SPECIÂL – A Udin un teatri plui furlan

Sô mari e veve la panze cuant che e je lade a teatri, une sere a Bean. Sul palc di chel paisut, dongje Codroip, al jere un altri fi, in costum, che al faseve il protagonist. In sene «Il martiri di san Tarcisio», la storie di chel zovenut cristian che al è stât copât parcè che al leve di scuindon a puartâ lis particulis ai presonîrs. Une conte che e à colpît une vore la mari, tant che e à decidût di clamâ Tarcisio chê creature che e stave spietant.
E, si sa, te vite lis robis no sucedin mai par câs. Di fat, 74 agns dopo, chel frut che cumò al è un nono, al è deventât President de fondazion dal teatri Giovanni da Udine. O stin fevelant di Tarcisio Mizzau.
Dirigjent industriâl in pension, Mizzau al è simpri in vore. «Pordenone, stazione di Pordenone» – si sintive in sotfont tal telefonut, intant che lu intervistavin. Al stave lant a Milan, dulà che par trê dîs ae setemane al dirêç un centri di ricercje sientifiche su la sede. E daspò al scrîf, al trafiche, al progjete e al cjate il timp ancje par coordenâ il teatri. La sô cjarie e je chê plui alte, vâl a dî president: sot di lui a passin i diretôrs artistics, i conseîrs, i revisôrs dai conts, un pôc ducj insome. E a voltis, tocje comedâ ancje cualchi fastidi, cualchi polemiche. «Ma o rivi a lavorâ ben istès» – al rimarche lui.
Mizzau, o ai sintût a dî che lui al è un furlanist.
(Al riduce un pôc…) «No, parcè che no sai ce che al vûl dî «furlanist». Però o pues confermâ che o soi un che al ten ae marilenghe. E je un patrimoni culturâl, une marche. E jo, che o soi un espert in economie, o crôt tes marchis e o sai trop che a valin. Il furlan al è come un biliet di visite, al rapresente la nestre culture».
E je biele la storie de marche. Po ben alore, viodût che o sin in discors, cjatin un sproc: ce podìno meti dongje de peraule «furlan»?
«Pragmatic, lavoradôr e che al smicje al concret. E che al sa fâsi volê ben».
Cualitâts che a coventin ancje par lavorâ tal teatri?
«Sigûr. Si preparin lis stagjons artistichis une vore prime. Cumò o stin za improntant che dal 2010-2011 e dal 2011-2012, duncje si scuen sei organizâts e concrets par no fâ dams».
Ma lui metial il nâs ancje tes sieltis artistichis?
«No, no. O vin doi diretôrs brâfs e preparâts, Mirabella e Spini. Jo o pues dâ cualchi consei, cualchi drete, ma lis decisions fondamentâls a spietin a lôr. O ai dât il gno jutori par inmaneâ i spetacui par furlan parcè che o cognòs tantis associazions e grups che a podevin jessi juscj par noaltris».
Ce pensial dal teatri par furlan?
«Al è impuartant che la art si fasi promotore de culture di un popul ma no pensi che il teatri Giovanni da Udine al vedi di fâ la vuere par difindi la marilenghe. La pues promovi, chel sì».
Ce isal, di furlan, tal program de gnove stagjon?
«Tra Fevrâr e Mai, pe prose, un sipari furlan. Si intitule »Il Friuli del primo novecento: un laboratorio tra comicità e presagi d’ombra». Cinc incuintris curâts di Angela Felice e Paolo Patui, in colaborazion cul Teatro Club. Ogni apontament al sarà plen di leturis e coments a cuintripont. Un o plui ospits a intervegnin cun aprofondiments linguistics, storics e antropologjics, il dut incurnisât di musiche dal vîf, videos e viaçs tal repertori de lenghe furlane. In pocjis peraulis, la storie dal nestri teatri, di dopo la unificazion di Italie fin ai dîs di vuê».
Ma no je finide achì, parcè che o sai che o vês coinvolzût ancje la academie di art dramatiche Nico Pepe di Udin.
«Sì, e dîs ben. Cu la regjie di Claudio De Maglio si puarte in sene la Odissee, il poeme di Omero tradusût in lenghe furlane di Sandri Carrozzo e di Pierluigi Visintin. Chest il 20 di Avrîl e a pene prime, il 13 – in colaborazion cul CSS, il teatri stabil di inovazion dal F-VJ – e je une leture seniche di un test par furlan che al ven fûr dal laboratori di dramaturgjie diret di Gigi Dall’Aglio, tal ambit de Farie teatrâl furlane».
E tai dîs «Un teatro pieno di teatro»?
«Mi ven tal cjâf la zornade inmaneade de Associazion teatrâl furlane tai spazis dal Giovanni da Udine, sabide ai 29 di Mai. Un apontament a ingrès libar che al propon i spetacui di 53 grups teatrâi iscrits ae associazion. E il biel al è che il public al è itinerant, al pues lâ e vignî come che al vûl e cuant che al vûl».
Insome, il mont dal teatri e de art lu à cjapat dentri. Ma lui si sintial un poc artist?
«No, no (e al riduce ancjemò). Jo o ai simpri traficât e organizât mostris e apontaments. Pai industriâi di Udin o ai inmaneât une esposizion sul açâr e cualchi presentazion di libris. Alì o ai cognossût il professôr Reitani, che dopo al è deventât assessôr ae culture dal comun di Udin. Cuant che i à tocjât di pensâ a un president de Fondazion dal teatri al à tirat fûr il gno non».
Une biele sodisfazion!
«Sì ancje se – o ai di dî la veretât – i ai pensât tant parsore prime di dî di sì.
Parcè?
«Ma parcè che e je une ativitât che ti puarte vie timp, un impegn di cjapâ sul seri. Ma ae fin dai conts mi organizi, o rivi a fâ dut e mi plâs».
In plui di vêmi contat che al è un furlanist, mi è rivade vôs che al è ancje un scritôr.
«O ai stampât cualchi libri, ma ducj tecnics, economics. Ma o ai partecipât ancje a cualchi concors, cun volumuts in lenghe furlane. Ma fasìn fente di nuie, parcè che a son stâts dome segnalâts, no son impuartants. Scrivi par me al è un hobby, un mût par stacâ il cjâf dal lavôr».
E cumò, aial la pene in man?
«Oh cumò propit no, no rivi. O ai masse lavôr!».
Valentina Pagani