TERITORI – PORDENON. Al rive l’asfalt «antiglace»

Chest an, a Padue, al salon european dedicât al setôr dai asfaltîrs, le à fate di parone une gnove tecnologjie che, daûr di ce che a disin i esperts, e varès di risolvi un grum di problemis di viabilitât a chei che a vivin situazions di transit precari tes zonis di mont – e no dome –.
PERICUL RIDUSÛT_ Di ca no tant timp, su lis stradis al podarà jessi ridusût une vore il pericul de formazion di glace, graciis a une gnove formule di asfalt – cuntune misture insiorade di rivestiments al silicât – che e sbasse in maniere drastiche di 0 a -14 grâts il pont di glaçament des stradis. Chest al vûl di che, in presince di frêt, umit e nêf, tal gnûf asfalt no si formaran lis lastris di glace e che la necessitât di doprâ mieçs di pulizie de nêf al sarà une vore ridusût.
Ai 16 di Otubar, te strade regjonâl 251 dal Cjanâl de Ciline – chê che e met in colegament il Cjanâl cul bas Cjadovri – par man de «FVG strade», intun trat sperimentâl, a son tacâts i lavôrs di poie de pavimentazion cul gnûf aditîf pal disglaçament. Un prodot chest, che in câs di temperadure sot zero, sbassant il limit di congjelament de aghe, al ferme la glace e di conseguence ancje l’intassâsi de nêf (se al nevee).
Fats cuatri conts, la societât regjonâl des stradis e à subit pensât a une otimizazion dai coscj di gjestion dai scovenêf e dai spandisâl e a une aplicazion su largje scjale di cheste gnove tecnologjie. No dome: lis zonis di mont a podaressin gjoldi di un grant miorament de sigurece stradâl e di un trafic plui sigûr di Invier, ancje cun cundizions di innevament straordenari (come chês dal an passât).
SPERIMENTAZION_ Propite la statâl 251, teatri de sperimentazion, e je spes glaçade (la statâl e je cuasi dute in ombrene e, jessint propite dongje di flums e di riui, e je ancje particolarmentri umide), tant che i sindics dai paîs dal Cjanâl, e diviers esponents de politiche, a àn domandât a gran vôs al president de regjon e al assessôr di competence, un intervent di manutenzion che al vedi ancje la finalitât di ridusi i coscj di gjestion.
Il lûc sielzût pe sperimentazion al è il viadot sul riul Alba, tal comun di Andreis, li che – par vie de vicinance cul lât di Barcis e cuntun flumisel che cul sbalç di temperadure a produsin fumate, e par vie des condizions climatichis che a mudin in mût subitani dal Autun ae Vierte – dispès par tiere al glace, e la strade e devente une vore pericolose. Il trat in cuistion, che al è segnalât di un sisteme di cartei speciâi, al è costantementri monitorât di un grup di tecnics che a àn il compit di verificâ se il gnûf asfalt al funzioni, cussì di podê vê une plui rapide e largje aplicazion. A saran monitoradis lis temperaduris atmosferichis, la umiditât, il compuartament dal asfalt, la temperadure de cjarezade e la velocitât dal aiar.
SPERANCE PAR DUCJ_ L’esperiment pilote, prin esempli in regjon, al da une sperance a ducj chei comuns che in Provincie di Pordenon (ma il discors naturalmentri al vâl dapardut) si cjatin dispès a fâ i conts cu la nêf, cu la glace e cun dute une schirie di problematichis leadis ae manutenzion ordinarie e straordenarie des stradis.
Il pas di Rest, in comun di Vile Disore, che al lee la mont di Pordenon cu la Cjargne, ancjemò vuê che o sin tal 2009, al reste sierât par vot mês ad an (secontri l’A.N.A.S., sierâ al conven plui chi fâ manutenzion…) e chest an, par vie di une fuarte neveade, al è stât sierât plui adore dal solit. La statâl 552 che e puarte la int de Val Tramontine viers il Pordenonês (unic as stradâl jenfri la Val e lis zonis limitrofis) e je une vore pericolose e dilunc l’Invier dispès e je glaçade. La za nomenade statâl 251 dal Cjanâl de Ciline che e met in colegament i paîs di Cimolais e Claut cul pordenonês, come bielzà dit, e vîf plui o mancul la stesse situazion de Val Tramontine. La strade che e puarte in Plan dal Cjaval (che di resint e je stade sierade par manutenzion e par slargjâ la cjarezade) e je dispès sierade par masse nêf. E ancje se al samee in dut e par dut un cuintrisens, tantis voltis i turiscj a son obleâts a voltâ la machine e a tornâ indaûr.
La regjon Friûl Vignesie Julie e à plui o mancul 1.000 chilometris di stradis e une buine part e je interessade di un increment di trafic comerçâl (fondamentâl pal nestri sisteme produtîf), ma ancje dal transit di machinis che a rivin dai stâts confinants. Par chest «FVG strade» – daûr di ce che al à dite l’assessôr di competence – e je impegnade intune opare di manutenzion, ordinarie e straordenarie, par modernizâ e par ricualificâ un sisteme stradâl che al è fondamentâl pal nestri vivi e che, intune part impuartant, al transite in zonis li che la glace e je plui che mai un fastidi.
Sandri Olivetto