La lauree honoris causa a Gabrielli e tradìs la mission de Universitât

Propit inte ore plui scure dal Friûl, cuant che i efiets de “grande depression” prime, e de pandemie dopo, a son daûr a mostrâ debilecis impuartantis inte sô economie e inte sô classe dirigjente, la Universitât dal Friûl e mande un messaç ambigui. E varès di vê, daûr de leç e dal so stes Statût (art.1) ancje “…l’obietîf di contribuî al progrès civîl, sociâl e ae rinassite economiche dal Friûl” (art. 26 L. 546/1977). Ma i ultins Retôrs a son lâts daûr di chest obietîf simpri cuintricûr, cirint di barcjemenâsi tra la mission aziendâl plui tradizionâl, o ben sigurâ didatiche e ricercje, e il dovê di adempî ancje al mandât istitutîf. Il Retôr De Toni al veve provât a passâ la dificile dialetiche, inventantsi il “Cantiere Friuli”. Però cumò, propit intal moment che e je plui bisugne di ricostruzion, di chel “Cantîr” no si viodin plui segnâi di vite. Il Retôr di cumò no si mostre masse disponibil a meti in vore chel mandât, forsit pe pôre di posizions che a sepin masse di “politiche”. Cheste, fin îr, e podeve jessi une spiegazion acetabile ma vuê – dopo de lauree Honoris Causa al Sotsegretari di Stât dotôr Franco Gabrielli – no baste plui. Cheste decision, di fat, e pues vê interpretazions diviersis ma dutis cuntun contignût valoriâl e politic fuart e univoc. Il probleme nol è, dal sigûr, la persone in se che e je degne di stime e di massim rispiet. Il dotôr Franco Gabrielli al è un alt funzionari dal stât, cuntun curriculum ecezionâl (ex cjâf de Digos di Rome, cjâf dal Sisde, responsabil de Protezion civîl, prefet, cjâf de Polizie e cumò sotsegretari cun deleghe sui servizis segrets e la sigurece dal Paîs), che si è distint in compits grivis di ordin public e di protezion civîl post disastri, ma di une prospetive che si pues definî “di emergjence” e “siguritarie”. No si vûl sostignî, che al sedi clâr, che cheste prospetive – che e à di jessi garantide dal stât – no mereti ancje di jessi ricognossude e premiade in sede academiche. Ma si vûl sostignî, invezit, che nol varès di tocjâ in maniere primarie ae Universitât dal Friûl fâsi paladine di chest. Cheste, di fat, par coerence valoriâl, e varès, prime di dut, di onorâ une vision dal stât opueste a chê “siguritarie” e “di emergjence”. In tiermins cetant semplificâts, o podaressin dî che la lidrîs dal Model Friûl e de Universitât dal Friûl – che e je la citade leç di ricostruzion – e valorize une idee di stât e di democrazie che a vegnin dal bas, de polis (no dome la Universitât e ven domandade dal popul furlan, ma saressial mai stât un Model Friûl cence i intervents storics di Glesie Furlane e cence dal rûl fondamentâl dai Comitâts des tendopolis?). La lidrîs siguritarie e fâs riferiment, invezit, a une idee centralistiche – par no dî autoritarie – dal stât, che e sotlinee plui il “monopoli de fuarce” che l’ûs de partecipazion, de solidarietât e de sussidiarietât. Si à di ricuardâ, par altri, che la Protezion civîl di Bertolaso e Gabrielli, in maniere tant diferente di cemût che al veve operât Zamberletti in Friûl, e à imponût a L’Aquila un regjim cuasi militâr inte vite des tendopolis, e e à poiât chel model trement clamât “Cjasis” (o ancje “new town”) che al à disfat il tiessût sociâl e urbanistic di L’Aquila za tacant de prime fase de ricostruzion. La Universitât dal Friûl e fâs une virade di 180 grâts cuntune sielte politiche e valoriâl cetant fuarte: e cjape sù la lidrîs prefetizie e siguritarie dal stât cuintri chê plui costituzionâl in maniere proprie (il prof. Mario Bertolissi, costituzionalist de Universitât di Padue, al à definît il Model Friûl di ricostruzion tant che la atualizazion plui complete de Costituzion taliane). Il Retôr Pinton al varès di sclarî, duncje, propit inte ore plui scure dal Friûl, ce mai che e vedi a ce fâ la lauree ad honorem a un sotsegretari Gabrielli, dut câs cetant rispietabil, cu lis lidrîs e cui valôrs di fonde de Universitât dal Friûl. ❚