Ream Unît, Johnson al vûl il “No deal” e in Scozie e in Gales e cres la voie di indipendence

Al va dilunc il braç di fier
tra Londre e Brussel.
Il Plaid Cymru al presente
un plan di pueste
Al sofle aiar di burlaç parsore des tratativis jenfri il Ream Unît e la Union Europeane (UE) par sierâ cuntun acuardi la Brexit e par imbastî relazions di sest tra lis dôs parts pal avignî, dopo completât il divorzi. Vie pal mês passât, Londre e à tornât a alçâ la vôs. In particolâr, il prin ministri Boris Johnson, ai 7 di Setembar stâts, al à fat capî cence zîrs di peraulis che nol à nissune voie di dâ acet aes cundizions fatis indenant de UE par rivâ a un acuardi complessîf in cont de Brexit e dal “post Brexit”.
◆ Il premier al à fintremai lançât une sorte di ultimatum, disint che si à di rivâ a sierâ la tratative daurman, dentri dai 15 di Otubar, cuant che e je previodude la gnove riunion dal Consei European (che di chel a fasin part ducj i cjâfs di stât o di guvier dai Vincjesiet, il president Charles Michel e la presidente de Comission Europeane, Ursula Von der Leyen). In câs contrari – al à zontât l’inculin dal numar 10 di Downing Street – Londre e larà indenant su la strade dal “No deal”, ven a dî la Brexit cence acuardis.
◆ Ancje la rispueste di Brussel e je stade fuarte e clare. Michel Barnier, che dal 2016 al vuide il grup che pe UE al sta daûr des tratativis cun Londre, al à marcât daurman che «Dut ce che al è stât sotscrit al à di jessi rispietât», intant che Ursula Von der Leyen e à visât Johnson che il rispiet dal acuardi che al regole la separazion fra Ream Unît e UE al è «un oblic previodût dal dirit internazionâl» e «il prerecuisît par cualsisedi relazion pal avignî».
◆ I berdeis che no si rivin a disfâ a tocjin soredut la situazion de Irlande dal Nord. Un an indaûr Londre e Bruxelles a vevin concuardât che pes sovenzions di stât aes impresis nordirlandesis si varès vût di lâ daûr de regulis de UE, cun chê di dâ garanziis di coretece ae concorence cun chês de Republiche de Irlande, che e fâs part de Union, ma cumò i conservadôrs britanics a son daûr a fâ buine une leç che i fâs cuintri a diviersis previsions di chel acuardi.
◆ In cont de cuistion al à cjapât posizion ancje il president dal Parlament European David Sassoli, marcant che «il Ream Unît al à di rispietâ ad in plen i impegns che al à negoziât e sotscrit l’an passât, massime par ce che al tocje i dirits dai citadins e la Irlande dal Nord».
◆ Intant che il braç di fier cu la UE al va dilunc – e pal moment no si sa ancjemò cun ce risultâts – al cres ancjemò il desideri di autoguvier e indipendence des nazionalitâts “altris” dal Ream Unît. Dai gnûfs scandais fats in Scozie al salte fûr che, rispiet al referendum dal 2014, in dì di vuê la percentuâl di chei che a son a pro de indipendence e je maioritarie, tocjant la cuote dal 59%. Sîs agns indaûr dome inte zone di Glasgow – che e je une de plui popolosis – il «Sì» al veve cjapât la maiorance, intant che inaltrò e jere restade sot dal 50%. Cumò, impen, a son cinc lis circoscrizions teritoriâls là che i indipendentiscj a saressin in maiorance, cemût che al ven ricuardât ancje intun articul jessût su The National.
◆ Une tindince di cheste fate e ven indenant ancje in Gales, là che l’indipendentisim al à molât di jessi un fenomen margjinâl. Cun di fat, daûr di une rilevazion fate pôc timp indaûr di YouGov, chei che a votaressin «Sì» intun referendum su la indipendence a son il 32% dal eletorât, intant che un scandai compagn fat intal 2017 ju pesave ator dal 24%. De gnove ricercje a saltin fûr ancje altris dâts interessants, stant che a saressin a pro de indipendence il 43% dai plui zovins (te classe di etât jenfri i 18 e i 24 agns) e, pe prime volte, ancje la maiorance (il 51%) dai eletôrs laburiscj. Une prime rispueste a chestis aspirazions e je rivade ai 25 Setembar de bande dal Playd Cymru (PC, il partît nazionalitari progressist galês), che al à fat bon un document programatic di pueste. ❚