✽✽ Dilunc di une presentazion dal grant libri dal nestri diretôr Tomada, “Storia del Friuli e dei friulani”, mi à colpît in particolâr une frase che al à pronunziade intant dal incuintri cui letôrs: “Nô furlans – al à dit Walter – o ’nt vin viodudis pardabon tantis intal cors dai secui, che – te nestre stesse concezion de vite – o vin cjapade une disposizion di prudence che dispès si trasforme in mancjance di vision positive, cuasi rassegnâts che lis robis a puedin lâ piês di cemût che si presentin al moment, e duncje no si fidìn mai des aparencis”. Ve sclarît, se no ai capît mâl, chel “Mai un mâl di gnot” che al segne, intal nestri sintî coletîf, il domini dal inciert negatîf e al gjenere une sorte di pessimisim storic.
✽✽ La version plui lizere e ironiche di cheste mentalitât e je te maniere che o vin di rispuindi ae domande “Cemût vadie?” dulà che, tant par no esponisi, rispuindi “avonde” (cence sclarî se avonde ben o avonde mâl) al da il sens di une precarietât simpri incombente.
✽✽ Su la fonde di ce che al è sucedût intai ultins agns, di ce che al è sucedût cu la pandemie e di ce che al sucêt vuê in Ucraine, dulà che dutis lis regulis de umanitât a son ribaltadis, al vignarès di dî che in fonts i nestris viei a vevin reson a no fidâsi dai events. Tal stes timp, fuarts apont de esperience di secui, di savoltaments naturâi o procurâts des matetâts dai potents, no podìn no constatâ cemût che devant des dificoltâts o vin rispuindût simpri cun coraç e cun determinazion.
✽✽ No crôt duncje che si puedi dismenteâ che ducj i doi chescj sintiments, pôre e volontât di frontâ i problemis, a coesistin e a fasin part dal nestri Dna di popul. Acetâ cheste convivence nol à di impedînus però di cjalâ indenant, di sfidâ il futûr, cussients che dome un progjet che al vadi di là de cuotidianitât al puedi dânus la fuarce di passâ di là des pôris e des inciertecis.
✽✽ Di sigûr a saran ostacui a metisi di mieç, al esistarà simpri cui che al provarà a blocâ ogni sfuarç di progrès, cui che al larà indevant a calcolâ chel furlan tant che un popul di sotans, bon dome di ubidî e di sbassâ il cjâf. Masse i esemplis des nestris classis dirigjentis, ma magari cussì no ancje i egoisims personâi o di categorie: a dimostrin cemût che chest al sedi sucedût za e cemût che al sucedarà ancjemò.
✽✽ No stin lassâsi spaurî e nancje no stin vaîsi intor.
✽✽ Ancje la savietât antighe nus confuarte parcè che, devant dal “mai un mâl di gnot”, e opon un filosofic “No le è mai un mâl che nol sedi ancje un ben”. ❚
