✽✽ Cualchidun forsit lu à scrit, e dal sigûr cualchidun al è daûr a aplicâlu. Al è un manuâl di cuintriinformazion, o olsarès definîlu di “cuintrivuerilie psicologjiche” intai confronts de peraule Friûl e di ducj i siei derivâts, sostantîfs o adietîfs che a sedin. O pensavin di jessi rivâts al colm – dal sigûr de stupiditât – cul logo “Io sono Fvg” par firmâ la promozion des nestris ecelencis intal setôr agroalimentâr, ma o vin di ricrodisi.
✽✽ Cuntune circolâr dal assessôr Rosolen, cumò si ponte in maniere direte al cûr dal probleme, si tache il baluart, la essence de identitât: la lenghe furlane. Si rive a tocjâ un dirit costituzionâl tant che chel dal so insegnament intes scuelis, otignût dopo tantis bataiis e metût in vore ore presinte cun mil dificoltâts e gjambadoriis. Une operazion, chê de Rosolen, inmascarade di eficientisim burocratic che invezit e bute un invît precîs ae dirigjente scolastiche, che e à domandât l’anulament dal cors di furlan intal so istitût “par vie dal Covid 19”: “Che no ciri di miorâ la ufierte formative, che no si dei di fâ par cjatâ une soluzion, ma che e ledi pûr indenant a calcolâ l’insegnament de lenghe furlane dal dut secondari e ininfluent”.
✽✽ Il smaniament di une classe dirigjente che e cîr in ducj i mûts di dineâ la esistence e la coabitazion istituzionâl, ma sfuarçade, di dôs realtâts tant che il Friûl e Triest, al dimostre cemût che il procès di omologazion al provi cumò a sfuarçâ i timps.
✽✽ Al dimostre ancje che cheste “ansie di prestazion” de bande dai politics talians e nas di frustrazions pregressis o ben de constatazion di cemût che tantis voltis a àn falît cuant che la rispueste dai furlans si è fate sintî fuarte e clare.
✽✽ Il centralisim esasperât, la cjace ae diversitât – in cualsisedi forme e lûc che si presenti – par podê vinci a puedin contâ dome suntun Friûl debil, dividût e sturnît. Une cundizion che e permeti di fâ passâ ben altris progjets, ancje di nature istituzionâl. Ve parcè che al torne a comparî dispès il tiermin “Tre Venezie” e si celebre la concuiste veneziane.
✽✽ Intant si umilie la Costituzion e si permet ae scuele di lâ cuintri de leç. Figurìnsi il rivuart che a varan cuant che si tratarà di frontâ i problemis de economie, dal ambient, o lis grandis oparis!
✽✽ Argoments e decisions li che i Furlans – ridusûts a espression gjeografiche pure, e forsit nancje plui a chê – no varan nissun dirit di repliche. ❚