Flum e val impuarîts, derivadôrs privâts inricjîts
O sin daûr a viodi un atac speculatîf dai privâts aes aghis de Fele par deviâlis tes condotis e pes turbinis. Un atac che al ven stiçât dai incentîfs – i cussì clamâts “certificâts verts” – paiâts cu lis boletis dai utents. Al è un atac une vore pericolôs che – diviers di altris puartâts indevant tai agns stâts – al pues vê sucès in gracie di une politiche regjonâl sotane dai derivadôrs e des tantis conivencis locâls: dutis robis che no si puedin gloti. Al è un atac che al scomence za a Malborghet par vignî jù un pôc ae volte cuntun sisteme a cjadene di derivazions e di centralinis, che a laran a impuarî e a suiâ dal dut il jet dal flum. Al è za sucedût su la Racolane intal comun di Scluse, là che cuatri centralinis a cjadene de societât IGF di Udin a àn fat a tocs il cors dal torint cence che chest al vedi zovât in nissune maniere a un teritori che al à tantis dibisugnis.
◆ La Fele e je stade za fa tancj agns l’obietîf di plans e progjets di sfrutament idroeletric. Di fat, tai prins decenis dal Nûfcent le veve pontade la Societât Adriatiche di Eletricitât (SADE), fondade tal 1905 a Vignesie dal imprenditôr Giuseppe Volpi, futûr ministri plenipotenziari fassist, governadôr de Tripolitanie taliane, president di Confindustrie: su la fonde di concessions governativis, la SADE e veve burît fûr un plan di sfrutament idroeletric che al interessave ancje il cors montan dal Tiliment e dai siei afluents, prime di ducj la Fele.
◆ Di chel plan e je stade realizade cun derivazions indiscriminadis dome la part dal Tiliment cu lis dighis di Sauris e Verzegnis, e lis centrâls di Dimpeç e di Somplât, lassant secs i jets, determinant un dissest idrogjeologjic pesant e fiscant il lât di Cjavaç cun ce che al jes fûr de centrâl.
◆ E jere une part di chel plan che e previodeve la costruzion di une centrâl a Damâr, alimentade di un flus sul torint Variola là che a vignivin tiradis dongje lis aghis dal Glagnò, dal Cjarsò di Paulâr e chê de Fele, cjapade sù cuntune derivazion a San Roc di Pontebe. No je stade realizade parcè che la tragjedie dal Vaiont tal Otubar 1963 e mostrà trop falade che e jere la filosofie che e ispirave chel plan. Cussì la Fele e restà salve e lis sôs aghis verdis a son ladis indevant a cori libaris te valade.
◆ Tai agns ’80, dut câs, l’ENEL, subentrât tal 1962 ae SADE dopo de nazionalizazion de industrie eletriche, al tornà a proponi simpri compagn il progjet de centrâl di Damâr. Chel progjet al veve stiçât un dibatit vivarôs jenfri lis fuarcis politichis, i aministradôrs comunâi e la popolazion dal Cjanâl dal Fier Valcjanâl. In gracie de oposizion ferme dai Comuns di Resiute, Scluse e Dogne e de mobilitazion dai lôr abitants, il progjet al fo bandonât. La Fele e jere salve ancjemò une volte. La rinunzie al progjet de centrâl di Damâr e segnave la fin de filosofie dal “grant idroeletric” ma la sô sostituzion cun chê des “centralinis”, ancje se a àn un impat ambientâl evident, a vegnin clamadis ecologjichis, e cun chê scuse i derivadôrs, pal plui privâts, a àn aromai invadude la grande part dai cors di aghe de nestre mont, fintremai chei plui piçui.
◆ E cussì, cumò il cors de Fele, che al jere jessût salf dal plan de SADE e di chel dal ENEL, al devente ogjet di interès di plusôrs sogjets. Di fat, se di une bande al è il stes Comun di Malborghet che al è interessât a realizâ une centrâl, la societât Hydro Alpe Adria e à za une centrâl che e funzione di cualchi an incà che e cjape sù la aghe in teritori di Malborghet e che le discjame a San Liopolt di Pontebe, e la Societât Idroeletriche Fella srl di Vençon e vûl costruî un implant cu la prese a San Roc di Pontebe (sì, la stesse dal plan SADE e dal progjet ENEL!) e la centrâl in localitât Braiducis di Pieretaiade, cu la relative cabine primarie che e à une conession direte ae rêt di trasmission de energjie in alte tension. Cheste ultime iniziative e à stiçât une controversie judiziarie al TAR che e tocje, in plui de societât che le propon, la Regjon, il Comun di Pontebe e il Consorzi de Vicinie di La Glesie San Liopolt.
◆ Chestis centrâls a son la anticipazion di un senari no lontan che al viodarà il cors dal flum doprât par altris implants che a laran a rindi il flum plui puar di aghe e pôcs privâts plui siôrs di bêçs. Cheste proliferazion di centralinis su la Fele, e in particolâr lis controversiis judiziariis vignudis fûr ancje cu la Idroelettrica Fella srl (che a cjapin dentri ancje Ents Publics), a varessin di indusi la politiche a sclarî lis eventuâls responsabilitâts e la Aministrazion Regjonâl, i Conseîrs regjonâi e lis fuarcis politichis a un riesam profont de politiche “liberiste” adotade fin cumò tal setôr idroeletric, vint presintis lis gnovis tecnologjiis energjetichis. Cun di plui che meti un flum tes mans di un privât par 30 agns plui proroghe nol è sigûr un bon afâr pes comunitâts, dal moment che sul fat che al vegni molât il minim deflùs ecologjic nol è nissun control.
◆ Bastarès che tai uficis dal assessorât competent a cjalassin la mape de regjon cun dutis lis tantis derivazions idroeletrichis in at par dî VONDE in maniere resonade e motivade. VONDE! Chest messaç al ven di dutis lis personis responsabilis e di bon sens parcè che nus al imponin i cambiaments climatics in at e parcè che la aghe e je un ben preziôs che o vin di finî di straçâ come se al fos inesauribil: straçâ la aghe al è come scherçâ cul fûc!
◆ Bisugne che i Aministradôrs Comunâi e i abitants de Valade a tornin a scuvierzi la volontât e i valôrs di chei che a son vignûts prin di lôr e che tai agns ’80 si son mobilitâts cui citadins par mandâ indaûr cun determinazion il progjet ENEL de centrâl di Damâr e par salvâ la Fele.
◆ I Aministradôrs Comunâi no puedin sperâ di risolvi i problemis de lôr comunitât e di une Valade che e sofrìs, metintsi de bande dal concessionari privât – cualchi volte in oposizion ai lôr stes citadins che a son cuintri dai espropris dai terens interessâts di chestis oparis – dome par tirâ i bêçs dai canui di riviere e la cuote “sore canul” dal BIM. Al contrari, a àn di sburtâ i lôr Comuns a jessi protagoniscj dal ûs coret a pro dai lôr abitants, e no dai privâts, des risorsis di ogni teritori e di dute la Val. E la aghe e je la prime robe di tignî cont. In chest a podaressin zovâsi des esperiencis concretis dai Comuns dal Trentin che di bessôi – o midiant varis formis associativis par valade – a produsin e a distribuissin energjie cu lis lôr rêts, a proviodin ae gjestion autonome di varis servizis tant che la aghe e a determinin di bessôi la tarife in fuarce di dôs sentencis de Cort Costituzionâl.
◆ Jacume, il servizi idric! Come chê de Fele, ancje chê dal rubinet di cjase e je aghe nestre, des nestris risultivis di mont. E ce aghe! Ma di cuant che no je plui “comunâl” e je deventade “salade”! Bisugne “dissalâle”, e si pues fâ dome tornantle al Comun. ❚
