Riformis e cuintriformis di un sisteme a tocs
Prime a forin i apalts di personâl dâts fûr aes cooperativis, po a tacarin a sparî i prins servizis dai ospedâi periferics (al baste pensâ ae fin di Glemone o di Cividât). Ae fin, a faserin saltâ intieris struturis e reparts, tant che il centri nassitis di Tisane, un dai ponts plui dibatûts tra i intervents des riformis sanitariis, che al à scjassade la opinion publiche e al à fat vierzi i voi suntune idee di gjestion cetant lontane a pet dai interès e des dibisugnis dai citadins.
◆ La prime ondade de emergjence pandemiche e à metût in zenoglon un sisteme za par so cont clopadiç e, ae fin, dut il pus ingrumât in agns e agns di tais e mutilazions al è sclopât fûr impestant dute la organizazion.
◆ Lu vin provât ducj, su la nestre piel o su chê dai nestris parincj: servizi vacinazions inesistent, gjavade la vacine cuintri dal covid-19 e chês obligatoriis pai fruts; pronts socors intasâts, timps plui luncs dal passio pes visitis ambulatoriâls, cence fevelâ de assistence tal câs di malatiis plui griviis. Malsigûr e malciert ancje dut il coordenament dai câs di positîfs al infet, daûr de ande statâl, cun indicazions dal dut diferentis tra miedis di base, ospedâi e liniis telefonichis creadis di pueste.
◆ Si varessial rivât a dâi cuintri a cheste situazion e a tornâ a metisi in rie intal periodi di bonât che la pestilence nus à lassât vie pal Istât?
◆ Forsit no, viodût il savoltament gjenerâl in dutis lis struturis, causionât ancje de “cuintriforme” puartade de gnove organizazion dal sisteme sanitari (dal 2019 lis aziendis sanitariis a son deventadis 3, impen des 5 di prime), che si fondarà su Cjasis di comunitât, Ospedâi di Comunitât e Centrâls operativis teritoriâls (Cot), che a varan di jentrâ a regjim dentri dal 2026, cun ducj i dubis lassâts in pîts sui centris periferics, tant che l’ospedâl di San Denêl (za metût in crôs cuant che al jere stât zontât cun Tumieç e cumò inmò piês stant che al è finît sot de Asufc – Aziende sanitarie universitarie dal Friûl centrâl, sot di Udin, adun cun Tisane e Palme).
◆ Purpûr, alc di plui si podeve ancje fâ, stant che i esperts nus vevin metûts in vuaite su la ande de epidemie.
◆ A part lis celebrazions retorichis saludadis a plene pagjine, i nestris “erois” miedis e infermîrs no àn viodût un centesim in plui pal servizi puartât indenant a risi de vite, cussì come che nissun precari nol à cjatade une stabilizazion o un ricognossiment pe sô professionalitât.
◆ Rivade la seconde scjassade, il sisteme dirocât al à tacât a vignî jù tant che un cjistiel di cjartis, cun siopars, autolicenziaments (une buine part rivâts daspò dal oblic de vacine) e tante, masse confusion, che no à sparagnât nancje dirigjents e primaris (a San Denêl intai ultins 2 agns a son lâts vie 6 primaris e no son stâts nomenâts chei gnûfs) e cun disservizis e mancjancis tai confronts dai utents.
◆ Stant ae normative statâl dal 2020, la Regjon e varès vût di indotâsi di puescj jet gnûfs (3500 jets di terapie intensive in dute Italie, 55 in plui in Friûl-Vignesie Julie), ma dal rapuart dal an passât de Cort dai Conts (che za intal 2018 e veve dade une valutazion dal dut negative de gjestion dal nestri sisteme sanitari) al è saltât fûr che, sul 25,7% di jets gnûfs ativâts in dute Italie, inte nestre Regjon a ’nt jerin stâts zontâts dome il 3,6% in plui, cuntune prevision di atuazion de norme dome dentri dal 2027.
◆ Cun di plui, intun verbâl dal Ministeri de Salût suntune ispezion dai ospedâi di Palme e di Gurize vie pal Istât passât, si lei cemût che il cont dai puescj jet al sedi stât fat in maniere indicative, cun falopis intal comunicâ il numar e intal ricognossi chei di medisine di urgjence e chei di terapie intensive. Par no fâsi mancjâ nuie, il rapuart al marche ancje i erôrs inte gjestion dal pront socors, cun pratichis che a podaressin puartâ a slargjâ i câs di infet tra i pazients in spiete. Al ven di pensâ che i doi ospedâi no sedin un câs isolât ma, come che al à confermât Alberto Peratoner, president Aaroi Emac FVG (Associazion anestesiscj rianimadôrs ospedalîrs talians – emergjence aree critiche), a sedin il spieli di un modus operandi de aministrazion regjonâl.
◆ Lis polemichis no si sierin culì, parcè che intune deliberazion de Zonte di fin an (DZR n.1965 dai 23 di Dicembar), forsit intune falope di calcul, al è stât decidût di ridusi il numar di puescj di terapie intensive, par un totâl di 11 in mancul a pet dai 120 che a esistevin prime de pandemie.
◆ Di adalt dai scagns regjonâi, si cîr di bonâ ducj, fasint savê che al è stât fat bon il Plan regjonâl de prevenzion 2021-25 (passe 500 pagjinis), li che, tra i tancj intervents, par dâi cuintri ae mancjance di personâl si podarà cjapâ sù ancje int foreste cun titui di studi no ricognossûts de Union europeane (une misure “urgjente” che no previôt la iscrizion inte liste, come che invezit al jere za sucedût intal 2004).
◆ Par sierâ, intai ultins dîs, la zonte Fedriga e à fat savê che e sarà chê che e invistirà di plui in sanitât inte storie de Regjon. Vie pe legjislature, di fat, a vignaran doprâts 750.217.833 € (la zonte Tondo e veve metût 393.076.172 €, biel che la tant criticade Serracchiani e jere rivade a 211.963.747 €), cuntune part dai fonts che e rivarà dal Pnrr (118,3 milions di euros), in gracie di un acuardi cul Stât. Di cheste sume, a mancjin di spindi ancjemò 473 milions, che a vignaran doprâts in maniere capilâr sul teritori, massime par rinfuarçâ i ospedâi “hub” e “spoke” (tant che chel di Palme, che al deventarà un centri specializât in ortopedie e oculistiche).
◆ Di bogns furlans, nus ven però di pensâ che al sedi dibant cirî di sierâ il cjôt, cumò che i purcits a son bielzà ducj scjampâts. ❚
