Al è lât in sene pal Teatri Stabil Furlan l’oratori in forme di teatri “La ricjece da la puaretât”
Al è lât in sene pal Teatri Stabil Furlan, tant che omaç al frari poete di Coder David Maria Turoldo a trente agns de sô muart, il spetacul tra teatri e musiche “La ricjece da la puaretât” tal Teatri Gnûf Giovanni Da Udine, tierç apontament de prime stagjon dal teatri di produzion in lenghe furlane. Un progjet che si presente tant che un oratori in forme di teatri, scrit dal atôr e scritôr Luca Fantini par ce che al tocje il test, e dal pianist e compositôr Glauco Venier, cui rangjaments di Michele Corcella, par ce che al inten la musiche.
◆ Cun lôr, sul palc al jere l’insiemi strumentâl permanent L’Insium, une realtât musicâl che e je oficine di esperiencis dentri di une orchestre a formazion varie, componude di musiciscj zovins e di altris za esperts, par une sezion slargjade di flâts, cun cuintribàs, batarie e – clâr – il piano di Glauco Venier.
◆ Al è sucedût alore che lis leturis senichis di Luca Fantini, voltadis par furlan di Carlo Tolazzi, a son risultadis une conte apassionante in forme autobiografiche, indulà che lui al pense, al discut, al viôt e si confronte in forme libare cul frari dai puars dal Friûl, a costituî lis parts dai recitatîf di chest oratori “moderni”. Invezit lis ariis a son componudis des cjançons, cui tescj gjavâts de antologjie poetiche di Turoldo, cjantadis di Alba Nacinovich, e lis parts corâls esprimudis des amplis parts strumentâls da L’Insium, cun moments di improvisazion di grant efiet inte trame de storie.
O vin vût il plasê di incuintrâ sedi Luca Fantini che Glauco Venier, e ur vin fat cualchi domande su “La ricjece da la puaretât”. I doi, a àn in comun cun Turoldo il paîs di nassite: Turoldo al jere di Coder, Glauco Venier al è di Grediscje di Sedean e Luca Fantini di Sedean. Ducj dongje, in sumis.
◆ Dut câs, a son dongje tra di lôr no dome di un pont di viste gjeografic, ma ancje tal mût di pensâ e di jessi vicins tal considerâ la semplicitât un valôr che al da ricjece interiôr, e che si presente ancje al esteriôr tant che un “alc” che si ’nd à ancjemò dibisugne, massime cumò che la esterioritât masse dispès si confont cul aparî.
_ Glauco Venier, cualis poesiis de produzion di Turoldo âstu sielzût di musicâ? «O ai sielzût chês – mi soi rindût cont ae fin dal lavôr di scriture musicâl – che a fevelin dal dubi e chês che a fasin sintî i savôrs e i odôrs di chel toc di Friûl indulà che o soi nassût e indulà che o vîf. Dopo, anzit prin di dut, o ai sielzût chês poesiis che di un pont di viste metric e sonôr a rispuindin al gno istint ritmic e melodic, e o ai cjatât tante aderence in lavôrs tant che “La sera”, “Memoria”, “Litania”, “Infinito silenzio”. _
Cemût ise nassude la colaborazion cun Luca Fantini par memoreâ il frari poete di Coder?
«Jo e Luca o vin tacât a lavorâ cul gno prin disc “L’Insium”, che al da il non ancje ae formazion strumentâl fate di zovins musiciscj cetant brâfs e sensibii che nus àn compagnâts in cheste aventure. O vevin lavorât insiemi ancje par un progjet su Tom Waits, e al pararà strani, lavorant su Turoldo o vin cjatât une altre plee de nestre biele intese. Luca al è un diret, come me, cence salamelecs, sincîr, al va dentri des robis cun onestât, e jessi cussì al jude a jentrâ tal cjâf e tal cûr di une figure tant fuarte, dute di un toc, ma ancje lui cu lis sôs debilecis, come Turoldo. Nô lu vin investigât intune forme laiche e profane, cjatant ancje in cheste mude la sacralitât dal so dî e dal so fâ».
_ Luca Fantini, ancje tu come Glauco tu âs vût la ocasion di cognossi Turoldo, ce ti impensistu di lui? «Jo o jeri frut, lui al insegnave intes scuelis di Sedean. Mi impensi de sô stature alte, de sô tonie lungje e nere che i rivave fin sot i pîs, e de sô vôs. Cuant che al fevelave al tonave: si lu sintive di lontan, cun chê vôs basse e sonore che al veve, cence vosâ. Al jere seri, al diseve robis che a scjassavin lis cussiencis, e par cualchidun al jere un personaç scomut. Jo in chest spetacul mi soi imagjinât ancje di fevelâ cun lui e di imbastî riflessions tacant dai siei discors, dai siei scrits, des sôs poesiis. Lui al voleve fâsi capî de int, no dome dentri de glesie ma soredut difûr, tai cjamps, intes stradis, tai curtîi. Jo che no soi crodint, mi soi impersonificât tant che un pecjadôr, un om falît, elevant cussì la sô figure che e merete di jessi considerade, ancje cumò che si celebre un so aniversari, in maniere mancul “politichementri corete” e pui sclete, sincire, vere. Come che al jere lui». _
Tu sês un scritôr e atôr “fûr des riis”. Puedistu dînus une tô riflession cjapant di esempli une poesie di Turoldo che o vês metût in sene?
«Dal moment che o sin in teme, memoreant i trente agns de muart di Turoldo, mi ven di ricuardâ la poesie “Memoria”. Lui al evoche i cjamps, la fumate, il soreli, i sterps e l’unic arbul vert: la sô serenitât. Jo la memorie le viôt tant che une plante di baraçs, alc di confusionât, miscliçât, tal stes mût di Turoldo. Ma secont me la memorie e je incontrolabile, si trasforme, no simpri o ricuardìn lis esperiencis propit cemût che a son stadis. Cussì mi somee che al stedi sucedint ancje in merit a Turoldo. Ricuardìnlu invezit come che al è stât pardabon, par tant che al pues jessi stât scomut. Un grant om, un grant furlan, par nuie facil, ma dut vêr». ❚
