«La ACLiF e pues jessi un bon cjapiel par decidi pal ben comun. Nus covente, ma si po dâi fuarce dome cu la concretece»

Interviste a Roberto Revelant,
sindic di Glemone e za conseîr regjonâl
Roberto Revelant, 42 agns ma za cuntune lungje cariere politiche fra comun e regjon, al è il prin di un trop di sindics che a fasin part de ACLiF- Assemblee de Comunitât Linguistiche Furlane che o intervistarìn par savê di lôr ce sens che à la apartignince a chest organisim che al met dongje i comuns furlanofons. Ancje se mi sarès plasût fâ un zîr te biele Glemone, la interviste e je telefoniche: covid docet…
__
Sindic, Glemone al è un dai comuns plui grancj che a son inte ACLiF, ce rapresentie par lui cheste istituzion e ce rûl pensial che e vedi di vê?
In chest moment storic, li che si varan ancje di decidi lis strategjiis pal futûr, al sarès ben metisi adun e cirî insiemi une vision par chel che al vignarà. Duncje al è benvignût un organisim che al rivi a meti dongje variis realtâts locâls: o feveli di impresis, aministradôrs, associazions. E che al feveli des prospetivis economichis, no dome culturâls: cumò come mai o vin di superâ i localisims e di fâ scuadre. Ma, fra i mil impegns che aromai ducj i cuarps sociâi a àn, al à di jessi alc che al mostri di podê mudâsi dopo in fats. Se si sarà bogns di dâi cheste ande, al sarà di sigûr un organisim che nus coventarà tant.
__
La Associazion podaressie vê un rûl tal ecuilibri teritoriâl jenfri Friûl e Triest, che tai ultins timps al somee saltât?
Mah… No sai ce che e podarès fâ in chel cjamp: par esempli Pordenon tantis voltis al à mostrât di lâ par so cont o preferî Triest. Dut câs Triest e je une citât che e à sù par jù un sest de popolazion regjonâl, un puart che al devente impuartant e cheste robe no si pues ignorâle.
__
I Comuns furlanofons che a àn aderît ae ACLiF fin cumò a son dome trê cuarts di lôr. Ce si sintial di dî a chei che no son ancjemò dentri?
Pardabon no àno aderît aromai cuasit ducj? A chei che a mancjin ur disarès che o vin di metisi adun, si capìs! Se Markus (Markus Maurmair, il president de Assemblee, ndr) mi da i comuns che a mancjin, ur telefoni jo a chei che o cognòs par sburtâju a jentrâ.
__
L’an passât la ACLiF e à inviât un cors pe formazion dai aministradôrs su storie e culture dal Friûl. Lui e i siei coleghis sêso preparâts sul Friûl? Ise une robe che e pues jessi utile?
Jo no ai vût mût di partecipâ (al è stât un esperiment, cun pôcs incuintris, ndr), ma dal sigûr mi interessarès. Jo che o ai une formazion scolastiche di stamp tecnic mi rint cont di vê cualchi buse in cjamp plui storic o culturâl. Però mi plasarès une robe svelte, pratiche, che ti dedi informazions, ma che ancje ti fasi capî cemût passâlis daspò in azion tal lavôr di ogni dì.
__
Cemût mai Glemone no aie ancjemò fat bon il Plan speciâl di politiche linguistiche (PSPL)? Lu cognossial?
E je une robe che e à a ce fâ di plui cul lavôr dal assessôr ae culture, ma dut câs o scuen dî che, come par tantis robis, magari cussì no, cui impegns che a àn i comuns e je une di chês robis che e je restade indaûr. Che al pensi che pe fin dal mês o varessin di concludi un plan di digjitalizazion dal Comun che no sai se o rivarìn a prontâlu par timp, che si figuri viodi di tantis altris robis, se ben impuartantis.
__
Ise cussì dure la vite dal sindic di cumò?
La cjame di impegns e di burocrazie che al à cumò un sindic e sta deventant insopuartabile: jo o ven in Comun aes nûf a buinore e o voi vie aes siet, e us siguri che no ai un moment vueit. Si finìs ancje cul trascurâ la famee. Une robe che no sucêt fûr de Italie: o fevelavi une volte cul sindic di Velden, in Austrie, che mi diseve che lui al va in Comun une volte in dì, al controle che dut al ledi ben e dopo al torne a cjase.
__
Une situazion propit taliane, duncje…
Si pues fâ tant miôr ancje in Italie. Cuant che o jeri in Consei Regjonâl mi soi ocupât de scriture di cualchi leç, une robe che mi à cjapât, e dopo mi soi confrontât cun coleghis de Val di Aoste o dal Trentin-Sudtirôl: o varessin di imparâ di lôr. Lis lôr leçs a son plui semplicis e a lassin la libertât che lis robis si regolin di bessolis. Chi di nô si metin jù mil câs pussibii cuntune complicazion mostre. Jo o cjali tant che model massime ae Provincie Autonome di Trent parcè che al è un sisteme dongje dal nestri, ma che al funzione miôr. Chê di Bolzan, a lei lis leçs, ti ven ancje il dubi che no fasi part dal ordenament talian (al rît, ndr).
__
In Regjon, la tutele dal furlan dispès e je dome di façade, lui isal dacuardi che la lenghe furlane e sedi insegnade a scuele ad implen?
Sigûr, ma cence trascurâ l’inglês, che aromai ti covente par fâti capî tal forest. In Gjermanie o in Ongjarie, par esempli, lu san ducj. E dopo il todesc al è impuartanton. Il furlan al va insegnât, ma nol à di gjavâ spazi a chês altris lenghis: par me l’ideâl al è che in Friûl si insegnassin e si fos bogns di fevelâ cuatri lenghis.
__
Par finî, mi disial cualchi particolaritât di Glemone pardabon furlane?
Cu la storie siore che e à Glemone – e une storie che e à dut a ce fâ cul Friûl – lis particolaritâts a son tantonis. Tacant dal fat che achì al è nassût pre Bepo Marchet, tra lis altris robis un fondadôr dal vuestri gjornâl. Duncje us conti alc che o ai imparât propit jo di resint. Come che si diseve parsore, chês robis dal Friûl che si varessin di insegnâ miôr e che a son dôs ecelencis mondiâls.
O vin il regjistri batesimâl plui vieri che al sedi cognossût, cui prins scrits dal 1379. Prime dal Concili di Trent, cun di fat, nol jere l’oblic di regjistrâ i batisims.
Il Santuari di Sant Antoni di Glemone al è il santuari plui vecjo dedicât al sant: Sant Antoni si jere fermât a Glemone par cualchi mês, predicjant e fasint miracui. La glesie e fo consacrade intal 1248. Ben prime di chê plui innomenade di Padue, par dî. ❚
.::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Cui che al è il sindic di Glemone
Roberto Revelant al è nassût ai 21 di Novembar dal 1978 a Zurì, in Svuizare; di profession gjeometre, al è stât za intal 2004 membri dal Consei comunâl di Glemone, cuvierzint intal 2009 la cjarie di Vice Sindic. Al è stât elet Conseîr regjonâl pe XI legjislature (2013-2018) cul partît Autonomia Responsabile. Dal 2018 al è sindic di Glemone.❚