî che dome se a restaran unîts a varan ancjemò une Patrie!” ❚
