Intal 2013, une diagnosi che no lasse dubis: adenocarcinome al pancreas, intun stât tant indenant di no podêlu operâ. Di chê volte Andrea Spinelli, sicilian di Catania ma di vincj agns furlan di adozion, al à cjatât «la maniere di reagjî, intal mût plui sempliç che al è, cjaminant». Plui di 18 mil chilometris in siet agns. Cuant che lu clami al è inte Val Claudane in Friûl. Al plûf fis, ma lui al à fat za vincj chilometris tra i trois cence non, intai boscs. «O ai di dî graciis ai miedis e ae mê femine. Cumò o vivìn intun camper che o vin “batiât” Tano il gabbiano. Cussì o podìn lâ ator a scuvierzi la nature di dongje». E a strenzi leams fuarts cul Friûl: «Ducj mi vevin metût in vuardie: i furlans, int sierade. Jo o ai cjatât un popul fuart che cence dî nuie al fronte lis tragjediis: o pensi al taramot e a cemût che si è tornât a tirâ sù. Il taramot al è dispès par me une analogjie cu la malatie».
◆ Cjaminant dilunc de vie Francigjene, cjalcjant lis olmis dai pelegrins antîcs, Spinelli par trê voltis al è rivât Rome: «Il cjamin di Sant Francesc par me al è font di ispirazion, e dilunc dal percors o ai cjatade ospitalitât in acets puars, glesiis e convents o inte mê tende». Lis tapis romanis a son stadis in Vatican, a Trastevere e al ministeri de Salût «dulà che mi à ricevût il viceministri Pierpaolo Sileri. Mi à domandât cemût che al podès judâmi. O ai rispuindût: divulgant la publicazion sientifiche».
◆ La storie di “Andree, chel che al cjamine” e je finide su lis pagjinis dal Journal of Cancer Metastasis and Treatment. Al è stât definît «un câs unic tal mont». Il so cuarp al à reagjît: «O ai un sisteme imunitari particolâr che cul moviment al oten rispuestis positivis e al bloche lis metastasis. Une fortune che no àn ducj: no tu sâs cetant che mi displâs par chei altris malâts che nus lassin masse adore. Magari cussì no, la ativitât fisiche no bat il cancar» al sclarìs cun semplicitât.
◆ Lui al va indevant, e intant al à scrit doi libris Se cammino vivo, e plui di resint Il camminante, e sul so blog al inzorne i tancj followers su lis “cjaminadis” cuotidianis. Incuintris, pôris, sperancis, i pit-stop che a coventin par ricjapâ lis fuarcis, la pandemie che si è lâts a pericul che e blocàs dut e la autocertificazion par continuâ, parcè che «se o cjamini, o vîf». ❚