La Universitât Popolâr che si indrece a dutis lis fassis di etât

Si Beate Gfrerer, 54 agns, che bielzà di 25 e je a cjâf de Volkshochschule (Universitât Popolâr) carinziane, e je stade nomenade “Carinziane de Zornade”. O soi stade par cinc agns in Carinzie e propit in cheste scuele o ai insegnât e o ’nt cognòs ben la organizazion. Juste in chel periodi si insaldave il sodalizi jenfri la Volkshochschule (VHS) carinziane e la Universitât Popolâr di Udin.
◆ La figure di Beate e je stade laudade intant de assemblee dai socis za fa pôcs dîs, pe passion continue di ducj chescj agns, simpri dutun cu la grande dedizion e cul stamp inovatîf a pet dai mudaments sociâi. Par vie di chest impegn, la VHS carinziane e je stade marcade tant che pont di riferiment de associazion di dutis lis VHS austriachis.
◆ Viodìn prin di dut ce che a son lis VHS. La prime e nassè in Gjermanie intal 1844 sul stamp dal pareli istitût olandês, e in Austrie si scomençà intal 1887. Si trate di une istituzion che si cjatile soredut intal mont todesc e scandinâf e e funzionà di un continui, ancje intant de vuere e ancje inte DDR. A son istituzions che a van daûr dal sproc “life-long learning”, che al marche ancje culì tantis associazions (Universitâts de Tierce Etât, Popolârs, des Libaris Etâts e v.i.). La diference principâl cu lis nestris e je che lis VHS a son ricognossudis dal stât e – ancje se no son part dal sisteme scolastic – i diplomis a valin intal mont dal lavôr, pes domandis di residence o citadinance pai forescj di cualsisei divignince, che cun di fat lis VHS a àn deleghe par meti sù par lôr i cors cu la finalitât di vê la residence. A son pardabon “popolârs” par vie che a son viertis a ducj e cun di plui a àn finanziaments dal Stât o dal Land di riferiment par judâ la formazion dai mancul abenâts.
◆ Ben clâr che i cors, che a cjapin dentri ducj i rams des cognossincis, a previodin une frecuence minime par podê vê la certificazion finâl, ma no coventin esams.
◆ Propit su chest implant si incalme la figure di Beate Gfrerer, che e à studiât talian e rus e che intai ultins dîs agns e à fat jevâ il numar dai colaboradôrs di 40 a 80, e il numar dai cors di 2500 a 3500 ad an. La profierte e je permanente e e cjape dentri ancje progjets di formazion di base par int cun dificoltâts di aprendiment o che e stente inte leture e scriture, la formazion pal oblic scolastic, il disvilup cuntun voli al mont feminin, la saponte psicologjiche par zovins e frutats in berdeis. Su chest, o marchi che la VHS e puarte indevant doi centris par zovins a Clanfurt.
◆ Naturâl che la pandemie e à causionât cetancj problemis, ma la intraprendence di cheste femine no à mai molât e jê e à subit metût adun cors online, ben cussiente che chest nol varès rimplaçât la socializazion, principi di fonde des VHS, ma che al varès dut câs judât la integrazion sociâl dai oltrans e des personis cun dificoltâts. In graciis de alfabetizazion informatiche – indreçament simpri presint intes VHS – che si à podût vê, massime par chei madurots, midiant di une unitât mobile che e zirave sul teritori, si àn podût inviâ cors online in 32 comuns.
◆ Un altri teme che i sta a cûr ae Gfrerer al è dal sigûr chel de autodeterminazion des feminis, che si met in vore soredut midiant de formazion e de istruzion.
◆ Altris cantins che i son cjars a son la tutele dal ambient, i mudaments dal clime e v.i., che a fasin part dal program futûr de VHS carinziane, simpri plui indreçade ancje ai zovins, daûr dal gnûf sproc “VHS for future”. Cun di fat, jê stesse e pant che bisugne garantî ai zovins un divignî che al vali la pene di jessi vivût, e par chest si à di scomençâ propit des realtâts locâls.
◆ E juste apont su la fonde di chestis peraulis, buine fortune pal avignî a Beate Gfrerer e a dute la sô scuadre. ❚