Volê o no volê, la tiere di dulà che o vignìn o che nus à cressûts, nus forme, e influìs su di nô, intal profont, e contribuìs a fânus jessi chel che o sin, a plasmâ la nestre identitât. Al vâl ancje pai vins. E ogni vin al conte une storie. Prime di dut la storie des sôs origjins, dai lûcs li che al è nassût, des tieris che lu àn gjenerât, e po chê dai oms e des feminis che lu àn produsût. Lu ricuarde simpri – aes tantis e ai tancj che a rivin a Valarian di Pinçan par cognossi la cantine de famee – Alberta Bulfon, studiose apassionade di storie e art locâls, cun desenis di publicazions al atîf, che, 20 agns indaûr, intal 2002, e jentre inte aziende vitivinicule fondade dal pari Emilio da pît des monts dal Friûl ocidentâl, tra boscs, culinis e lis rivis dal flum Tiliment. La aziende si slargje cui siei vignâi intal teritori che al cjape dentri i comuns di Cjistielgnûf e Pinçan, suntune superficie in part culinâr di scuasit 16 etars, la grande part tignude a vignâl di antighis varietâts autoctonis furlanis coltivadis par secui inte pedemontane dal Friûl ocidentâl. Varietâts che fin a uns trente agns indaûr a someavin sparidis, glotudis dai baraçs e dismenteadis dai oms. Tacant di Ucelut, Piculit neri, Sciaglin e Forgiarin, Emilio Bulfon, cul jutori de femine Noemi e dai fîs Lorenzo e Alberta, lis à fatis tornâ a vivi, ancje su lis olmis di vecjos documents. Lis à individuadis, selezionadis e tornadis a implantâ, cu la colaborazion dai esperts ampelografs dal Istitût sperimentâl di Conean, pontant su la identitât di un teritori e su la tutele de biodiversitât: une sfide cuintri dal strapodê de omologazion comerciâl. Di chês varietâts a nassin vins struturâts de storie, fîs di une tiere biele e fragjile, che a àn i profums des culinis, i guscj des pomis di bosc, i colôrs dai afrescs che a insiorin lis gleseutis dal dulintor e che Alberta Bulfon e cognòs di brucje.
◆ Alberta e sa contâ la sô tiere come pôcs. Lu fâs cun passion e cun dut l’amôr pal cjanton di Friûl che le à viodude nassi e cressi – «un paradîs» –, cu la competence che i ven dai studis in conservazion dai bens culturâi, aprofondîts intai agns, e la esperience di catalogadore, e la premure di volê pandi la straordenarie sioretât di un patrimoni – storic, artistic e ambientâl – pôc cognossût. Lu san ben i enoturiscj che a rivin a Valarian di ogni bande dal Friûl e no dome (tancj i americans de vicine base di Davian), sommeliers e students di agrarie. Alberta ur da acet inte cantine e intai vignâi di famee. In gracie di un percors formatîf di pueste, e condûs visitis vuidadis e cercis.
◆ E conte, e lu contestualize in sens storic, il teritori traviersât dal Tiliment, il cjistiel di Pinçan, la ricjece dal patrimoni artistic cu lis oparis di Giovanni Antonio de’ Sacchis – “il Pordenone”, il plui grant artist furlan dal Rinassiment e un dai plui impuartants pitôrs a fresc de prime metât dal Cinccent – presintis in trê glesiis tra Valarian e Pinçan e, une volte, intal mulin di Borc dal Pian, comissionadis de confraternite dai Batûts e dai Savorgnans. E propon i tancj prodots tipics locâi – dal caprin di Pinçan ae mîl di Cjistielgnûf, ae trute salmonade di Sant Denêl – dissegnant un itinerari storic, culturâl e enogastronomic di Valarian bande Glemone, dilunc de vie antighe des marcjanziis che e puartave marcjadants, pelegrins e viandants di Vignesie al Noric, in Austrie. «O sin convints che i nestris vins a van fats cognossi traviers dal leam cu la storie dai lûcs di apartignince». No par nuie il logo de aziende e la etichete dai vins Bulfon a riprodusin, in forme stilizade, un particolâr dal afresc de Ultime Cene dal oratori di Sante Marie dai Batûts di Valarian, de metât dal Tresinte, li che si ricognòs un apuestul che al met vin ros intune tace. Une “marche” che e fâs il zîr dal mont, pandint dut l’amôr di une famee pe sô tiere, esprimût traviers de valorizazion de bielece e de culture e il recupar de memorie.
◆ Il leam cul teritori si pant ancje cul rispiet des plantis. Il plui grant vignâl dai Bulfon al è intune aree protete, inte zone speciâl di conservazion Glereâl dal Tiliment, dongje de gleseute de Santissime Trinitât – destinazion di rogazions e processions par implorâ la ploie –, là che ancje la coltivazion de vît e à di rispietâ vincui precîs. Si zontin a une cure e a une atenzion che no son mai mancjadis: si fâs la lote integrade a bas impat ambientâl e lis vîts si cuincin cuntun metodi che al manten ben la plante e i slungje il cicli di vite. «E je deventade une passion – e conte Alberta –. Cuant che al è il moment de spedade, tu stâs intal vignâl 6/7 oris in dì par 2/3 mês. O ai fat un cors che mi à insegnât tant. Ogni vît e je diferente di chê altre, tant che lis personis. Cuant che e je ore di cuinçâle, mi met in scolte de plante, cence premure. Al è un esercizi zen, intal mieç di une nature maraveose».
◆ Maraveose e uniche. «Intai terens aluvionâi sul ôr dal Tiliment e je une grande biodiversitât di speciis vegjetâls e animâls, studiadis di cetancj esperts e che a van tuteladis. Ma la int, ancje chê dal puest, a ’nt sa pôc. O ai intal cjâf di meti tabelis intai vignâi par pandi la ricjece di chest teritori. Ta chel dongje dal flum a son cjavrûi, cenglârs, paveis e uciei di ogni sorte. Il tac al à fat la sô tane e al pâr che al torzeoni il lôf. A mancjin une azion di cognossince, di divulgazion e di formazion, percors didatics, indispensabii par svilupâ une cussience ambientâl informade, che si tradusi ancje intal monitorâ il stât dal ambient, intal valutâlu e, di consecuence, tal stiçâ politichis adeguadis». Alberta e fevele di “citizen science”, une pratiche che e à il so cûr inte partecipazion ative de citadinance e inte colaborazion. «Lis personis a àn di savê, a àn di jessi coinvoltis», e dîs, batint su la necessitât di ativâ un contrat dal flum che al cjapi dentri dutis lis comunitâts su lis rivis dal Tiliment par une sô gjestion integrade e partecipade.
◆ E par chel che al inten il mont dal vin: «E covente plui cognossince des particolaritâts e des ecelencis de nestre tiere, ma ancje plui competence e coordenament. O pensi ae esperience dai biodistrets, inviade in altris regjons, che a rispuindin ai bisugns tecnics, formatîfs, informatîfs e di marcjât dai sogjets che si metin dongje, ma che a restin concorints in cantine cu lis lôr specificitâts». ❚
::::::::::::::::::::::::::::::::::::::::::::::::::::::::::::::::::
Il profîl di Alberta Bulfon
Nassude a Udin intal 1963, Alberta Bulfon e vîf e e lavore a Valarian di Pinçan inte aziende vitivinicule di famee, la Cantine Bulfon, dulà che, in plui des voris in vigne, si ocupe de ospitalitât inte cantine. E da acet ai enoturiscj par cercis e visitis vuidadis, ancje intai vignâi e intal teritori par fâ cognossi e condividi la bielece dal grant patrimoni paisagjistic, storic e artistic de zone. E partecipe aes fieris dal setôr. E fâs part de associazion “Donne del vino” dal Friûl-Vignesie Julie.
◆ Diplomade al liceu classic “Stellini” di Udin, cuntun percors di studis universitaris intal ambit dai bens culturâi aes spalis, de fin dai agns Otante e à scomençât a scrivi di storie locâl e art. E à scrit, tra lis altris robis, dal cjistiel di Pinçan e des sôs glesiis, de figure di Fabio di Maniago podestât, de religjositât popolâr inte fasse da pît des monts dal Friûl ocidentâl e dai percors devozionâi, de produzion de ceramiche in ete rinassimentâl a Cjistielgnûf e de storie de emigrazion dai fornasârs simpri a Cjistielgnûf, des ativitâts produtivis dongje de confluence dal Arzin a Flavuigne, de glesie di Palugjee, de presince dai nobii di Polcenic e Fane a Savorgnan di Sant Vît.
◆ E à catalogât passe 2 mil bens culturâi (oparis di art antighe e moderne, fotografiis e ogjets demo-etno-antropologjics) par cont dal Centri regjonâl di catalogazion dai bens culturâi di Vile Manin di Passarian – li che intal 1990 e à cjapât il diplome di catalogadore dai bens culturâi –, lavorant par ents e museus a Pordenon, Secuals, Andreis, Pofavri e Fontanebuine di Pagnà.
◆ Pe Universitât dal Friûl e à butât jù vôs dal dizionari biografic dai furlans “Nuovo Liruti” (etât moderne e contemporanie).
◆ E à curât il volum “Giorgio di Polcenigo e Fanna. Le lettere 1736-1782” (Accademia “San Marco”, Pordenon, 2010) e e à colaborât cun rivistis e periodics di culture e storie locâl.
◆ E à fat part dal comitât tecnic sientific dal Ecomuseu des Dolomitis furlanis “Lis Aganis”.
◆ E je conseire de Societât filologjiche furlane e componente de comission culture de socie. ❚
