✽✽ A jerin une volte lis Provinciis. Dopo e je rivade la Serracchiani che, par fâsi viodi dal Pd tant che la prime de classe, lis à abolidis. A son rivadis lis Uti e al è stât il disastri che si imagjinavisi. A un risultât si è però rivâts: ce che al podeve fâ coincidi il Friûl storic, gjeografic, linguistic cuntun nivel istituzionâl rapresentât di une unitât pussibile tra Udin, Gurize e Pordenon, al è stât dismantelât. Cambi di maiorance in Regjon e gnove diretive, volude a fuart de Leghe: lis Provinciis a tornaran e a saran eletivis, ma nus volarà timp. Pal moment indenant cui Edr (Ents di decentrament regjonâl) cun competence su edilizie scolastiche, e in curt su la viabilitât. “Ma si è daûr a lavorâ – al anunzie braurôs l’assessôr Roberti – pe riativazion di ativitâts minôrs, tant che il finanziament di cualchi cimitieri, o la manutenzion des fatoriis didatichis”.
✽✽ Cemût che si intuìs, un progjet di grant respîr, degn di un “Recovery plan” targât FVJ!
✽✽ Intal mont reâl, ve ce che al sucêt: i Comuns a son in crisi cence personâl, cence fuarce contratuâl a pet di une Regjon che, intai fats, e manten, anzit e rinfuarce, il so rûl centralistic e di control.
✽✽ Il vêr probleme pal Friûl al è propit chi.
Si cjatìn devant di une tindince gjenerâl che e puarte simpri plui al acentrament dai podês, a un decisionisim statalist che si bute jù a cjadene su lis perifariis istituzionâls. Un pinsîr, une ideologjie che e viôt in cheste impostazion, in cheste cjadene di comant, la miôr forme di poie ae plateforme economiche dal sisteme capitalistic di cumò.
✽✽ Se a nivel mondiâl cheste vision dal mont e compuarte il dispopolâsi des campagnis, la cressite di megalopolis cun diferencis sociâls brutâls e insostignibilis, il disastri ambientâl consecuent, no stait a pensâ che no vedi influence ancje su la nestre int, su la vite di cumò e future.
✽✽ Dut complicât di un dât incontestabil: ca di nô cheste formule di guvier si concentre suntune piçule part dal teritori, il centralisim regjonâl si identifiche cuntun disvilup a sens unic targât Triest. Che al sedi di gnûf provincie o citât metropolitane, al cambie pôc.
✽✽ Il centralisim nol distribuìs in maniere juste lis risorsis, al tint par sô nature a convoiâ intal so interni lis risorsis a disposizion, a interessâsi, a disvilupâ dome che ce al risulte funzionâl ai siei interès.
✽✽ E se il Friûl nol corispuindès a cheste prospetive se no tant che coridôr di passaç, un grop intermodâl enormi pe citât puart? No stait a preocupâsi: o vin simpri i cimitieris di sistemâ. ❚