“None Luzie, contimi di nono Berto.” “Ce gust che tu mi domandis di lui, Tecle. Tu tu sês dut ce che o ai, dopo muarts i tiei gjenitôrs.” “Vuê al plûf, none. O podìn filâ e intant tu mi contis, dai!”
◆ “To nono si clamave Hugberth, al jere todesc de Baviere ma jo lu ai simpri clamât Berto. Al è capitât achì a Aquilee tal 1019 cul Patriarcje Popon. Al jere un so cjapitani e ancje amì di fruts. A jerin ducj i doi dal 998. Pense che jo o soi nassude tal 1000 e a disevin che e veve di vignî la fin dal mont: mil e no plui mil. Cumò o sin tal 1070 e o sin ancjemò achì… Insome, a pene rivât, to nono al è vignût a bevi te ostarie dal puart di gno pari Bidut, là che jo o devi une man. Biel, al jere il gno Berto: alt, biont e voi colôr dal cîl. Ma ancje jo no jeri mighe mâl, eh! Mi à olmade a colp. E jo lu smicjavi di scuindon. Cence che ti conti il rest, tal zîr di sîs mês si sin maridâts.”
◆ “Ce biel, none. E Popon?” “Tecle, il patriarcje, bavarês come il nono, par dî il vêr si clamave Wolfgang ma di ca des mont par ducj al jere Popon. Un biel zovin che al someave plui un soldât che no un predi. Ma al veve cjâf e tant studi. O sai dut di lui parcè che al veve une vore di confidence cun to nono Berto e chel mi contave dut, che si fidave. Al veve doi carûi: fâ fûr il patriarcjât pustiç di Grau e incressi il podê dal vêr patriarcje di Aquilee.”
◆ “Ce vevial cuintri di Grau, none?” “A Popon no i leve jù che a Grau al fos un altri patriarcje che si faseve clamâ “di Aquilee”. Al voleve tornâ a meti dongje dut il patriarcjât e gjavâ Grau des mans dai venezians. Il prin atac a Grau lu à fat tal ‘24. Cun to nono le veve pensade biele. Un cuatri dai nestris a son lâts a Grau vistûts di marcjadants, cuntun caratel di vin bon e lu àn vendût a bon presit. Cjapade confidence, i gradesans ur àn domandât ancjemò di chel vin. Tal doman, sot sere, chei cuatri a son rivâts in barcje cun cuatri botis grandis e lis àn discjamadis tal magazen par vendi tal doman. Ma vie pe gnot, di ogni bote a son saltâts fûr doi soldâts, cun to nono Berto a cjâf. Chescj a àn fat fûr lis vuardiis, a àn viert lis puartis di Grau e Popon al è jentrât cun dut l’esercit. Intant dal pestefruce, il patriarcje al à recuperadis lis relicuiis di Ermacore e Fortunât, che i interessave metilis te basiliche gnove di Aquilee”.
◆ “Ma, none, Grau al è ancjemò venezian!” “Vere, gnece, tante fature par nuie. La politiche e à metude la sô çate. Popon si à fat confermâ dal pape il podê su Grau. Dopo, daûr des protestis dai venezians, il pape ur à tornât a lôr la citât. Alore l’imperadôr i à fat cambiâ idee al pape a pro di Popon. Ae fin dal intric, il Concili i à dât reson ai venezians. Mi susti parcè che, par vê reson, a àn contadis dome bausiis, come chê che i oms di Popon a varessin robât dut a Grau, e fintremai che a varessin fate violence aes muiniis. Bausârs!”
◆ “None, parcè âstu fevelât di basiliche gnove? O crodevi che e fos vecje!” “E je antigone, Tecle. Ma cuant che o jeri frute e jere bandonade e plene di baraçs. Al è stât il patriarcje Popon a fâle sù gnove. Ma no dome chê. Al à fat tirâ sù lis muris de citât, cussì o sin sigûrs; al à implantât il munistîr des muiniis, il plui siôr de Patrie; al à dât vite al puart, che cumò ogni dì a son trabacui o che a rivin o che a van. La vore plui biele e je la basiliche, che no le à dome justade, ma slargjade e fate plui alte: une vorone! Par agns e jere int di ogni bande: muredôrs, cjalcinârs, architets, marangons, pichepiere, pitôrs, e ducj a vignivin a bevi te ostarie di gno pari. O ai viodût cui miei voi meti in pins lis coloniis antighis e sculpî i capitei gnûfs. O vevi confidence cui pitôrs che a vignivin di lontan. Popon in persone ur veve dit ce che a vevin di piturâ te abside: la Madone tal mieç dai martars di Aquilee. E dopo, plui in piçul, l’Imperadôr Corât II, la sô femine Gjisele (che e jere sô agne) e il so fantat Indrì. Di chê altre bande, al à volût che a piturassin l’imperadôr di prime, Indrì II e ancje lui, propit lui, Popon, cu la aureule cuadrade e il stamp de basiliche in man. Mi visi come cumò la dì de scree, cui gardenâi e 13 vescui. E jere la dì dopo di Sant Ermacore, ai 13 di Lui dal 1031. Ce fiestone! E il patriarcje al jere braurôs dal cjampanili. E o jerin braurôs ancje nô di Aquilee di vê un tor tant maestôs e alt plui di 40 pas. A disin che al è il plui alt dal mont. Popon, bolpat, al à volût che al fos plui alt di chei di Rome.
◆ “Ce gust, none, stâ a scoltâti.” “Va ben, frute, ma no sta a fermâ di filâ e fâs zirâ il fûs. Par finî, ti dîs che il patriarcje al è rivât a fâ dut chest parcè che al jere stât amì di trê imperadôrs e al à simpri scombatût par lôr. To nono Berto al è lât in vuere cul lui pardut. Al jere plui vie che a cjase. E i imperadôrs a àn premiade la fedeltât di Popon cun vilis, cjistiei e dirits che cumò a son dal patriarcjât. Pecjât che nol à molât chê fisse cuintri di Grau. Prime di murî al à tornât a atacâ chê citât. E je lade strucje, e il gno puar Berto al è stât copât dai venezians. Ludris! Il patriarcje lu à vaiût une vore e al à vût bon cûr cun nô. Nus à judâts e o ai podût vierzi cheste buteghe di lane. Popon al à propit meretât di jessi soterât juste tal mieç de sô basiliche. Dopo di lui, a son stâts trê sucessôrs lamis. Ah Tecle, no son plui i patriarcjis di une volte! Ancje se cumò a ‘nd è un che al fâs sperâ ben parcè che al è in cubie cul imperadôr Indrì IV. Si clame Siart.” ❚
