E cres la atenzion pai Ecomuseus

Il patrimoni de comunitât al è dispès ruvinât de ilusion che il progrès e la modernitât a vedin di passâ traviers dal sacrifici de nature, de tiere, des aghis e dal aiar. O dai vecjos mistîrs, e de voie di costruî in maniere sane e rispietant il teritori cemût che al è stât fat dilunc dai secui. Il risultât plui evident di chest procès e je la pierdite di identitât dai nestris paîs, de nestre int, de nestre mangjative. Ma se no tignìn plui cont de peculiaritât di ce che al marche la nestre coletivitât, ce restial di nô?
◆ La domande par fortune no reste cence rispuestis. A puartâ indevant un percors di cognossince e di creazion di une cussience su chescj temis a provin i tancj ecomuseus che a son nassûts intai agns in Friûl, e che ancje intes dificoltâts fuartis dal senari di vuê a davuelzin une azion impuartante pe educazion ae conservazion e ae valorizazion di ce che la int di chenti e à simpri considerât fondamentâl pal sô vivi in sintonie cul ambient. Un patrimoni vivent, di doprâ ma no straçâ, di coltâ e di custodî. Ducj i ecomuseus a son realtâts diferentis e specifichis, ognidune nassude marcant la ricjece origjinâl dal so paîs e de sô zone: da “Lis Aganis”, che al puarte indevant la sô azion su dutis lis Dolomitis furlanis, a chel de Val dal Lât di Cjavaç o a chel de Val di Resie, fin a chei su “I mistîrs” di Paulâr o “I cavalîrs” di Feagne. Diferents, ma compagns inte ispirazion, a son come une grande famee che e vûl dâ sburt e jutori aes comunitâts là che e lavore. Par chest, intal ultin periodi a son deventâts simpri plui materie di studi academic e, parcè no?, ancje di un fregul di atenzion mediatiche plui largje. I lôr, di fat, a son progjets no masse convenzionâi e a sticin un interès trasversâl.
◆ Fasìn l’esempli dal Ecomuseu des Aghis di Glemone, che intal ultin an al à passât un periodi pardabon no facil no dome par vie de pandemie, ma ancje pal trasferiment de sede storiche dal Mulin Cocconi tal municipi di Glemone. Ma la sô ativitât e je sot dal voli costant des universitâts. Intai ultins mês, trê ateneus a àn mostrât atenzion pai siei progjets. Par esempli, i students di Gjeografie dal Cors di lauree trienâl in Letaris modernis te Universitât di Padue, cul professôr Mauro Varotto, a analizin il documentari Latte nostro di Michele Trentini su lis latariis turnariis di Cjamp Lessi e Peio, sostignût dai ecomuseus atîfs su chescj doi ambits. La Facoltât di Letaris e Filosofie de Universitât La Sapienza di Rome e à cjapât l’Ecomuseu a model des ativitâts demoetnoantropologjichis e di cemût che a puedin integrâsi cu la comunitât e cul teritori: a fâlu e je stade la dotore Roberta Tucci, ospite a Glemone tal 2018, intune lezion dal cors dal professôr Gianfranco Spitilli. Cun di plui, te Universitât di Turin, tal Dipartiment di Sciencis agrariis, forestâls e alimentârs, il docent Luca Battaglini al à puartât ai siei students l’esempli de Cjarte dai principis des latariis turnariis, elaborade dal Ecomuseu e di Slow Food Italie cun modalitât partecipative.
◆ Ancje la Rai e à dât spazi a doi documentaris, curâts di Antonia Pilosio, che a frontin sot forme di narazion visuâl doi aspiets une vore impuartants. Un al è propit chel des latariis turnariis che une volte a jerin cetantis in dut il Friûl. A vevin une modalitât di gjestion dal lat semplice, economiche e adate ae produzion casearie a nivel locâl, cuntune vore di arlevadôrs tai paîs, e a jerin un model virtuôs di vite e di alimentazion, fat di cusine puare, produzion locâl e condividude. Il model turnari al cjapave sù la usance antighe di meti dongje il lat di plui fameis e di fâ il formadi in maniere coletive, cul stes principi dai fors comuns. Lis latariis turnariis cussì no compravin il lat, ma a fasevin un servizi di lavorazion par cont dai socis. I prodots a restavin di proprietât dal soci, che al podeve vendiju o lassâju te buteghe de latarie. La Pilosio e à contât il câs de latarie di Cjamp Lessi, une des ultimis restadis in regjon, tant che dal 2013 il so formadi al è deventât Presidi Slow Food.
◆ Altri esempli che la regjiste e à volût rapresentâ al è chel dai mûrs a sec, che une volte si cjatavin pardut in Friûl e che a son testemonis de sô storie, ma che cumò a van salvâts de estinzion e magari a puedin jessi metûts a puest dai volontaris: al è il câs de zone di Dartigne e Montenârs, dulà che i Comuns e l’Ecomuseu des Aghis di Glemone a coordenin, di sîs agns incà, i cantîrs pe lôr restaurazion e pe conservazion, gratuits e vierts a ducj i apassionâts. E a confermâ il valôr universâl di cheste pratiche antighe e je stade la Unesco che e à metût la art dai mûrs a sec te liste dai elements imateriâi declarâts “Patrimoni de umanitât”.  ❚
Redazion