Cuarte pontade. Autonomie come categorie spirituâl

A son cent agns che al è nassût pre Checo Placerean (30.11.1920). Par tancj agns lui al à insegnât prime religjon al Liceu Stellini e po Storie e Filosofie al Marinelli. Jo o ai cognossût plui di cualchi student che lu àn vût insegnant al Stellini. Ducj lu àn ricuardât cun grande stime e simpatie, parcè che lis sôs lezions a jerin vivis, profondis, mai stufadicis o scontadis e a frontavin cualsisedi argoment. Ancje al Marinelli i students a restavin denant di un om cussì fûr dal ordenari pe maniere clare di spiegâ e origjinâl di interpretâ fats e pinsîrs.
A ricuart di cheste figure, di chest nestri grant profete La Patrie e propon a pontadis un intervent di pre Antoni.
pre Roman Michelot
Stesse musiche si ripeteve inte sô ativitât di professôr al Stellini, prime di passâ ae catedre di filosofie par no dipendi dai umôrs e dai ricats de scuele di religjon. Si sa che l’insegnant di religjon al jere sopuartât o doprât come un “refugium peccatorum” tai scrutinis e tai esams. Une figure buine, inofensive, incolôr e inodôr, preocupade di tignî buine la canaie e di fâsi sopuartâ in chê ore penose che ducj si aprofitavin par ripassâ ce che no vevin studiât a cjase. Un om di sisteme, che al veve di difindi il sisteme e lis resons no simpri rasonevolis des sieltis de jerarchie. Une sorte di pompîr tun côf di incendiaris.
◆ Pre Checo, seont la testemoneance dai siei scuelârs, no dome si faseve scoltâ ma lis sôs lezions a jerin lis plui bramadis pe sô preparazion culturâl, pe sô libertât interiôr, pe sô capacitât di fâ jentrâ lis grandis resons teologjichis inte vite di ogni dì. Une religjon incjarnade, concrete, vive, incuietant e rivoluzionarie, atente ai fats de storie e no latitante o fumatade o nirvaniche. E l’insegnant di religjon al jere il plui rivoluzionari, il plui creatîf, il plui iconoclastic e trasgressîf in ce che nol veve reson di esisti. Il dut cu la sô dialetiche straordenarie e cu la sô ironie micidiâl. Un autentic ayatollah, un taleban, ma in sens contrari.
◆ Chest om che, cu la sô “topolino” cjamade di libris e cuardins e scjaipulis, al calave ogni dì in citât, a Jerusalem, a frontâ i predis dal templi e i scrituriscj ma che al viveve e al operave fûr de citât, tai paîs e tai borcs, in Galilee, tiere di brigants e di rivoluzionaris, al jere une presince ingombrante pal sisteme e profetiche par chei, pôcs in veretât, che si batevin cu la eterne ilusion di rivâ a cambiâ solfe.
◆ Al jere evident che pre Checo al nadave intune altre aghe e che al partignive a un mont che nol jere il nestri e nancje il mont dai benpensants e nancje chel dai politics e dai oms di struture e di cariere. Al jere il so mont, la sô regule o la sô sregolatece, la sô leç o mancjance di leç, la sô autonomie. Une strade dificile, dute in subide, fra mil ricats e ostilitâts, tignût di voli dì e gnot par cjapâlu in cuintripît, par vê un rimpin di picjâlu.  ❚