Il dessert plui famôs tal mont
al è di origjins furlanis aciertadis,
ma nissun si ’nd è inacuart, nancje i furlans
Cidins. Ducj cidins e sometûts. Di no crodi trop infinide che e sedi la dimension dal masochisim dai furlans. Mi riferìs ae notizie leade a un corot che nus tocje in maniere direte. Ai 30 di Otubar passâts, di fat, ae etât di 93 agns al è muart il trevisan Aldo Campeol. La robe nus interessie? Sì, par un motîf une vore sempliç: parcè che dutis lis notiziis che a tocjin la fin de esistence terene dal gjestôr storic dal ristorant “Le Beccherie”, lu segnin tant che il pari dal tirimisù. Intal cidinôr totâl di cualsisedi vôs furlane. Cumò chi no si trate di tifâ cui coregjonâi che a riclamin la paternitât dal dolç plui famôs tal mont cuintri chei di une altre regjon che si ’nt atribuìs la origjin. Chest al podeve lâ ben cualchi an fa, ma la contese aromai e je – o e varès di jessi – finide! Lis cjartis a fevelin clâr e il non dal dolç, come pûr la sô ricete classiche, a son ORIGJINÂI DAL FRIÛL-VJ.
◆ Intal 2016, Clara e Gigi Padovani, cu la publicazion dal lôr libri “Tiramisù”, a àn dimostrât – cjartis te man – che il non dal dolç al è stât creât intal 1946 di Mario Cosolo di Pieris, e la ricete – intal 1959 – di Norma Prelli di Tumieç. Il colegament di Aldo Campeol e di “Le Beccherie” cul tirimisù al è datât dome in maniere seguitive: intai agns ‘60, al scrîf rainews.it; a fin agns ‘60, al scrîf Il Gazzetino. Intal 2017, il Friûl-VJ, e no il Venit, al à metût dentri inte sô Liste regjonâl dai prodots agroalimentârs tradizionâi il tirimisù, alçant un fumaron che nol à puartât a nuie. La primogjeniture dal tirimisù, duncje, e je e reste cence dubi furlane e juliane. Ma cuant che si trate di cheste aree gjeografiche, lis cjartis a valin pôc. Intant che il president venit Luca Zaia, par esempli, al svintule cjartis dal Tresinte par dimostrâ che la peraule Prosecco e Prošek si riferissin ae stesse localitât di li che, dopo, e cjape il non la bufulute miliardarie tant famose (di difindi dai atacs al “Made in Italy”), pal tirimisù lis cjartis furlanis no son mai avonde e la no dimostrade primogjeniture venite e continue a lâ a la grande, praticant – di fat – un atac continui al “Made in F-VJ”.
Un inceament academic…
Fintremai la Academie taliane de cusine (fondade intal 1953 e, dal 2003, Istituzion culturâl de Republiche Taliane) e fâs une falope cuant che, intal 2010, e deposite cuntun at notarîl la ricete dal tirimisù di “Le Beccherie” e, intal 2014, a firme di Nazzareno Acquistucci (delegât di Trevîs), sul mensîl cjasalin “Civiltà della Tavola”, al publiche un articul cul titul pompôs “Le vere origini del Tiramisù”, citant dome cualchi locâl trevisan cence spindi nancje une peraule sul Friûl-VJ (ciert, il libri dai Padovani ancjemò nol jere stât publicât, ma la discussion e jere za ben inviade…). Ore presint, però, su accademiaitalianadellacucina.it, la ricete dal tirimisù e je assegnade al…Venit! Cualchidun jal scugnarà ben dî che lis cjartis fin chi discuviertis a contin dute une altre storie!
Ancjemò une volte, dut câs, al maravee il cidinôr dai politics, dai ristoradôrs, dai operadôrs dal setôr agroalimentâr (la Cciaa di Udin e à inviât un progjet sul tirimisù cjargnel cun relatîf dissiplinâr di produzion e il Consorzi Culturâl dal Monfalconês al è daûr a tutelâ e valorizâ il “tirime sù” di Pieris), dai tecnics e dai gjornaliscj nostrans. Ma par sdegnâsi e reagjî si à di crodii! Insume, une altre ocasion pierdude. ❚
