Sintîju propite ducj: 40 agns di scambis di ideis e di confront sul mont

Un scroc e la puarte di len si vierç suntun coridôr scûr, indulà che une rie di casselis pe pueste e anticipe la rampe di scjalis che e mene ai studis di Radio Onde Furlane. La vôs di Sergio Venuti, un dai fondadôrs, mi compagne biel che o rivi a piduline al apartament dal secont plan che di passe 30 agns al è la cove de cooperative Informazione Friulana: «O vin comprât chescj spazis intal ‘85, di mût che chei che a saressin vignûts un doman no vessin di bacilâ pal afit. Il presit al jere bon, ma no vevin ducj chei bêçs, si che il president di chê volte, Silvano Pagani, al à metude une part di sô sachete».
◆ La puarte de sede e je cuasi simpri vierte, une metafore fisiche dal spirt stes de radio, pront ae scolte e al confront. Manifescj, discs e sfueis picjâts un pôc par dut a testemonein une ativitât vivarose e plene di colôrs, cuntun ‘siminâ continui di int e di colaborazions. «E je stade une esperience straordenarie e plene di inovazion. Un trop di furlans a vevin rivât a creâ in autogjestion une radio cetant origjinâl, che e produseve informazion no dome par furlan – novitât no di pôc in chel moment storic – ma cuntune otiche furlane, e un spirt libar e critic. Ma Onde Furlane e jere ancje un strument creatîf di produzion culturâl e adiriture militant, di mobilitazion dai furlans. A son stâts pardabon tancj i protagoniscj di chest grant miracul furlan. Desenis di miârs di lôr a vevin sotscrivût petizions a pro dal Friûl e centenârs le vevin sostignude tai moments plui grivis cun campagnis di finanziament popolâr, che a son stadis decisivis pe sorevivence de radio libare dai furlans», chest il ricuart di Federico dai Ros, altri fondadôr e une des animis de radio intai siei prins agns.
«Vuê la radio si dediche di plui al cantin de informazion e ae musiche. La prime fase, invezit, e jere militante, dongje dai moviments autonomiscj. Al jerin i agns des grandis bataiis, si lave ator a cjapâ sù firmis, magari denant dal stadi, dopo de partide. O vin judade ancje la difusion de Bibie par furlan, vendint 104 copiis», nus conte simpri Sergio Venuti.
◆ La sperimentazion al è un altri aspiet che al salte subite ae orele, sintonizantsi sui 90 MHz. «La radio e je stade un moment fondamentâl pe mê formazion, al stes nivel de scuele di teatri. Un dai compits plui stramps che o ai vût al è stât chel di inventâ dai spot: tante int si colegave dome par scoltâ la publicitât» nus dîs Claudio Moretti, che al à ancje vude la incarghe di diretôr par un periodi.
«I timps però a mudin e ancje la radio e veve bisugne di rinovâsi, tocjant altris problematichis, no dome chê de autonomie», al sclarìs Mauro Tosoni, diretôr ae fin dai agns Otante che cu la sô voglade al à cirût di potenziâ l’aspiet gjornalistic, par che la radio e deventàs il prin imprest di informazion par furlan in Regjon. «O vin cirût un rapuart cui comitâts, cu lis assembleis, di mût di dâi vôs a dutis lis espressions dal teritori. E je stade dade ancje plui legjitimazion aes istituzions, clamant i rapresentants politics dai diviers orientaments, simpri cu la pussibilitât di fâ intervignî chei che a scoltavin di cjase. Ancje par chel che al inten la culture, a son stâts tirâts dentri ancje personaçs che magari no fevelavin par furlan, ma a vevin cetant ce dî».
«Dal rest, une carateristiche fondamentâl di Onde Furlane e je simpri stade chê di slargjâsi a altris viodudis cence preconcets o discriminazions. No par nuie e je stade une des primis radio in regjon a vê un speaker di colôr. Cussì, nol è stât nissun scjas cuant che o soi stade nomenade diretore», nus conte Marina Tolazzi. «La nomine in veretât e jere dome une formalitât, parcè che un altri aspiet di fonde de cooperative al è chel dal confront, di mût che lis decisions a sedin espression de colegjalitât».
«I zovins di cumò a son daûr a fâ un biel lavôr. O scolti vulintîr lis trasmissions e mi capite ancje di passâ par là, cualchi volte. Ogni tant mi domandi cemût che a rivin a stâi daûr di dut».
Dal rest, chest forsit al è il segret di une realtât che plui di cualchidun al veve strolegât e sarès durade dome un pâr di mês e che invezit di plui di 40 agns e va indevant a fâ sintî la sô vôs. Une vôs libare, furlane e fuarte. ❚