Un dai plui grancj autôrs dal Rinassiment talian

Lodovico Ariosto (Reggio Emilia 1474-Ferrara 1533) al pues ben jessi indicât come un dai plui grancj autôrs dal Rinassiment talian. Fi di un cjapitani al servizi dai siôrs di Ferrara, la nobile famee dai Este, al cerce la crudeltât di Vignesie che, nemie antighe dai Este, e ocupe intal 1482 la citât di Rovigo, là che il pari di Lodovico al preste servizi tant che comandant de guarnigjon, e lu fâs presonîr, glotint ancje ducj i bens e i podês de sô int. E sarà cheste la ocasion par un trasferiment obleât a Ferrara, là che il zovin al frecuente la universitât par deventâ dotôr in leç. Ma la sô anime e je cjapade de bielece de leterature e dal spirt vivarôs dal teatri plui che dai cjapitui e des notis che si fasin penzis intai manuâi di dirit canonic e civîl. Cussì al bandone dispès il studi par lâ daûr des compagniis dai teatrants che a passin dispès intes placis di une citât che in curt e devente une des capitâls plui intrigantis de gnove culture umanistiche, une vision dal om e dal timp che e je daûr a sflorî in dute Europe, là che si cjantin la bielece, la armonie, la consonance universâl. Lodovico al preferìs di fat Ovidi a Justinian, e si bandone cun grande passion ae opare di Francesco Petrarca, strenzint leams cui grancj inteletuâi dal moment, in particolâr cun Pietro Bembo, salacor il plui grant teoric de ete rinassimentâl, che si cjate a stâ a Ferrara cul pari intun periodi che al va dal 1497 al 1499. In particolâr, l’an 1498 al rapresente pal Ariosto un svolt decisîf e profont: al jentre a ducj i efiets a servizi de famee dai Este, leantsi prin a Ercole I, il duche in persone, e po dopo a so fi Ippolito, il gardenâl. Al concludarà vite e cariere sot di Alfonso I, che al sarà bon di valorizâ il plui pussibil la anime talentuose di un servidôr cetant plui brâf a inmagâ la int cu la sô fantasie che no a jemplâ pergamenis e cjartis intai uficis aministratîfs dal Ducât. Il lavôr di segretari e di diplomatic di fat no i plâs: al sofrìs cheste cundizion che lu oblee a movisi di citât in citât, trascurant chel otium che invezit i varès permetût di dedicâsi dal dut ae amade leterature, ae poesie e ae dramaturgjie. Però lis ocasions, lis esperiencis, l’incuintri cuntune umanitât varie e plurâl cjatade vie pes stradis de Europe i daran la ande par cjatâ dentri di se la ispirazion che lu judarà a componi oparis mestris ricognossudis universalmentri, tant che l’“Orlando Furioso” (la prime edizion e fo stampade intal 1516, la ultime intal 1533, l’an de sô muart): un mont traviersât di damis, cavalîrs, armis e amôrs, come che al intone l’incipit dal poeme, un dai plui famôs di dute la leterature mondiâl. Ma no dome: ancje brigants e mâcs, striis e incjantaments, ostariis e cjistiei. Ducj cjapâts intal inseguiment di chê rose che e sta un moment a florî e ancje a murî. Bisugne jessi bogns di cjapâle sù ni masse adore ni masse tart, ma cuant che il moment al clame sot il cîl de lune. ❚