Giada Andreutti si conte dopo dai Zûcs invernâi di Pechin
Dutis lis voltis che un atlete furlan al va aes Olimpiadis, la Patrie furlane e tire fûr orgoi, braùre, svant e e tache a sostignî il sportîf cun atenzion e grant tif. Compagn e je lade par Giada Andreutti, furlane di San Denêl, protagoniste ai Zûcs invernâi di Pechin, intal mês di Fevrâr, inte specialitât dal bob. E pensâ che la zovine atlete de nazionâl taliane no veve scomençât cul bob: dome cuatri agns indaûr e sumiave di deventâ une atlete olimpiche intal lanç dal disc. Di li al bob, la diference e je une vore grande.
_
Parcè âstu sielzût di cambiâ in maniere tant categoriche?
“Cuant che o lançavi il disc, il gno obietîf a jerin lis Olimpiadis di Tokyo dal 2020. Par rivâ a cualificâmi, un dai passaçs intermedis a jerin i Campionâts Europeans dal 2018, che in chel an a jerin organizâts a Berlin, in Gjermanie. Prime di chel event, la Federazion taliane di atletiche mi à domandât tantis confermis des misuris minimis par jessi dentri inte gare europeane: o ai tantis voltis realizât chês misuris. Cuant che al è vignût il moment di clamâ dongje la scuadre dai Europeans di Berlin, invezit, no àn fat il gno non. In chê situazion, o soi lade in crisi a nivel personâl. O ai crodût che chel ambient nol fos chel just par me e o ai tacât a cjalâmi ator, cu la idee di cambiâ aiar. Il gno morôs, Mattia Variola, in chel moment mi à judade une vore e mi à proponût, prin di ducj, di candidâmi pes selezions dal bob feminin. Viodint che a vevin tirât dentri lis feminis inte specialitât dal monobob propit in chel an, mi soi butade. Intal mês di Novembar dal 2018 o soi lade aes selezions talianis, no tant par svindic viers il mont de atletiche lizere, ma par cjatâ fûr stimui gnûfs par me. Mi soi inamorade subit dal bob: al stice la adrenaline, l’ambient al è simpri une vore naturâl e positîf. Si cognossìn ducj e si judìn tant dispès, parcè che o sin amîs. Al è un sport riscjôs, indulà che si cjatin une vore di azarts e, dut câs, o scugnìn judâsi, cun rispiet e sens de condivision dai pericui”.
_
In ce sens disistu che si judais, cundut che o sês une cuintri chel altri?
“Tal bob o sin dividûts in scuadris. Intal bob a doi, a son dôs personis che a àn di gjestî il mieç, une titulâr e une di risierve, plui une persone che e mene il bob. Si scuen lavorâ ducj adun, par movi un besteon che al pese 170 chilos. Intal monobob o soi bessole: al è cetant impuartant vê cualchidun che mi jude, ancje se nol è un gno compagn di scuadre”.
_
Duncje tu âs lassade la atletiche lizere pal bob. E dopo?
“No subit. Il prin an o soi lade indenant ancje cul lanç dal disc e o ai vinçût dut câs il titul talian, rivant ae cualificazion pai Campionâts mondiâi. A ogni mût, in curt mi soi inacuarte che no rivavi a tirâ fûr il cent par cent intes dôs dissiplinis e o ai scugnût sielzint dome une. Par fortune, la Aeronautiche militâr mi à dât une poie une vore impuartante. In chel moment, mi àn confermât la lôr volontât di tignîmi dentri de scuadre, sedi che o ves sielzût di lâ indenant cu la atletiche lizere, sedi che o ves cjapade la strade dal bob. La Aeronautiche si è fidade di me e jo o ai dome di vêi agrât”.
_
Ben pe nazionâl dai sports invernâi…
“O ai sielzût il bob in serenitât, cul sium di lâ aes Olimpiadis di Milan e Cortine, dal 2026. O vevi tacât cu la atletiche lizere cul obietîf di lâ a Tokyo, e invezit o soi lade a Pechin intal 2022 aes Olimpiadis invernâls. E cumò o clucìs il sium di jessi in gare aes Olimpiadis talianis, di vuê a cuatri agns, cui miei amîs, cu la mê famee e cui tifôs dongje de piste. La mê decision definitive di sielzi il bob e je rivade inte stesse zornade che il Comitât olimpic internazionâl al à pandude la uficialitât di Cortine”.
_
Atmosfere a Pechin, prin e dilunc des Olimpiadis?
“Intant dai alenaments fûr pal Istât o vevin decidût di zuiâsi dut sul bob a doi. Adun cun me e Tania Vicenzino – che e je furlane di Cjarlins e che mi cjati une vore ben cun jê –, cun nô si alenave ancje Elena Scarpellini. E je une vore di diference fra il bob singul e chel a doi. O vin lavorât une vore, ancje parcè che l’alenament al è pardabon une altre robe. Intes garis, dut câs, si sin inacuarzûts che jo o levi tant miôr cul monobob: i timps a jerin une vore confuartants. E alore, propit tal ultin moment e par merit di cundizions particolârs des classifichis e di chel che si clame ranking internazionâl, dome cualchi setemane prime di lâ a Pechin o ai tacât a stâi daûr al monobob. O ai scugnût savoltâ dut il sisteme di alenaments. Dut il patiment e il torment tignût dentri par rivâ a lâ aes Olimpiadis mi à dât mût di gjoldi in maniere particolâr e plui plene. Cjale: o soi rivade in Cine dome tal ultin moment e mi soi alenade jù pe piste olimpiche dome sîs voltis, prime des dôs garis. O soi braurose di ce che o ai fat e di me stesse: emozions che no si puedis dismenteâ. Inte zornade des garis, o jeri la ultime a vignî jù. No ai cjalât lis garis des mês aversariis: o jeri fisse dome sui miei pinsîrs. O ai capît pardabon di jessi aes Olimpiadis dome cuant che o ai cjapade la curve numar sîs, indulà che a son piturâts i cinc cerclis. In chel moment, o ai pierdude un pocje di concentrazion e o ai sbaliât, ma intal complès des dôs zornadis di garis, al è stât dut maraveôs”.
_
Continus cemût che tu âs passât lis zornadis tal vilaç olimpic, cul to morôs Mattia Variola, ancje lui atlete de Nazionâl taliane di bob.
“Sul principi o vin simpri viodût la ativitât dal bob tant che un lavôr e o vin simpri tignût une ande professionâl. Forsit a Pechin, pe prime volte si sin compuartâts pardabon come morôs in public. Cualchi fotografie in plui dal solit… Ancje parcè che lu ai obleât! Si sin sburtâts un cun chel altri a lâ simpri indenant, cirint di fâ il miôr. Nol è stât simpri dut facil. Dut câs, cumò cjase nestre e je sfodrade di robis puartadis ca di Pechin”.
_
Cuâl isal il messaç plui biel, rivât subit daspò des garis?
“Biele domande! In bande de piste, a Pechin, al jere un grant schermi, cuasi un cine, indulà che lis fameis e i tifôs dai atletis a rivavin a scrivi alc e a fevelâ cun nô, subit dopo des garis. Rivâ a viodi e a fevelâ subit cui miei parincj al è stât cetant biel. In tancj mi àn scrit, ancje personis che no crodevi che ur interessàs alc di me. E, tal stes timp, mi spietavi che cualchidun al scrivès. Cul jessi culà vie, o ai capît trop valôr che e veve la robe che o jeri daûr a fâ. Forsit, il messaç plui biel al è stât chel di mê sûr plui piçule. Cuant che mi à viodude a vaî, e à capît che jo no soi un cret tant salt come che ur pareve a ducj. Dute la fadie e l’impegn che o ai metût par jessi là jù e che o vevi platât, si son viodûts in chel moment”.
_
Milan e Cortine a son daûr dal cjanton…
“L’obietîf al sarà tornâ a cjase des Olimpiadis dal 2026 cun alc di pesant picjât intal cuel. Dut al larà daûr dai prossims timps. Se al larà dut ben inte preparazion, o sai bielzà che in chê volte o sarai competitive, in dutis lis garis. O podarès sielzi sedi il monobob, sedi il bob a doi, parcè che la Italie, tant che paîs che al da acet aes Olimpiadis, a varà un puest in dutis lis specialitâts. Viodarìn”. ❚
::::::::::::::::::::::::::::::::::::::::::::::::::::::::::::
Il Friûl intal cûr
Intal 2022, Giada Andreutti e je une des atletis plui rapresentativis dal Friûl sportîf. No dome pal so impegn intal bob tes ultimis Olimpiadis, ma ancje pe sô maniere di jessi simpri positive, ridinte e vivarose in tantis ativitâts. Cul Friûl simpri tal cûr.
◆ “Nô o sin int sierade – e dîs Giada – ma se un atlete furlan al rive a risultâts preseâts, dut il Friûl si sint cjapât dentri, soredut intai sports che a àn mancul visibilitât. O soi restade cuant che o ai viodude trope int che mi à fat fieste. Massime, int che no cognossevi e che, tantis voltis, o ai cjatât a bevi insiemi un cafè. Di altris bandis di Italie al è diferent. Jo o soi nassude e vignude sù di piçule a San Denêl, ma in realtât il gno cûr al è a Ruvigne, il paîs di gno pari. Un piçul borc indulà che ducj a san che o soi la fie di Tilio dai Sclops. O sin pôcs, o sin sierâts, ma o sin simpri i prins cuant che al è di condividi alc, une gjonde, un dolôr: viôt l’Orcolat. Al baste fevelâ di cemût che e lavore la Protezion Civîl in Friûl par capî ce int che o sin. E cuant che o voi ator pal mont a fâ garis o alenaments, mi puarti simpri daûr dut. ❚
::::::::::::::::::::::::::::::::::::::::::::::::::::::::::::
SCHEDE PERSONÂL
Giada Andreutti e je nassude a San Denêl intal Fevrâr dal 1995.
◆ Par ce che al tocje il sport, e à tacât di frutine intal sô paîs cu la bale tal zei. Di zovenute e à scomençât cul salt adalt, cul mestri Stefano Secco, e a lançâ il disc. In cheste specialitât de atletiche lizere, alenade di Adriano Coos, e à vinçût il titul talian assolût dal 2018 e dal 2019 tai campionâts invernâi, e doi titui intes categoriis dai zovins. Cu la nazionâl taliane e à partecipât a diviersis competizions internazionâls, europeanis e aes universiadis. Giada e je dotore in siencis motoriis. ❚
