La bandiere dal Friûl e je la bandiere de regjon storiche dal Friûl, di no confondi cu la bandiere de Regjon Autonome Friûl-Vignesie Julie, e e je une des bandieris plui antighis di Europe. La origjin de bandiere e rimonte tal timp dal Stât patriarcjâl clamât ancje Patrie dal Friûl.
L’esemplâr plui celebri e antîc al è esponût intal Museu dal Domo di Udin. Al è un drap che al faseve part dal aventari funerari dal patriarcje Beltram di Saint Geniès, in cjarie dal 1334 al 1350 e sassinât li di Sant Zorç de Richinvelde dopo di une conzure metude su di cualchi nobil locâl. No ducj lu cognossin e us invidìn a lâ al Museu a viodilu (la jentrade e je sul flanc a çampe de façade): e je une bandiere bielone di colôr grîs-turchin cun al centri une acuile cul cjâf indreçât a çampe. Il cuarp, lis gjambis e lis alis a son di colôr zâl e lis sgrifis di colôr ros.
Il simbul de acuile, però, al caraterizave il Stât patriarcjâl furlan ben prime di Beltram. Lu conferme e ven di monedis dai principis dal 1200, che a àn su chest simbul.
Une piture antighe a colôrs de acuile furlane si pues viodi te façade esterne di Puarte Manin a Udin, in bande di une acuile dal Sacri Imperi Roman: probabilmentri a forin pituradis di pueste in ocasion de visite dal imperadôr Carli IV di Lussemburc intal 1354. Ce biele e cetant che europeane e je la storie dal Friûl e cetant pôc che le savìn!
Se ti covente la bandiere si pues cjatâ sul sît di Friûlpoint , di misuriis variis 
https://www.friulpoint.it/categoria-prodotto/altro/bandiere/