Seconde part – Impats, menacis e conservazion
I cambiaments ambientâi dovûts a un insiemi di causis bielzà ripuartadis in curt inte prime part, si son fats sintî ancje in mont, e in cierts câs a àn incidût intal zîr di pocjis desenis di agns in maniere pesante.
◆ No si à di fâsi menâ in fal de presince di cualchi specie plui numerose o che si viôt facilmentri ancje intai paîs – par esempli la lisierte Podarcis muralis – par sostignî che lis speciis di anfibis e di retii culì tratadis a sedin in buine salût in mont, o che no vebin patît un impat par colpe di fatôrs di perturbazion.
◆ La impuartance de aree considerade e je evidente, massime par ciertis speciis che – cemût che al è stât scrit te prime part – a rivin al lôr limit di areâl propit chenti, o che inte aree di studi a vivin lôr popolazions fra lis pocjis che a son in Italie o, ancjemò, che culì a àn la grande part dal lôr areâl talian. Chest al è stât un motîf in plui par tignî cont di aspiets di perturbazion e conservatîfs.
◆ Lis indagjins puartadis indevant intes ultimis desenis di agns a àn fat lûs su diviers elements che a àn condizionât, ancje in mût impuartant, anfibis e retii inte mont furlane.
◆ Fra i impats e lis menacis principâls, e je la grande riduzion di biotops caraterizâts de aghe, sedi par vie de modifiche o dal abandon des ativitâts agriculis e pastorâls, sedi pal cambiament climatic, ma ancje par vie dai sbaraments dilunc dai cors di aghe par produsi eletricitât, e che a compuartin prelêf di aghe. La realizazion de dighe di Caprizi sul Tiliment e de dighe di La Maine sul Lumiei, e di dut l’insiemi di oparis e infrastruturis colegadis, e à vût dal secont dopovuere a vuê un impat deleteri sui biotops dulà che a vivevin e/o si riprodusevin diviersis speciis di anfibis tant che lis mandraulis, i ‘sâfs, lis craçulis e i crots, ma ancje retii tant che i madracs di aghe. Ancje i implants (lis centralinis) sui riui di piçulis dimensions, dutun cu lis sistemazions idraulichis forestâls, a àn incidût in maniere negative, par esempli, su la salamandrie Salamandra salamandra. Altri colp patît des paluderis e des areis caraterizadis de aghe, al è vignût dal jemplâlis cun materiâi di divierse divignince, par esempli chei produsûts dai lavôrs in edilizie.
◆ Un fatôr che al à incidût e che al menace tal cuotidian la pussibilitât di vite di dutis lis speciis di anfibis e di retii, al è la modifiche dai habitats – par esempli in zonis agriculis e di pidival – daûr de espansion urbane e infrastruturâl, ma ancje par vie dal mudament des pratichis agriculis, silviculis e pastorâls che al à incidût ancje dilunc i versants e in areis a altitudin elevade.
◆ Un altri element di impat e di pussibile menace al è la estension dal reticul di stradis forestâls (che in diviers câs a rivin intai pascs di mont) dutun cu la facilitât di concession dai permès di passaç ancje par manifestazions che a compuartin il doprâ veicui a motôr: chescj aspiets a vegnin amplificâts in câs di asfaltadure, e a incidin su dutis lis speciis forestâls e di ambients alpins.
◆ Altris impats e menacis plui o mancul impuartants a seconde des speciis a son: manutenzion, realizazion o ampliament di infrastruturis e manufats in gjenar (par esempli mûrs, implants schiistics, cjamps di balon), imission di pes intes pocis e di speciis esotichis, operazions selviculturâls su grandis areis cun machinaris a produtivitât elevade, manutenzion di viabilitât sedi principâl che secondarie, realizazion di struments di planificazion teritoriâl di bande di figuris professionâls tradizionâls no preparadis sui aspiets ambientâi, espansion des areis boscadis (ancje midiant plantisions di peç Picea abies) a dam di areis viertis, cun pierdite ancje di ambients di margjin; braconaç.
◆ Par cirî di difindi lis popolazions residuis di anfibis e retii, si à di previodi azions smiradis ae conservazion, che e dipent in maniere direte dai impats e des menacis.
◆ Prin di dut al coventarès un cambiament radicâl dal mût di agjî: chest, però, al ven daûr di un mudament dal nivel culturâl e dal gjenar di culture, e duncje de sensibilitât, e nol è atuabil intal curt periodi, ancje parcè che il sisteme al sta lant ancjemò plui in direzion contrarie. Dopo, al è impuartant tignî in considerazion il fat che lis consecuencis leadis par esempli al cambiament des pratichis agriculis, silviculis e pastorâls e dal clime a continuaran a fâsi sintî par un timp indefinît (e indefinibil).
◆ Il studi, insiemi cun ducj chei altris fats dal autôr in desenis di agns, al à permetût di individuâ un insiemi di azions che a coventin par finalitâts conservativis, e che a son in struc:
• realizâ une normative e une planificazion teritoriâl su la fonde des cognossincis disponibilis e no des oportunitâts di interès;
• indreçâ la normative e la planificazion teritoriâl bande finalitâts conservativis e no di sfrutament ambientâl (sensu lato);
• mantignî e ripristinâ biotops riprodutîfs e sîts clâf;
• ricostituî ecosistemis fluviâi che, par tant che al è pussibil, a sedin suficients – di un pont di viste struturâl e funzionâl – al mantigniment di un just nivel di biodiversitât, sedi midiant emission di aghe sedi midiant conservazion, miorament e ricostituzion dai ambients fluviâi e di chei leâts ai cors di aghe (chest al è colegât ae proibizion di realizazions di gnûfs implants di captazion de aghe, se no son necessitâts inderogabilis certificadis di studis);
• valutâ, par ogni intervent che si à di fâ, lis consecuencis sul ambient, limitant al massim la espansion urbane e infrastruturâl, ma ancje altris gjenars di intervents che a aumentin la antropizazion e la pussibilitât di frecuentazion di ambients naturâi, come par esempli la costruzion di stradis forestâls;
• individuâ plui adore pussibil areis di juste dimension di destinâ ae libere evoluzion, tant che serbatoris di biodiversitât;
• educâ lis personis a svicinâsi te maniere corete al mont naturâl;
• improibî che si liberin speciis esotichis;
• tignî sot control ducj i elements danôs pe biodiversitât e pal ambient in gjenerâl, come butâ scovacis, braconaç, percori ambients naturâi cun mieçs a motôr, e vie indenant.
◆ Par realizâ ce che a al è a pene stât ripuartât, si à di tignî in considerazion lis professionalitâts cun competencis in materiis ambientâls di imbinâ aes figuris professionâls tradizionâls. Cun di plui, al è fondamentâl che la int e tegni compuartaments corets in merit ai animâi (par esempli in relazion al molâ speciis esotichis in nature o ae presince di animâi su lis stradis) e che ju tratin cun rispiet, evitant di copâju par divertiment, insensibilitât o pôris cence fonde. Une altre necessitât fondamentâl e je chê di tignî cont che cuant che si va a intervignî (sensu lato) su la Nature, lis consecuencis a colin su ducj, e par chest lis valutazions di ogni gjenar a àn di jessi parsore di cualsisedi interès particolâr. In fin, bisugne che l’om al capissi che lis azions che a favorissin il mantigniment dal ecosisteme a son chês che, se atuadis, i daran la pussibilitât di continuâ a vivi su la Tiere. ❚
