Argemì, il so rapuart cul Friûl al à lidrîs cetant lontanis: cuant isal nassût?
O soi vignût chi la prime volte che o vevi pene metût adun il CIEMEN, intant dal Taramot. Di chê volte o ai simpri vût tancj amîs in Friûl e il rapuart al va indevant fintremai cumò. Par altri, o soi content, chest viaç, di jessi stât ospit in Cjase Turoldo, parcè che o ai tacât a cognossi la vuestre tiere propite midiant di lui.
Cemût?
Cuant che o jeri in esili a Milan cul Abât di Montserrat Escarrè, a metât agns Sessante, une dì a vignerin a incuintrâlu un groput di fraris servits vuidâts di pari Turoldo. Ta chê ocasion a fevelarin no dome de dificoltât di meti in vore dal spirt conciliâr dal timp, ma ancje dai dirits dai popui. Mi visi che Escarrè i fevelâ dai dirits dai catalans e Turoldo al disè: “o sai ce che al intint, ancje jo o parten al popul furlan”.
Nus contial dal so esili cun Escarrè e de nassite dal CIEMEN?
Escarrè al è stât esiliât di Franco tal 1965 parcè che al difindeve cierts dirits fondamentâi, come il dirit a la democrazie. Par tant al lotave cuintri de ditature e a pro dal dirit dai catalans a tornâ a vê la proprie libertât. Mi visi che cuant che o sin rivâts tal aeropuart di Milan al jere plen di gjornaliscj: e jere une notizione che un cjâf di stât catolic al ves esiliât un prelât. La dì dopo i gjornâi a fevelavin di chest e des bataiis di Escarrè pe democrazie, ma nuie sul catalan e la Catalugne. Jo o restai maraveât. Cussì une dì i ai domandât a un gjornalist: “Parcè no fevelaiso mai dai catalans?” e lui mi à rispuindût: “Ma ce sono i catalans?”. Li o ai capît che par costruî alc bisugnave lavorâ massime par scombati la ignorance. Par chest, plui indevant, o ai fondât il CIEMEN propite cun chê di fâ cognossi e ricognossi no dome la Catalogne, ma ducj i popui de Europe midiant de ricercje e de divulgazion.
Dispès chescj popui a son definîts “minorancis”.
Ciert. Ancje la Costituzion taliane tal articul 6 e fevele di “minorancis linguistichis”, ma jo o soi une vore critic rispiet a chestis definizions. Nô no sin minorancis, o sin europeans che o fevelìn lenghis che a son stadis perseguitadis, a voltis ancje par secui.
Ce definizion isal miôr doprâ, alore?
Al è plui coret dî che o sin “minorizâts”. Ancje parcè che, vuê come vuê, dutis lis lenghis a son minoritariis in Europe e tal mont, massime dopo la globalizazion, stant che – fûr che l’inglês – nissune altre e pues dîsi lenghe universâl. No esistin, par tant, lenghis maioritariis e minoritariis. Lis lenghis no àn dirits, a son lis personis a vê dirits e i fevelants di cualsisei lenghe a àn di vê i stes dirits. Cul CIEMEN o vin lavorât cetant par meti in pîts une solidarietât jenfri i popui europeans e creâ une gnove dotrine sui dirits linguistics plui juste e democratiche.
Tal 1996 al è stât il promotôr de Declarazion universâl dai dirits linguistics. Vuê al è daûr a lavorâ par fâ ricognossi chescj dirits ancje di bande de ONU.
La declarazion dal ’96 le vevin puartade ae atenzion de UNESCO, ma magari cussì no la UNESCO le à lassade li su la taule. Ultimamentri o vin presentât al Consei dai dirits umans de ONU une mozion sui dirits linguistic che o contìn che e sedi fate buine dentri dal mês di Setembar dal 2008, che al è stât proclamât propite de ONU “An internazionâl des lenghis”. Se o rivassin a chest risultât e sarès une rivoluzion te concezion ONU su lis lenghis. Cumò, di fat, al esist dome un dirit negatîf a no sei discriminâts par motîfs di lenghe, ma noaltris o volìn fâ in maniere che si meti in vore une dotrine positive.
Pe Vierte dal an cu ven al è daûr a meti adun une grande cunvigne des “nazion cence stât”. Nus fevelial di chest progjet?
Al è impuartant che i popui a fasin rêt, che si inmanei une colaborazion e cooperazion fra di lôr. Di agns noaltris o metìn adun la Conference des Nazions cence Stât de Europe (CONSEU) propit par puartâ indevant un discors gnûf su la Europe. In tancj cjamps – tant che la monede, i traspurtas, i confins – si è daûr a creâ un gnûf spazi european, une gnove mentalitât. Chel chi par tant al è il moment miôr par intervignî tal dibatiment.
Cemût fâ par tirâ sù consens tor di cheste iniziative?
Claramentri chest discors o vin di savêlu fâ ben, al à di cjalâ al avignî, no dome al passât e al à di sei atratîf par che la societât e viodi in no alc di positîf. Cu la CONSEU de Vierte o volìn fâ un grant sfuarç par puartâ indevant chestis tematichis. Jo o soi chi propit parcè che dome se si metìn adun o podarìn vê plui fuarce e fâ capî che ducj, ancje i plui piçui, a son necessaris par componi chel grant mosaic che al è la Europe.
Lui al è catalan e dispès la Catalugne e je viodude di chês altris minorancis come il miôr model di nazion cence stât. Ce pensial?
Lu sai. Tantis voltis si sint a dî, e ancje in chescj dîs mal àn dit, “ah, vualtris catalans: o vês dut!”. Ma no je vere, o vin juste alc. In massime part, però, o sin come vualtris, o sin minorizâts tant cuant vualtris. Ancje nolatris o subìn une politiche che nus rint dificil un ûs ad implen normâl dal catalan, sedi sot l’aspiet individuâl che coletîf. No stêt iludisi, par tant, che nô catalans, sint plui numerôs, o vebin cuissà ce plui fuarce o politichis miôr.
Però alc di plui lu vês…
Sì, su ciertis robis o sin plui indevant, ma i problemis di fonde a son compagns. In pratiche o sin tolerâts, forsit ancje tutelâts, ma no rispietâts. Doprant une metafore o podaressin dî che o sin il cjâf de sardele, ma nô, se mai, o volìn jessi la “code di rosp”, o volaressin che ducj a podessin seilu. Jessi il cjâf de sardele, di fat, nol è un grant onôr.
______________________________________________
Il CIEMEN
Il Centre Internacional Escarré per a les Minories Ètniques i Nacionals (CIEMEN) e je une associacion fondade tal 1974 cun sede a Barcelone. Il so obietîf al è chel di promovi la cognossince e il ricognossiment no dome de realtât catalane, ma di ducj i popui minorizâts dal mont e, in particolâr, de Europe.
Il CIEMEN al opere tant che centri di documentazion specializât su lis minorancis etnichis e linguistichis e al organize conferencis e simposis ancje a nivel internazionâl. Cun di plui al publiche regolarmentri la riviste “Europa de les Nacions” e monografiis sul cont de situazion juridiche des minorancis.
L’incuintri cui furlans
Ai 3 di Lui stâts, inte biele suaze di Cjase Turoldo a Coder di Sedean – sede dal Istitût Ladin Furlan “Pre Checo Placerean” – Argemì al à incuintrât lis principâls rapresentancis sociâls e culturâls de comunitât furlane, cun chê di confrontâsi su lis ativitâts che al è daûr a meti adun a pro des minorancis europeanis e in particolâr la VIII Conference des Nazions cence Stât de Europe (CONSEU) che si davuelzarà a Barcelone te Vierte dal 2009.
La prossime CONSEU e vûl meti adun un forum a nivel european jenfri lis organizazions culturâls e sociâls des “nazions cence stât” cul obietîf di promovi une Europe plui rispietose des diviersitâts linguistichis e culturâls e dai dirits coletîfs che i son ae fonde.
