MUSICHE. Elsa Martin: atore tal licôf dal Teatri Stabil Furlan

Une gnove esperience cul debut
di “La Cjase. Lagrimis di aiar e soreli”
Al è lât in sene finalmentri, dopo tant spietâ par vie dal covid, il licôf dal Teatri Stabil Furlan, che ai 29 di Mai al à presentât tal Teatri Gnûf Zuan di Udin, in prime assolude, la sô prime produzion teatrâl “La Cjase. Lagrimis di aiar e soreli”, gjavade de prime opare de Trilogjie Cjargnele dal poete e dramaturc di Cesclans, Siro Angeli (1913-1991), a trente agns che al è muart. La regjie e je di Carlotta Del Bianco, la riduzion dal test talian par cure de regjiste, di Paolo Patui e Paolo Sartori, che al à ancje realizât la traduzion par furlan. Un cast, tra atoris e atôrs furlans zovins e cetant brâfs, che si è dât di fâ, cun tante competence e sintiment, tal contâ la storie di une famee e de nature dai rapuarts fra personis tra convenzions e riviel, espiazion e colpe. O lassìn al prossim numar de Patrie la recension di chest spetacul che al segne un avanzament concret e professionâl dal teatri in marilenghe, puartât indenant dal gnûf ent di produzion teatrâl par furlan sot de direzion artistiche di Massimo Somaglino.
Achì nus interesse pal moment contâ de protagoniste di “La Cjase”, une cjargnele nassude come interprete musicâl, cjantante pe precision, cressude tant che compositore e simpri cjantante tal cjamp de musiche contemporanie. E cumò screade ancje come atore, par une prime esperience che e mostre la sô grande versatilitât, vocâl e no dome. Jê e je Elsa Martin, che à vistût il rûl di Madalene tal spetacul, intune declinazion dute particolâr, indulà che lis sôs competencis si son riveladis in trê formis, strentis intune uniche espression: atore, soredut in chest câs, ma ancje compositore de colone sonore dal toc teatrâl e cjantante in moments smirâts. Pardabon particolâr cheste propueste che si è rivelade convincente e vincente. O vin cussì domandât a Elsa di cheste esperience, artiste che tra l’altri, intun cuartet formât insiemi cul duet Bottasso e Davide Ambrogio, e à di resint vinçût il Premi Loano Giovani pe musiche di tradizion taliane, cul album “Il Canzoniere di Pasolini”.
__
Ce vuelial dî par te, tant che atore in cheste gnove vieste, vê dut câs simpri dongje la musiche, e jessi clamade ancje a fâ musiche dentri di chest toc teatrâl?
«Podê componi la part musicâl di chest spetacul mi à dât mût di doprâ la sostance che o ai inte musiche. Libertât e serenitât di metilis dentri in cheste operazion di gjenar teatrâl. O scuen dî graciis ancje ai miei compagns di sene, che mi àn judât un grum e che si son prestâts ancje a cjantâ, a esprimisi musicalmentri. Lis musichis a son di gjenar corâl, si sintin parts plui astratis e parts plui armonichis. A son vôs che a manifestin un sintî profont, che dal dentri al jes intun fûr che al è manifestazion di un sintiment. Un vignî ae lûs, une cussience coletive che si pant. A son vôs dal presint, dal passât, di un futûr di vîfs, di muarts, e ancje di mai nassûts. Cheste e je une des esperiencis plui maraveosis di chest ultin an e di chel passât. Totalizant, tal sens che mi à obleade a lâ dentri, a rompi limits, parcè che al è dificil doprâ la peraule e il cuarp intun mût che no si è usâts. O soi convinte che cheste esperience che o ai vivût, tra recitazion e musiche, mi puartarà a une trasformazion, sedi tal gno jessi Elsa, umane, che tal gno percors artistic».
__
E ven sù ancje la figure dal corifeu, dal mesocor, che si misclice inte storie, tant che atôr e tant che comentadôr, cuasi di memorie greghe. E dongje une ninenane. Continus di cheste ambivalence.
«Sì, intun ciert moment, la prime part e je di gjenar corâl e la seconde soliste, indulà che o cjanti, e che e ven fûr cence soluzion di continuitât de prime part. La ninenane e devente un motîf ricorint dilunc dal spetacul, cui sunôrs di un pianoforte che al segne la melodie. Il côr invezit al rapresente un personaç indulà che la identitât coletive si manifeste. Peraulis plenis di sgrisui e di fuarce, come se il sintî e i pinsîrs dai personaçs, si dessin dongje par pronunziâ peraulis secjis e uçadis, che si indrecin a un “tu” esterni cun imperatîfs clârs. A dialic cun chestis peraulis corâls, a son chês pronunziadis singolarmentri di ognidun, de lôr bocje, intun cori vorticôs che e je la manifestazion des lôr esistencis. Si ven a creâ un rît coletîf, cun funzion di prese di cussience, graciis ae esternalizazion dal sintî interiôr».
__
Peraulis gjavadis dai spirts, e ancje di poesiis sieltis.
«In cierts moments, tal sens musicâl, al è come sintî lis vôs di spirts. Un toc si clame “Nude Anime”, inte dople acezion, singolâr par furlan e plurâl par talian. Anime come “animus”, dal latin, tal sens di spirt, vint, sofli, duncje spirts insiemi cu lis animis dai vîfs, dai muarts e dai mai nassûts, come che e conte la storie. Daspò ciertis frasis, ancje in altris moments indulà che la musiche si fâs presint, a son stadis gjavadis di dôs racueltis di poesiis: “Omaggi” di Alida Airaghi Einaudi, femine di Siro Angeli, e “Solevento”, dal stes poete di Cesclans». ❚