TERITORI – AUSTRIE. Il teatri in Austrie: a Viene al è un plasê «lâ a cjistiel»

Il Burgtheater al è un simbul dal sucès e de malefin dal vieri imperi austriac_ Tant che inaltrò in dute Europe, ancje in Austrie o cjatìn fûr lis lidrîs de rapresentazion seniche te Ete di Mieç. Il nusel dal drame cristian al fo la liturgjie de Messe tal timp di Pasche. Dentri de glesie, par mieç di ats e di cjantis simbolichis, si simbolizave la resurezion di Crist. Plui indevant cul timp, i zûcs a deventarin plui realistics e siôrs di senis diferentis. Alfin a durarin plusôrs dîs e si davuelzerin sui marcjâts denant de glesie, tai grancj centris di Viene e dal Tirôl: i atôrs a forin pe prime volte i citadins, e al puest dal latin si doprave il todesc.
Il teatri baroc austriac, il predecessôr dal teatri tant che lu cognossin vuê, al tacà cul an 1584 cu la performance dal «Speculum Humanae Vitae», ae cort di Innsbruck. E jere la prime comedie scrite in prose todescje dal Arciduche di Austrie Ferdinant II dal Tirôl (fi dal imperadôr  Ferdinant di Asburc).
La imperadore Marie Taresie e screà il teatri moderni austriac_
Tal 1741, la imperadore Marie Taresie e stramudà il vacant «Hofballhaus» intun teatri; di chê volte, il teatri de cort al fo ancje acessibil ai citadins. Tal 1888 al fo viert il gnûf edifici dal Burgtheater sul Ring (la strade che e zire ator ator dal centri di Viene), dulà che si cjate ancjemò vuê. Daspò la colade de monarchie, il teatri imperiâl «Hofburg Theater» al deventà uficialmentri il «Burgtheater», il prestigjôs teatri nazionâl de Republiche, il plui impuartant de Austrie, e il lûc plui adat pes produzions dramatichis di art classiche e moderne dal paîs. Dotât di 1175 puescj pai spetatôrs e cuntun spazi senic di cirche 780 metri cuadrâts, al è il plui grant teatri di lenghe todescje, e daspò la Comédie-Française, il secont plui vieri in Europe.
Za dal imprin, il teatri al veve nons diferents: prin i disevin «teatri imperiâl al flanc dal cjistiel», fin al 1918 «teatri imperiâl di cort e di cjistiel», e dopo al divente il «Burgtheater», o – come che lu clamin vuê – dome «il cjistiel» («Burg»). Di conseguence, i atôrs di chest teatri ju clamin «Burgschauspieler», ven a stâi «atôrs dal cjistiel». Il grant pitôr Gustav Klimt e so fradi Ernst si son dedicâts tra il 1886 e il 1888 ae decorazion dal Burgtheater. I doi artiscj a àn produsût une schirie di pituris di grandis dimensions cun imagjins dal teatri antîc, e senis des oparis di Shakespeare e di Molière.
La lenghe todescje doprade in chest teatri e je considerade une lenghe dal dut particolâr, une fevele biele e melodiche, un miscliç dai mûts di pronuncie di dute la aree di lenghe todescje. Cussì, la int in Austrie a une pronuncie biele o masse standard, i dîs «il Burgtheaterdeutsch».
Brusât dal dut tal 1945, il Burgtheater al fo restaurât e tornât a vierzi tal 1955. Vuê, al gjolt, a diference di altri teatris, di une alte e continue popolaritât: a Viene al reste un plasê «lâ a cjistiel», e ancje la nomine dai sovrintendents che si sotentrin e je simpri argoment di conversazion costante de societât vienese.
JANEZ ERAT