SPECIÂL – Par un Teatri Stabil Furlan

I tais ae culture a samein jessi di secont plan cuant che si è intune crisi economiche come chê di vuê. Si zonte te nestre suaze ancje la polemiche di cualchi gjornâl nazionâl che par podê meti in crisi une component partitiche e à cirût di butâ pantan ancje sui progjets di valorizazion de marilenghe. Al po jessi just domandâsi se i bêçs a son spidûts ben, ma nol è just gjeneralizâ e mancul ancjemò doprâ par altris motîfs l’impegn e il crodi di tante int. Par chel o vin volût fâ cuatri cjacaris cun Bepi Agostinis, che al è impegnât tal puartâ indenant il progjet di un Teatri Stabil Furlan. Un progjet che, come al à dite lui, «dome un cjargnel al podarès stâi daûr»: une afermazion che e pant la costance par podê stâi daûr a di un progjet cussì, ma ancje la serietât tal volê podê doprâ il strument dal teatri par fâ cressi la culture e la cussience culturâl furlanis.
Bepi, continus de bataie che tu âs puartât indevant fin cumò.
«Pe prime robe, jo cumò o stoi pontant suntune Compagnie Stabil di Teatri Furlan, par vie che vuê come vuê al sarès une vore dûr otignî un Teatri Stabil. Il Stât al à cuestions une vore griviis pes risorsis dal spetacul in gjenerâl (FUS), par  chest di Rome no si pues spietâsi nuie. La mê bataie e je scomençade cu la muart di Nico Pepe, che me à lassade in ereditât. Fin che o jeri un sempliç citadin nissun mi scoltave, ma cuant che tai agns ’90 o soi stât conseîr a Udin cul prin Cecot, o ai podût scomençâ almancul a presentâ il probleme. Ducj mi àn fat grandis promessis pre eletorâls, e daspò nuie. Jo, a ogni mût, daspò vê tirât sù cuasi 4.500 firmis e lis trê firmis dai presidents des trê provinciis furlanis e chê dal retôr Honsell tal 2007, o ai continuât a lâ a bati.
Une azion costante tai agns…
A ogni elezion o ai continuât cui gnûfs rapresentants, in particolâr cun chei che a vevin di guviernâ. Cussì, ancje cheste volte o soi partît ma in Regjon pocje sodisfazion: l’assessôr Molinaro al è stât avonde clâr, che a son moments dûrs, ma che al viodeve se si podeve fâ alc, e al veve cjapât contat cui dirigjents dal C.S.S., ma in concret nuie.
Cuâi sono stâts i disvilups resints?
O ai vût un incuintri  ancje cul president de Provincie di Udin Fontanini, che par dî la veretât, cuant che o ai dite che par intant si podarès fâ ancje une Compagnie Stabil di Teatri par vie che pal Teatri Stabil a son plui problemis, lui mi è saltât sù disint che se a Triest a son trê Teatris Stabii, ancje il Friûl al à di vê il so. Mi soi consolât. I ai presentât un progjet  trienâl adun cul C.S.S., par scomençâ a fâ alc di concret. Daspò pôcs dîs, al à clamât il president dal C.S.S. Bevilacqua: o vin vût un incuintri par me entusiasmant, e in chê ocasion il president Fontanini al à fat so il progjet. Lu à viodût une vore seri e ben cualificât, dant disposizion pes risorsis economichis par scomençâ tal Zenâr dal prossim an. Intant, in chescj mês, il C.S.S. si organize par partî ben preparât: tacant propit de bande che o sin un pôc scjars – ven a stâi sul test teatrâl –, par concludi dopo trê agns cuntun spetacul fat di un regjist professionist no furlan ma che al cognòs ben la nestre lenghe, vâl a dî Gigi Dall’Aglio. Espert in lavôrs cu lis lenghis minoritariis, Dall’Aglio al à za direzût doi lavôrs in furlan, simpri cul C.S.S., «Bigatis» e la «Ultime cene di Nadâl», che a àn vût un grues sucès di public e di critiche al Teatri Giovanni da Udine. O vin inmaneât ancje un progjet pai fruts des scuelis, che a son il nestri avignî. Cumò il progjet al è seguît – o disarès cun tante passion e entusiasim – de Assessore ae culture Elena Lizzi.
Lis polemichis jevadis sù tai ultins timps di cualchi setemanâl talian a àn coinvolzût ancje lavôrs teatrâi: ce pensistu di chest?
Su la cuistion des polemichis di chei ultins dîs achì sui bêçs spindûts pai progjets sul furlan, a part la reazion de int e di tancj personaçs cualificâts, si à di dî che e je stade in fin dai fats a nestri favôr, propit parcè che i  bêçs no son stâts butâts vie. Cussì la robe e je finide tant che une bufule di savon. In plui, e je stade la rispueste concrete dal President Fontanini, che al à risolt ancje cui tais che a son stâts fats in particolâr te culture, e la  robe e va indenant.
Tornìn alore al gnûf progjet che tu nus fevelavis: cemût si struturial?
Il progjet che o sin daûr a preparâ, nol à nuie ce fâ cul Teatri filodramatic o ancje di cualchi professionist che al pense, avonde spes, di fâ Teatri par fâ ridi, parcè che la int, a disin, a domande di ridi. Cun cheste iniziative , o fasarìn un cambiament sul mût di fâ Teatri furlan. Al varà di jessi un Teatri che al puarte indenant i problemis de int di vuê, e ancje moments de storie e des tradizions dal Friûl, in maniere di fâ cognossi miôr il nestri patrimoni culturâl. Ma soredut al sarà un imprest cetant impuartant par valorizâ e par dâi plui dignitât  ae nestre lenghe, parcè che fevelant di robis seriis si varà di controlâ une vore ben il test,  no dome pal contignût ma ancje pes peraulis che si varan di doprâ: nissun talianisims, o peraulis che no sedin furlanis.
Mauro della Schiava
_____________________________________
SU LA VIE DI UN TEATRI STABIL: LA CRONOLOGJIE
1972 Alviero Negro e Lelo Cjanton a scomencin a movisi par un Teatri professionist furlan, domandant colaborazion a Nico Pepe.
1979 Nico Pepe al fonde la «Civiche Scuele di Recitazion pal Teatri furlan», in colaborazion cul Comun di Udin, che e dure 5 agns.
1999 Bepi Agostinis, tant che Conseîr Comunâl di Udin, si bat par che la Academie Nico Pepe e prepari atôrs in lenghe furlane. Al scombat trê agns par cause dal diretôr De Maglio, che nol sintive di chê bande, e i cors a son stâts fats par doi agns. Finide la esperience di Agostinis in Comun, e finìs la volontât di continuâ par chê strade.
2006 Agostinis, dopo vê lavorât par doi agns a une petizion par vê un Teatri Stabil par furlan, al consegne  a Tesini, President dal Consei Regjonâl, ben 4.700 firmis. Cuasi ducj i politics a dan la adesion, ma ae fin e ven licuidade.
2009 Il President de Provincie di Udin Fontanini al fâs bon il finanziament par un progjet di trê agns, metût adun dal president dal C.S.S. Alberto Bevilacqua. Finalmentri, intal Zenâr dal 2010 al cjaparà pît un discors professionist sul Teatri furlan.