Caneva, “mestri” dal lat e de cooperazion

I pionîrs de cooperazion furlane no son cetant preseâts inte Patrie. Ancje di resint o vin viodût, sui nestris mieçs di comunicazion, un dibatit ampli su la toponomastiche e su chei che a varessin di vê dirit a viodisi intitulade almancul une stradele o une plaçute. Tra chei che a sburtin cul comedon (a colps di  memorie) no son cuasi mai i paris meritevui de cooperazion e, tra chescj, il mancul cognossût al reste dal sigûr Eugenio Caneva di Culine di Fors di Avoltri: il levan e la paste de prime latarie regjonâl fondade ai 15 di Otubar dal 1880. Un event storic pe Cjargne e pal Friûl intîr, fi de passion e de capacitât di cjalâ lontan dal mestri dal paîs, che chê volte al contave 250 abitants.
Caneva al veve let il tratât di Gaetano Cantoni “L’industria del latte”, editât a Milan tal 1880, che al à dentri un cjapitul su lis latariis sociâls.
◆ Caneva al pandè il progjet ai arlêfs de scuele serâl dal paîs che lu judarin a realizâlu e, cussì, tal Jugn dal 1880 al butà jù un prin scheme di Statût. Ai 15 di Avost lu presentà intune riunion cun 28 arlevadôrs di Culine che ancje lôr a sostignirin la iniziative, convints dai bogns argoments economics butâts jù neri su blanc dal mestri industriôs.
Dopo chel incuintri, Caneva al le tal Belumat par visitâ lis primis fabrichis casearis cooperativis che a jerin nassudis in chel teritori, a partî dal 1872. Ai 29 di Setembar al fo depositât il Statût definitîf de cooperative e, pôcs dîs dopo, ai 15 di Otubar, l’at al fo firmât a Tumieç devant dal nodâr.
◆ Cheste schirie di acjadiments e sucêt tant di corse che al somee incredibil se o pensìn di ce epoche e di ce contest gjeografic e sociâl che o stin fevelant: un paisut a 1.250 metris di altece “segregât dal consorzi uman”.
◆ A fondâ la “Prime Latarie Sociâl Cjargnele di Culine” a forin 38 socis che a vevin a disposizion 82 vacjis e che a molzevin une medie di 100 chilos di lat in dì. Lis razis bovinis in chê volte a jerin rustichis, ma ancje pôc produtivis. Caneva nus conte che in chê volte une vacje a passon pes monts e produseve, in medie, dome 2,7 litris di lat in dì (vuê o sin rivâts a passe 20). E, par produsi il miorament gjenetic necessari, za tal 1879 il mestri al veve istituide la Stazion di monte dai taurs. Lis robis, tal prin an di operativitât, a lerin ben tant che i socis a deventarin 49 e lis vacjis in molzidure 94. I locâi di lavorazion a jerin fitâts, ma i socis, tal 1884, a deliberarin la costruzion di un edifici di proprietât e i debits a forin paiâts tal zîr di doi agns.
◆ Tal 1907, i socis a jerin deventâts 53, cuntun numar di vacjis rivât a 110.
◆ Ma la formule e à vût tant sucès che tal 1960 in Friûl si contavin ben 652 latariis sociâls.
◆ No dome une strade, a Eugenio Caneva, ma une autostrade si varès di dedicâi. ❚