_______________

I 75 agns de “Patrie” di ducj i furlans

Pal secont an il Friûl al varà di memoreâ la Fieste de Patrie ai 3 di Avrîl dome in forme simboliche. Nuie fiestis in place, nuie incuintris, ni iniziativis. Lu domande la sanitât publiche, lu domande la creance viers ducj chei che a àn patît e viers chei che a lavorin par no fâ patî. Intai ultins 5 mês o vin paiât un presit di vitis umanis 3 voltis plui alt di chel dal taramot dal 1976. E alore, parcè si varessial di fâ fieste, di tirâsi dongje intor di une bandiere, cuant che tal mês a pene finît o sin stâts la Regjon de Italie che e à vût plui infetâts e muarts in rapuart ae popolazion, e o vin mostrât di no vê imparât nuie di ce che al è sucedût intal ultin an? Nissune retoriche e pues scancelâ un an neri come il 2020 che al à segnât il 15% di muarts in plui de medie dai agns passâts. Ma se la identitât e je, e se e je fuarte, ricognossile e afermâle no je retoriche, e je necessitât. E je la stesse bisugne che i furlans a sintivin intun altri moment dulà che la Storie e je rivade a une crosere decisive, ven a stâi ae fin de seconde vuere mondiâl. Intune tiere disfate e cence prospetivis dopo dôs vueris grandis e vincj agns di ditature, doi oms cetant diferents, Josef Marchet e Felix Marchi, a faserin nassi tal 1946 un sfuei autonomist indipendent setemanâl, che a clamarin “La Patrie dal Friûl”. Un al jere un predi, chel altri al jere anarchic: ma il Fassio ju veve “atenzionâts” ducj i doi, pe voie soversive di pandi par furlan lis lôr ideis che su chel gjornâl a faserin daurman une vore di scjas.
◆ Chei doi visionaris si domandavin: sarino ae altece de prove che o vin devant? E la rispueste e jere che la uniche forme di libertât che i furlans a podevin vuadagnâ e jere chê di jessi metûts in cundizions di fâ “di bessôi”, di proviodi in autonomie aes lôr dibisugnis e cjapâ su lis spalis la responsabilitât des sieltis che a rivuardavin la lôr int. No jerin di bessôi a pensâlu: in chel periodi si jere dismote une cussience che e meteve dongje cerviei di gale, di Zuan Franc D’Aronco a Pier Pauli Pasolini, ma ancje Alessandri Vigevani, Ludovì Zanini, Artûr Toso, Antoni Faleschini, Alvise De Jeso e Zorç Provini, cun Tizian Tessitori che al sierave chel cercli.
◆ Al sarès un erôr dismenteâsi che chest sfuei al è nassût juste 75 agns fa par cjatâ une clâf identitarie pe rinassite dal Friûl. Nô o pensìn che la identitât e la prossimitât a sedin ancje pai agns a vignî la uniche clâf par dismovi la nestre tiere e dâi une gnove prospetive cuant che si podarà tornâ a fâ sù alc su ce che al restarà dopo de emergjence dal Covid. Ricuardâsi di Marchet e Marchi al è il nestri mût di fâ fieste ae Patrie: e lu fasarìn ai 6 di Mai, intune dì che i furlans no puedin dismenteâ, intun incuintri che al jentrarà intes iniziativis de Setemane de Culture Furlane inmaneade de Societât Filologjiche, ancje jê nassude des maseriis di une vuere mondiâl, la prime. Ducj voaltris o podarês fâ i auguris “in streaming” al unic gjornâl par furlan, il sfuei dai furlans che no si rindin. Nancje ae pandemie de identitât. ❚