Ancje intai boscs di mont e je une buine variabilitât di speciis di uciei

In gjenar si crôt che i boscs di mont a sedin puars di speciis di uciei e che si puedin cjatânt dome dome “cuatri o cinc” di lôr. Chest, dutune cun diviers fatôrs e cu la dificoltât di rivâ intes areis montanis e di frecuentâ cun regolaritât i boscs, massime di Invier, al à fat in mût che lis indagjins su lis comunitâts di uciei a sedin stadis fatis pal plui inte plane o “pôc parsore”.
◆ L’autôr al à puartât indevant, pe prime volte in Italie, un studi sul cicli anuâl de comunitât di uciei in boscs di mont. La indagjin e je stade fate in doi boscs des Alps Juliis: il Bosc dai Lâts di Fusinis (Tarvis) e il Bosc Camet (Scluse). I rilêfs a son stâts fats doprant un metodi sientific oportun, par ognidun dai doi boscs, ogni mês par 24 mês consecutîfs.
◆ In totâl, a son stadis cjatadis 47 speciis di uciei: un bon risultât, considerant che il studi al tignive in considerazion dome i animâi contatâts vie pal dì intune fasse largje 100 metris e lungje doi chilometris, e no in dut il bosc.
◆ Lis speciis rilevadis cun plui frecuence a son stadis, cemût che si podeve spietâsi, chês forestâls tant che il Pic ros Dendrocopos major, il Stelin Regulus regulus, il Parussulin dal çuf Lophophanes cristatus, il Bec stuart Loxia curvirostra e il Sivilot Pyrrhula pyrrhula, ma a son stadis contadis ancje speciis che di solit si cjatin in altris ambients, come par esempli la Dordine Anthus trivialis, la Bandule zale Motacilla cinerea e il Rondul grant Tachymarptis melba.
◆ In plui di chês nomenadis parsore, a son stadis cjatadis ancje cualitâts che a jentrin tal Alegât I de Diretive de Union Europeane 2009/147/CE su la conservazion dai uciei salvadis tant che speciis a prioritât di tutele: Franculin Bonasa bonasia, Blausin des âfs Pernis apivorus, Begarole dai Urâi Strix uralensis, Pic grîs Picus canus, Pic neri Dryocopus martius e Pic dai trê dêts Picoides tridactylus. In plui, un mascjo di Cedron Tetrao urogallus al è stât viodût dongje de aree indagade.
◆ A proposit dai pics, a son stadis cjatadis trê speciis tal Bosc Camet e cuatri a Fusinis: fatôr positîf, stant che chei a son considerâts indicadôrs valits de diversitât de avifaune forestâl e de cualitât dai boscs. Cun di plui, i valôrs di frecuence e abondance dai pics a son risultâts alts in graciis di plantis deperidis o muartis che a restin ancje pe presince di zonis cun claps e clapons e pe morfologjie cetant iregolâr che a rindin il tai mancul facil e mancul convenient di un pont di viste economic. A chest si è zontade la azion dal Chefar Ips typographus, inset che al tache il Peç Picea abies, che al à aumentât il numar di chês plantis.
◆ Fra i doi boscs e je stade cjatade une afinitât faunistiche avonde alte, in graciis di varis fatôrs tant che localizazion, vicinance fra chei, composizion dal bosc (a son ducj i doi boscs di Peçs e Faiârs Fagus sylvatica), parametris forestâi, tipologjie di gjestion.
◆ Lis diferencis a son leadis a un nivel plui alt di disturp tal Bosc Camet par vie de frecuentazion di bande di personis che a provegnin di Nevee, invezit a Fusinis i Lâts a atrain e a concentrin la presince umane, e part dal percors doprât pal studi si cjatave in zonis pôc frecuentadis: chest al à, par esempli, permetût di cjatâ il Franculin. Altris diferencis a vegnin de posizion di pidival e de plui grande vicinance cun areis rurâls, in corispondence di insediaments umans e passons dongje dal Lât Superiôr di Fusinis: elements e ambients che no si cjatin in Camet e che a àn favorît il contat cun speciis tant che la Parussule Parus major e la Parussule mulinarie Cyanistes caeruleus. In chest ultin bosc, la posizion suntune siele insiemi cu la plui grande disponibilitât di sterps cun pomule e la vicinance ai sîts riprodutîfs a àn facilitât e permetût il contat cun speciis di cise che a nidifichin in mont.
◆ La plui part des speciis e je sedentarie, invezit no esistin speciis che a rivin intai doi boscs dome par passâ l’Invier, viodudis lis cundizions climatichis e stagjonâls sfavorevulis. Ce che al diferenzie di plui i doi boscs e je la frecuence des speciis migratoriis, tant plui alte in Camet, par vie de posizion gjeografiche.
◆ Il studi al à metût in lûs:
– la variabilitât di ricjece e la abondance di speciis fra i diviers mês,
– une eterogjeneitât avonde alte de composizion de comunitât dai uciei intai mês de Vierte e dal Istât,
– la presince di un grup di speciis dome in part esclusive dai boscs di zone di mont interne che e caraterize la comunitât dai uciei;
– une variabilitât sedi de composizion de comunitât dai uciei che de abondance des speciis dipendentis a fuart des cundizions climatichis e de consecuente modifiche des risorsis, leade aes esigjencis intrinsichis des speciis che a cambiin intes variis stagjons.
◆ Ce che al è saltât fûr dal studi al varès di jessi doprât par fâ sieltis gjestionâls coretis, par judâ a fâ valutazions razionâls su la incidence (sensu lato) di eventuâls oparis proponudis e par sburtâ a fâ altris studis di chest gjenar.
◆ In merit aes sieltis gjestionâls, al sarès impuartant verificâ prin l’impat che intervents di modifiche da viabilitât forestâl a puedin causâ aes variis comunitâts (animâls e vegjetâls). Di fat, tal cors dal studi e jere stade verificade la presince di une popolazion riprodutive di Muc Bombina variegata (specie di anfibi di interès conservazionistic, metût dentri intal Alegât II de Diretive de Union Europeane 92/43/CEE) intes pocis dilunc de strade che e travierse il Bosc di Fusinis. La ricostruzion di part de strade e à eliminât dal dut i sîts riprodutîfs (che si cjatavin fûr de sede stradâl) e, miorant di tant la viabilitât che prime dal intervent e jere adate dome a mieçs fûrstrade, e à tant aumentât gjenar e numar di mieçs che a rivavin a percorile, lant a incidi ancje su speciis sensibilis tant che il Franculin, no plui cjatât tal cors di visitis sucessivis.
◆ Il studi al à po dopo evidenziât la necessitât inte gjestion forestâl di tignî in considerazion lis peculiaritâts dal ecosisteme ancje intai boscs di produzion: dome in chest mût, si pues dâ il just valôr al mantigniment dai secjons e dal len muart che a son fondamentâi par un grant numar di speciis (no dome di uciei) e che, come che si à verificât, a favorissin Pic grîs, Pic neri e Pic dai trê dêts, che la lôr chei conservazion e je prioritarie a nivel comunitari. ❚