Interviste a Franca Drioli,
diretore artistiche dal progjet
Chest an la Fieste de Patrie dal Friûl e je stade festezade dai barcons invezit che a Udin come che al jere in program. Par fuarce, ma istès no je propit mancjade la grande partecipazion di ducj i furlans e di ducj i inamorâts dal Friûl, a cheste celebrazion che e conte 943 Primeveris.
◆ Bandieris blu, e pardabon tante storie in chê origjinâl dal patriarcje Bertrant conservade tal museu dal domo di Udin, une des plui antighis di Europe, fûr des teracis e tantonon ancje sul web, sui social, tal digjitâl. Une esplosion di sintiment che e à segnât ancje il sucès garantît dal Imni de Patrie dal Friûl, chel uficiâl, che al jere stât votât di une jurie specializade, daûr di un bant promovût de ARLeF e dal Istitût ladin furlan Pre Checo Placerean, daspò di une idee che jere vignude fûr di me che o scrîf.
◆ Vincidôr al è stât l’imni “Incuintri al doman”, componût di Valter Sivilotti cun peraulis di Renato Stroili Gurisatti, screât tal 2018 cuntun conciert a Lignan, eseguît de Orchestre Mitteleuropee e dal Côr dal Friûl – Vignesie Julie. Po dopo, a son stadis diviersis altris ocasions par sintîlu, come l’an passât a Gurize ae Fieste de Patrie. Bielzà di chei moments, l’imni al veve cjapât il sintiment de int, restade emozionade di chês bielis peraulis e di chê musiche fate cun grande maestrie.
◆ Ma un grant afiet di ducj i furlans e no dome, al stât cu la version moderne, par ensemble e cuatri vôs feminîls, daûr di une produzion musicâl di Geremy Seravalle, par un gnûf rangjament che si zonte a chei cetant biei di Valter Sivilotti, che al à fat fin dal principi diviersis versions di chest biel toc che al à scrit lui (a son dodis, dutis di podê discjamâ dal sît de ARLeF). Di fat il video, che al è stât publicât su youtube ai 3 di Avrîl, in cuatri e cuatri vot al à fat tredis mil visualizazions e il numar al è destinât a cressi. Si viôt dut il Friûl dal alt, come se e fos la visuâl di une acuile in svol, des monts de Cjargne ad Aquilee, tocjant lûcs tant che Cividât, Frisanc, Gurize, Maran, Nert, Palme, Pordenon, Rutârs, Sauris Disore, il Tiliment, Udin, Vençon…, par une produzion video realizade de Quasar Corporate cu la regjie di Giorgio Milocco. Dut di viodi e di scoltâ chest lavôr dal imni uficiâl de Patrie dal Friûl, come lis vôs feminîls cetant bielis dal grup vocâl “ArteVoce Ensemble” che lu àn cjantât, o ben Consuelo Avoledo, Michela Franceschina, Jessica Interdonato e Giulia Polidori, sot de direzion artistiche de cjantante e musiciste Franca Drioli, fondadore e diretore ancje di ArteVoce Voice&Academy. Le vin intervistade par che nus conti lis emozions di chest progjet e di chest cjant che al è jentrât tal cûr di ducj.
◆ «Dut al è tacât tal 2019, cuant che la ARLeF nus veve invidât a eseguî l’imni “Incuintri al doman” ae Fieste de Patrie dal Friûl che si faseve a Gurize. Di li o vevi pensât di fâ, plui che par côr, une version par cuatri vôs modernis. Al è stât un grant sucès e une grande emozion. E alore o vin fissât cheste version intun video e o sin ducj contentons dal gradiment e dal risultât. E je stade une vere responsabilitât e o ten a ringraciâ ducj chei che e mi àn judât a realizâlu. I nons, e a son tancj, si ju cjate tal video su youtube. Ducj grancj professioniscj».
◆ Franca Drioli no je gnove intes produzions musicâls par furlan. «Pense che il furlan no lu fevelavi: o ai tacât a 14 agns e daspò no lu ai plui molât. O ai scuvierzude la ricjece de nestre marilenghe, i sunôrs, lis articolazions semantichis, un patrimoni che o ai fat cognossi ancje aes mês arlevis e che o ai metût tal concret in diviers progjets, tant che “Nativitas Mundi” cuntune gnove version di “O staimi atents, staitmi a sintî”, eseguide di cjantantis dal Abruç, de Sicilie, di Triest, de Americhe. E je vignude fûr une robe bielonone, e lôr a vevin imparât a cjantâ par furlan cun sfumaduris di pronunzie pardabon interessantis. Daspò, no pues dismenteâ il gno compit di “vocal coach” al “Festival de cjançon furlane” e altris lavôrs, tant che “Mamui – Schiribiç mataran in musiche” in furlan antîc, graciis ai studis fats di William Cisilino. Une biele sfide che e je stade cjapade sù ben ancje di Dario Fo che al à condividût il progjet cun nô».
◆ Tornìn al imni “Incuintri al doman”. «O ai clamât Geremy Seravalle par realizâ une base musicâl essenziâl, che e fos juste par meti in lûs la linearitât de part melodiche di cheste composizion maraveose di Valter Sivilotti. Cu lis cjantantis invezit o ai volût esaltâ ogni peraule par dâi lustri al test cetant biel di Renato Stroili Gurisatti, di mût che al podès rivâ in maniere clare a ducj, e di podê cjantâ ducj insiemi, lant “Incuintri al doman”.
◆ Il test:
In alt o fradis, / o int di Aquilee, / In alt o fradis, / o int di Aquilee, / devant da la Storie, / di front dal doman. / Sin flame ch’e vîf / pes stradis dal mont / sin non di une Patrie / sin fîs dal Friûl. // Scolte o Friûl, / o tiere di libars, / di lenghis e popui / sês cjase di pâs. / Dai secui i paris / nus clamin adun / a fâsi lidrîs di unic destin. // In alt o Friûl, / o Patrie mê sante, / di fuarce e sperance / si viest la tô int. / Un popul sigûr / ch’al cjamine te lûs / incuintri al doman, / incuintri ai siei fîs. ❚
