“Dentri dal 2023 il guvier sloven al à intenzion di tirâ sù une altre centrâl nucleâr par sodisfâ la dibisugne di energjie eletriche dal paîs”. Cussì al fevelà al inizi di chest an il ministri sloven de Economie Andrej Vizjak, che al voleve zontâ – e cheste e jere la idee di dut il guvier di centridrete – un altri reatôr ae centrâl di Krško in mût di sigurâ ae Slovenie la autonomie energjetiche.
Ancje dopo l’incident dai 4 di Jugn stâts lis robis no somein cambiadis. Secont il personâl adet ae sicurece, no si pues nancje fevelâ di vêr incident, stant che si è vude une pierdite dal licuit di disfredament che e à obleât i tecnics a distudâ il reatôr. Il probleme, simpri stant ai esperts nucleârs, si è vût dome dentri tal implant, e duncje no je stade nissune contaminazion radioative difûr de centrâl. Siben che tai ultins cuatri agns il reatôr al sedi stât blocât za altris trê voltis par evitâ problemis, chest colp l’incident di Krško al à fat scjas in dute Europe. Di bande lôr, i tecnics slovens a àn fat il lôr dovê visant daurman la Comission europeane e la Agjenzie internazionâl de energjie atomiche cun sede a Viene, ma no son mancjadis critichis dai paîs dongje, oben Italie, Austrie e Ongjarie. L’incident al pararès jessi stât pocje robe, stant che nancje une setemane plui tart la centrâl e je tornade in vore a regjim complet. Secont l’espert nucleâr sloven Matjaž Ravnik, problemis di tal sorte a capitin in Europe cuasi ogni mês, e il sisteme di comunicazion dai vuascj in ambit Ue nomenât Ecurie al riscjie dome di incressi la pôre de int.
Par disfredâ il so reatôr, la centrâl di Krško, la uniche di dute la Slovenie, e dopre la aghe dal Sava, che – e nol è un câs – passade la centrâl si cjate a jessi plui cjalde di cualchi grât, cun fuart impat su l’ecosisteme dal flum. Come dutis lis centrâls di chest mont, Krško si cjate a frontâ ancje la grivie cuestion des scoriis nucleârs. Pal moment lis scoriis a vegnin logadis li dal implant in vascjis di disfredament e in contenidôrs di açâr, ma di ca a trê agns nol sarà plui puest par lôr. La int che e vîf culà e à simpri dât cuintri a la idee di vierzi un centri di racuelte fûr dal implant. Si calcole che fin al so sfantament proviodût pal 2023 la centrâl di Krško e varà produsût in dut cirche 18 mil metris cubics di materiâl radioatîf.
Ma la int che e vîf atôr de centrâl ce disie? In pratiche a son trê lis reazions: cui (dut câs pôcs) che a pensin che la centrâl e vedi puartât ricjece, cui che al à acetât la situazion cemût che e je e si adate a vivi dongje de centrâl mangjant la verdure dal ort di cjase, cui che invecit al domande di sierâ daurman l’implant stant che al è un pericul pe salût de popolazion. Al somee adiriture che la int dal puest e vedi savût dal incident cjalant la television, ven a stâi che nissun de centrâl si è scomodât di visâ par timp i abitants di Krško e frazions.
Ancje i mieçs di informazion slovens a àn reagjît in maniere divierse al incident dai 4 di Jugn. Pôc spazi ae notizie sul principâl cuotidian dal paîs, il Delo, che la dì dopo e à risiervât ae gnove dome un articulut in tierce pagjine. Notizie tes “curtis” ancje pal Vecˇer di Maribor e lis Primorske Novice di Cjaudistrie, mintri la dì dopo dal incident il Dnevnik al à viert la prime pagjine dal gjornâl propri cu la gnove su Krško. Televisions, radios e sîts internet a àn fevelât cetant dal acjadiment, cirint tal stes timp di fâ clarece e di cuietâ la int. Particolâr atenzion e je stade dade a lis reazions in dute Europe e soredut a Bruxelles di bande de Union europeane, stant che fin ai 30 di Jugn la Slovenie e je stade presidente di turni de Ue par un semestri.
_______________________________________
Storie e avignî de centrâl
La centrâl di Krško al è l’unic implant nucleâr de Slovenie; come che si pues viodi te cjartute in bande, si cjate a soreli jevât di Lubiane sul flum Sava, ad apene vincj chilometris de Crauazie e a uns cincuante di Zagabrie. Udin invecit e je a uns 160 km plui a ocident; plui o mancul ae stesse distance o cjatin Triest, Flum e Graz.
La centrâl e à tacât a jessi fate sù tal 1973 e e je jentrade in vore tal 1983; e varès di jessi sierade dentri dal 2023, ma il guvier sloven in cjarie al proviôt di radoplâ l’implant zontant un altri reatôr. In dì di vuê Krško e sigure un cuart de dibisugne energjetiche de Slovenie e un cuint di chê de Crauazie.
L’implant nucleâr di seconde gjenerazion, dotât di un reatôr Westinghouse (tecnologjie statunitense), al à une potence di 696 Megawatt e ogni an al prodûs cirche 5200 Gigawattore (5 miliarts 200 milions chilowattore). Midiant une rêt di 400 Kv, Krško e je colegade cun diviers centris di distribuzion sei in Slovenie sei in Crauazie, stant che e je controlade adun dai doi paîs cu la joint venture Nek (Nuklearna Elektrarna Krško).
Par savê alc di plui su la centrâl, o podeis lâ a viodi www.nek.si (sît internet in sloven, crauat e inglês).
Une centrâl ancje in Cravuazie?
Tai ultins mês ancje a Zagabrie si fevele di vê une centrâl dute “crauate” lassant Krško ai slovens. Il stes prin ministri Sanader, pôcs dîs daspò dal incident in Slovenie, al à declarât che il paîs al à bisugne di un so implant in mût ancje di podê vendi energjie in Europe. Al sarès za stât individuât il lûc, dongje Osijek su lis rivis dal Danubi. Il fat che il puest si cjatedi a uns cent chilometris di Belgrât, capitâl de Serbie, al riscjarès di peiorâ i rapuarts fra i doi paîs, che, si sa, no son mai stâts bogns. A dî il vêr, al podarès capitâ ancje il contrari, oben che Crauazie e Serbie a decidedin di fâ sù insiemi cheste centrâl par rivâ ae autonomie energjetiche.
Ma ce saraial dal Danubi?
