Il vin bio nol è plui une ecezion. Nancje in Friûl-VJ

Al è cui che le bat ancjemò a descrivi il vin biologjic tant che un marcjât di nicje. Dificil concuardâ cun cheste afermazion se, cun cuasi il 19% dal vin talian certificât biologjic, la nestre Penisule e je al prin puest in Europe e intal mont, su la fonde dal report resint Mipaaf-Ismea. In pratiche in Italie, intal 2020, 4 butiliis di vin su 100 a jerin biologjichis, produsudis su plui di 107 mil etars di vignâl (+109% intal deceni). A nivel mondiâl, dai 7 milions di etars di superficie viticule censide intal complès, une cuote dal 6,7% e je coltivade daûr dai metodis di produzion de agriculture biologjiche, par une estension dongje dai 500 mil etars: plui dal dopli di 10 agns indaûr.
◆ Plui intal detai, a nivel regjonâl e in otiche dinamiche, si viôt un slanç di bande dal centri Nord par recuperâ intal ultin deceni il disvantaç di superficiis cul Misdì. Un percors di cressite che al à puartât a plui ecuilibri inte distribuzion di vignâi tra Nord (22,8%), Centri (22,5%), Sud (25,5%) e Isulis (29,2%). Simpri intal Stivâl, a son plui di 18 mil i viticultôrs bio, e a chei si zontin ducj chei altris atôrs de filiere, par un totâl di operadôrs dal setôr vitivinicul biologjic dongje des 25.000 unitâts.
Bevi bio in Friûl-VJ
In Friûl-VJ, intal 2019, a jerin 1.598 i etars di vignâl bio (1.351 l’an prime e dome 376 10 agns prime, cuntun aument dal 325% a front di une cressite medie taliane dal 112%, intal stes periodi). Il 6,5% dal vignâl regjonâl al jere a conduzion biologjiche (a front di une medie taliane dal 18,8%) e i operadôrs de filiere a jerin 291. Intal 2020, lis aziendis agriculis regjonâls cun vît biologjiche a jerin il 5,5%, a pet di une medie taliane dal 9,3%; lis cantinis biologjichis dal Friûl-VJ a jerin 57 (il 2,7% des talianis complessivis) e 21.457 i etolitris vinificâts, o ben l’1% dal vin bio talian.
◆ Sul front dai consums, il vin biologjic al è preseât massime tal forest, cu la Gjermanie e la France prins de file tra i Paîs consumadôrs, intant che la Italie e ten un rûl impuartant intes esportazions dal setôr. A nivel mondiâl, la tindince pal 2023 e segne un sbassâsi globâl dai consums di vin, un câl dai consums di vin convenzionâl, ma un aument dal consum dai vins bio che a rivaran ai 976 milions di butiliis, o ben il 3,5% dal totâl (a jerin l’1,5% intal 2013).
Une lungje storie
Insume, si pues dî che chê de agriculture biologjiche (e dal vin bio) e sedi une storie di sucès. Travuarts numerics e di difusion in campagne, su lis taulis, intes tacis: impressionants se cjalâts cui voi di un pionîr tant che o jeri jo intal 1978 cuant che, unic furlan, o ai partecipât al prin Cors  talian di agriculture biodinamiche te aziende bielonone des Cascine Orsine ae Zelata di Bereguardo (Pavie), di proprietât di Giulia Maria Crespi Mozzoni (1923-2020). In Friûl a jerin za i prins segnâi di un dismovisi che al veve cjatât energjie de rinassite post taramot, cu la cooperative La Cirignicule e, dopo, cuntune schirie impuartante di altris cooperativis (pal plui fondadis e gjestidis di zovins) che a àn dât vite al Consorzi Furlan Agricultôrs Biologjics che o ai gjestît di president par ducj i siei 10 agns di vite, incrosant ancje l’Aiab e l’AprobioFVJ. Tal mieç, cuntune passion enorme, tantis bataiis combatudis in prime linie, diviersis pierdudis ma lis plui impuartantis vinçudis, cun tancj vuerîrs passâts, in chescj cuarante agns, dal front negazionist a chel che al cjavalgje une storie di sucès, apont. Ma, ae fin, a son stâts e a son i consumadôrs a dî cui che al à vinçût pardabon. ❚