Cjare la mê tiere

Altri che Recovery Fund:
viaç esclusîf daûr des olmis dai “grancj progjets” che si son pierdûts par strade
Cartei smamîts e impussibii di lei, struturis lassadis a ragns e carûi, segnaletiche dismenteade tal mieç dal nuie. A son dome la ponte di un iceberg che si plate sot di progjets finanziâts e plantâts a miezis o fintremai bandonâts cence nancje mai vê viodût un cantîr.
◆ E in Friûl, no cate il virtuosisim a pet di tantis altris regjons talianis (stant ai dâts dal 2018, suntun totâl di passe 500 oparis publichis no conclududis, cuasi la metât e je logade intes solis dôs isulis), a son tancj i lavôrs, inviâts in gracie di fonts rivâts di cualchi bant, massime di chei europeans, che a faturin a lâ indenant e a van a risi di fâur compagnie ai palaçats abandonâts e fîs di chei agns che la atenzion al teritori no jere cussì fuarte.
◆ Tra lis cicatrîs che si cjatìn su la piel regjonâl, di fat, no podìn dismenteâ dute la infrastruture militâr che nus à regalade la nomee di paîs di “pestelacs e casermis” ma, cence lâ a tocjâ i cantins di vuere, ancje par cuistions di straviament o sin stâts bogns di plantâ biei conis, cemût che nus testemonein ducj i implants schiistics sierâts (e no par colpe di ordenancis ministeriâls) li che la sperance dade de nêf si à subite sfantade intune buse te aghe, impen di un rimpin pe economie.
◆ Altris câs, cualchidun pardabon grotesc, tant che la fantasime dal trafôr di Mont di Crôs o i binaris pierdûts de Cjargne e dal Gurizan, si ju cjate intal volum di cualchi an indaûr “Progetti e opere. Testimonianze di 50 anni” par cure di Gaetano Cola e Giorgio Dri (Forum, 2008).
◆ La liste des propuestis coladis intal vueit e je lungje e pronte a cjapândi dentri tantis altris: fevelant di culture, par esempli, nus parin significatîfs i câs dai museus fantasimis, tant che chel Nazionâl di archeologjie subacuie di Grau, che daspò di plui di 25 agns (e passe dîs milions di euros) al à ancjemò di jessi viert al public, o ben chel archeologjic dal Stele di Palaçûl (atîf par cualchi an tai agns Novante), che al varès vût di tignî dentri ancje i rescj de “frutine di Blancjade” (repert dal Neolitic), o ancjemò il Centri di Documentazion e di Catalogazion sui Magrêts di San Quarin, opare ferme daspò plui di 10 agns.
◆ Di cualchi timp, dut câs, la tindince e je chê di scandaiâ cun atenzion il teritori par une progjetazion smirade e cussiente des potenzialitâts e dai limits de zone, di mût di sghindâ il pericul di straçâ bêçs e di fâ sù catedrâls tal desert. I stes ents finanziadôrs, dal rest, a son simpri plui atents ai contignûts des domandis e ancje i comuns plui piçui a àn imparât a movisi dentri dai labirints dai bants, locâi ma ancje internazionâi, che a dan la pussibilitât di realizâ ideis ancje in grant, cence dilapidâ i fonts dal belanç. Dongje dai funzionaris dai uficis tecnics, duncje, a vegnin individuadis figuris di pueste par ideâ programs di ricualificazion, studis di fatibilitât e progjets di riconversion, cun soluzions dispès atrativis, che si cjatin però a trussâ cuintri de otusitât di cierts aministradôrs (cualchi volte al baste un cambi di zonte par mudâlis in cjistiei di cjartis) o ben cuintri di altris fatôrs no considerabii su la cjate (massime se, come che al sucêt, i consulents a vegnin di fûr regjon).
◆ Cussì, tra lis oparis za prontis a jessi dispierdudis prime ancjemò di viodi la lûs, e va a risi di finî ancje chê “Dai cjastelîrs ai dôs”, pe creazion di une arborade dulinvie dai lûcs storics e culturâi plui carateristics dal teritori codroipês. Pecjât che, daspò vê plantadis lis primis plantutis (par une prevision totâl di 1202 arbui), al somee che il Comun si sedi dismenteât di nomenâ intal plan trienâl des oparis il progjet finanziât di plante fûr de Regjon par 250 mil euros, dentri dai Progjets integrâts di paisaç (PIP) atuatîfs dal Plan paisagjistic regjonâl (PPR F-VJ). E cuissà che chel di Codroip nol sedi dome il prin a pierdi colps tra i 30 progjets fats bogns dentri dal PPR.
◆ Par cuintri, però, bisugne marcâ che, in dì di vuê, il lavôr di mobilitazion di bande di citadins e di comitâts par scjassâ la opinion publiche al da la pussibilitât no dome di tignî monitorade la situazion, ma ancje di intervignî in maniere direte tes decisions di finanziament. Cussì, par esempli, ancje in gracie des firmis cjapadis sù vie pal an passât e di un manifest prontât di pueste di lavoradôrs, cooperativis, pazients e altris sogjets, la zonte regjonâl e à metût a disposizion 25 milions di euros par salvâ il Parc di S. Svualt (tutelât de Comission Regjonâl Patrimoni Culturâl de fin di Zenâr dal 2021), cul recupar dai vecjos paveons (e di passe 1200 plantis) e la realizazion di un Museu de Memorie. E sperìn pardabon che cumò nissun si meti a çavariâ su chest cont. Starìn a viodi ce che al nas (o al mûr) tai prossims mês. ❚